VaHebuli 13 - Tesitamenti Umupwa 1965

Insoshe kulujendo lwa muchilisiti

¹ Ishikunzi sha kukundana mwe vuvo vatupu mwe vanamuntu, she shivanje shima.

² Mutaluṿwaje ukuvatetelʼahinza avajeni, shʼavamwinyu vamo lwe vahahonzyaga vovulo vavaposheleye avahavizya shisitakuvamanya.

³ Muvakumbuhaje ava mumunyololo fwe ngati mwe vamwavo mumunyololo namwe, havili nava ve vakuvombelwʼimbivi, she namwe mushili muli mumuvili.

⁴ Umwiho wa vusendelo vawimishe avantu vonti, mwandaje mutahandamanyaje ishitala, shʼavamalaya navavembu vʼuMulungu alivalonga.

⁵ Ulujendo lwinyu luvanje lusitakupapilʼimpiya. Mutinji ṿijiye ṿwenga muli naṿwo. Shʼayanzile wuyo atili: Ntalikuzila nalumo, ntalikuluṿwa nalumo.

⁶ Mwe mumwo lelo tusimpaje tutinji: UMwene we mutuli wane, ntakunyila nazimo; pʼunanu angati vuli nane?

Umushinzi kuvalongozi

⁷ Muvakumbuhaje ve vavalanzilʼimwʼidala, ve vavavuzizyʼimwe inongwa zya Mulungu, mwenyelezyaje nkani uvusilo vwa lujendo lwavo, muvalandatʼulwitiho.

⁸ UwenʼuYesu Chilisiti atakugalunkana nalumo, we wuyo shima namavwila nashinishi nakuvusitakusila.

⁹ Mutahashele ukunyatulwa ninsambilizyo inyinji ninjeni. She hinza ingʼumwoyo akugomela muvwila, te mwe muṿwa kulya ṿwe ṿitakuvavosya nahamo vuvo ve vakujendela muli ṿiṿwo.

¹⁰ Naswe tuli nishifinjilo isha kufinjila, she shitakuvavela ukulila pupo vuvo ve vakuvomba iya vwashiputo mwihema.

¹¹ Shʼinkanu zyonti zyʼamavanda gavo uwashiputʼumupiti akwinjila nago pavufinjile pazya malandu gitu, zyʼamavili gavo gakulungulilʼumwoto kunzi kunkambi.

¹² Mwe mumwo wope nawe Yesu avazilʼukuyimba kushikwilo kunzi ukuti avazelufwʼavantu namavanda gakwe wuyo.

¹³ Ukwo lelo naswe tufume munkambi, tuvale kunzi kwʼali, lwe tukuyivegazye indigo zyakwe.

¹⁴ Shʼipa tute ninkaya iya kuva shima ndali, nkandi tukuyanza yila yʼikwinza.

¹⁵ Muli wuyo lelo tumutwalilajʼuMulungu imputile zya lutimo lwa kumutima wuyo shima, nkutahʼinsanga zya malomu ge gakulyitihʼizina lyakwe.

¹⁶ Mutaluṿwaje ukuvombʼimbombo zya shikuku nizya kulilana navanji, she Zye mputile zyʼuMulungu akuzishela.

¹⁷ Muvitihaje avalongozi vinyu, muvavelaje, she vakushesya fwe ngati vantu ve valilanduzilwa lwe vakusunjililʼamoyo ginyu, ukuti vavombaje zinizi muvusansamusu shisitakuyivunanzya, she zinizi zitangavavosyʼimwe nahamo.

Intumi zya kulagana

¹⁸ Mutuputilaje, she tumanyilʼukuti inyenyezyo zyitu nyinza, lwe tukwanzʼukuva nulujendʼulwinza muli zyonti.

¹⁹ Zye nkupitilizya nkani ukuvalambilizya ukuhonzya vovulo ukuti ingalushe kumwinyu luvilo luvilo.

²⁰ UwenʼuMulungu wa vwihalo, wʼamufumizye kuvafwe uMudimi umupiti wa ngʼonzi, we gamupezilʼukuva mudimi ge mavanda ga lwitinkano lwa shima, nkumutaha we Mwene witu uYesu,

²¹ wʼavapanje uvulunjisu mumbombʼinyinza zyonti ukuti muvombaje zizyo zyʼakasime wuyo, lwʼakupela mumwitu Zye zihondeye kuminso gakwe mwe mwa Yesu Chilisiti wʼali muvumwamu shimashima nakuvusitakusila. Amen.

²² Nkuvalambilizya, mwe vamwitu, ukuti mutaṿitwaje kwizwi lya kuvayinzanya ili. She mbasimbiye hansi.

²³ Mumanye ukuti uwamwitu uTimoti asatulilwe, we nkwinza nawo ukuvenya imwe ingʼatakuhava ulwinza.

²⁴ Muvalamushe avalongozi vinyu vonti navafinjile. Vakuvalamuha namwe vonti ava mw-Itali.

²⁵ Uvwila vuvanje namwe mwenti.