VaHebuli 3 - Tesitamenti Umupwa 1965

UChilisiti mupiti kwa Mose

¹ Pe lelo, mwe vamwitu mwe vafinjile, mwe twisitwe swenti ulwito lwa kumwanya, mumutontomele munsivo uMwapositili, uWashiputʼumupiti we tukumuhomeshezya, nkumutaha we Yesu,

² wʼali mutungamu kuli wuyo wʼamuvisile mumbombo, inza ṿwʼuMose ali munyumba yakwe yonti.

³ Shʼuwene asivililwe ukuti ahondeye uvumwamu ukulusya uMose, inza she wope numuzenganyumba akuyilusyʼinyumba ulushindiho.

⁴ Shʼinyumba zyonti valipo ve vakuziyananya, nkandi wʼakuṿiyananya ṿwonti we wʼuMulungu.

⁵ UMose nalyoli ali mutungamu munyumba ya wuyo yonti fwe ngati muvomṿi, ukuti azihomeshezyaje Zye ziliyangwa pisinda;

⁶ nkandʼuChilisiti fwe ngati mwanamwana wʼavisilwe panyumba yakwe, wʼiswe swe nyumba yakwe inga tukwumishizya nkani shisitakutetema nukuyitima nulusuvilo ukufiha kuvulunjisu.

⁷ Mwe mumwo lelo inza shʼakuyangʼuMupepʼuMufinjile, akuti: We musanyʼuno inga mukwiṿwʼizwi lyakwe,

⁸ pe mutahagasyosyʼamoyo ginyu, inza she pavupelemulaha pala pisiku lya lutazyo mulwugwa,

⁹ pala pʼavaso imwe vahandingaga mululingo, lwe vahenya imbombo zyane kumaha amashumi gane.

¹⁰ Zye nkavaṿitililwa avanyenya vala, nkati: Shima vakupuva mumoyo. Amadala gane nyene vatagamanyile.

¹¹ Inza she nkalapa muvuṿitwe vwane, nkati: Vataliyinjila muvutuzyo vwane.

Vwe mutungamu vukwanzilwa ukufiha na kuvumalilishilo

¹² Mwandaje lelo, mwe vamwitu, mwenti mwe muvaliye numo atavanje wa mwoyo wa lombwa, uwa vusisi, uwa kumuzilʼuMulungu umulanzi.

¹³ Nkandi musohane amanda gonti, shima lwe lilipo ilya kulitaha ukuva lya musanyʼuno, ukuti mwenti mwe muvaliye ishifumbo sha vutalamalandu shitahasyosyʼumwoyo wa woka.

¹⁴ She tuyipezilʼukuva swe valilani nuChilisiti inga tukwumishizya nkani uvwando vwa lutungamilo ukuvufishila uvulunjisu.

¹⁵ Inza she liyanzilwe lye likuti: We musanyʼuno inga mukwiṿwʼizwi lyakwe, pe mutahagasyosyʼamoyo ginyu, inza she pavupelamulaha pala.

¹⁶ She ve vananu ve viṿuye, vahamupelelʼumulaha? Te vonti vala vʼuMose avafumizye mw-Egipiti?

¹⁷ Avene vʼavaṿitililwe amahʼamashumi gane ve vonu? Amwe te vuvo ve vatazilʼamalandu, vʼamaṿimba gavo gahagwa mulwugwa?

¹⁸ Amwe ve vananu vʼavalapiye ukuti vataliyinjila muvutuzyo vwakwe? Nkuti vuvo ve vahasufwaga.

¹⁹ Mwe mumwo tukwenya ukuti vapositwʼukwinjila she vahasitʼukwitiha.