VaHebuli 11 - Tesitamenti Umupwa 1965

Amaha ga lwitiho

¹ Ulwenʼulwitiho lwe kuhola inga zikuhozile muhati zyʼukusuvila, kwe kwaga inga zikwazile muhati nazyʼutaziwenyi muminso.

² Shʼulwitiho lunulu lwe luvapeleye avalulwo ukuhomeshezelwa.

³ Mulwitiho tumanyile ukuti insi yapezilwe kwizwi lya Mulungu, ukuti iṿintu ṿwe tukuṿilola ṿitapezilwe muṿintu ṿwe ṿikuvoneha.

⁴ Mulwitiho uHebeli ahafinjila kwa Mulungu imputile impiti naku ya Kayini, lwe muli lulwo ahatashilwʼuvugolosu, shʼuMulungu ahamwitishila pali ṿiṿwo ṿwʼamutwaliye. Muli lulwo ashili akuyanga nashengʼafuye.

⁵ Mulwitiho uHenoki ahanyatulwa ukuti atahenyʼuvufwe, she vahapotwa ukumwaga nakumo mwʼuMulungu amunyatuye. Shʼuwene atasilwe nzila lwʼashili nukunyatulwa ukuti uMulungu akumushela.

⁶ Shisitalwitiho nyene pʼumuntu numo atamanyile ukushelwa. Shʼuno wʼakupalamila kwa Mulungu we pakuti zimuholaje, ukuti alipʼuwene, havili nizya kuti akuvalipila vuvo venga vakumwanza.

⁷ Mulwitiho uNwaka, lwʼayiṿuye kwa Mulungu zye zyashili nukuloleha, ahagombʼimbogoso shisitakumwila iya kuponela mumwo ava nyumba yakwe. Muli lulwo ahayilongʼinsi, pʼahapwana uvupwano vwa vugolosu vwe vukulandata mulwitiho.

⁸ Mulwitiho uAbulahamu, lwʼayisitwe, ahitiha ukwepa ukuvala pupo pe pahava pa kuyipelʼukuva pe pavupwano vwakwe. Ahepa shisitakumanya kwʼahavalaga.

⁹ Mulwitiho ahatendama munsi ya lumfingwi mula fwe ngati mwe muvujeni, fwe ngati mwe munsi yʼite yakwe, ahadila mumahema poka nuYisikaka nuYakobu ve vali vapwanavupwano poka nawo ava lumfingwi lula.

¹⁰ Shʼuwenʼaminso ahenyaga kunkayʼila iya lwalo, yʼumuzenzi wakwe numupezi wakwe wʼuMulungu.

¹¹ Mulwitiho wope nuSala ahenyʼamaha aga kuposhelʼimbeyu iya kupapa nashengʼamaha gakwe gashilinkine. Shʼamulemilʼuvutungamu wuyo wʼafinzile kukwakwe.

¹² Ilelo pe vahapapwa kumuntu woka mwene, wʼali fwe ngati afuye, avana ve vali fwe nzota zya kumwanya uvwinji, havili fwe ngati lusenga lwa kushipuma sha sumbi lwe numo atangavazya.

¹³ Vonti vanava vafwiliye mulwitiho, shisitakuhomana naṿwo ṿwʼuMulungu afinzile kuli vuvo, vahaṿwenya kwe kutali nukulamunkana naṿwo. Vahayitaha veka ukuva vajeni avashintizi munsʼumu.

¹⁴ Shʼava venga vakuyanga vovulo ve vakuloleha ukuti vakusamba kumwavo.

¹⁵ Apene vapele vatahaga yiyo mwe vafumile, pe nkandi vapazile apa kugalushila kukwo.

¹⁶ Nkandi shinishi vakusungwa nkani insi indusyʼuvwinza iya kumwanya. Pe wope nawe Mulungu atakwenyʼinsoni lwʼakutashilwʼukuva Mulungu wavo, shʼavayananizizye inkaya.

¹⁷ Mulwitiho uAbulahamu ahamutwala uYisikaka kushifinjilo pala pʼahalingwaga. Uwenʼuno wʼuMulungu afinzile kuli wuyo, ahamutwala umupapwa wakwe woka mwene imozi,

¹⁸ wʼahayanjilwa ilya kuti: Mwa Yisikaka mwʼimbeyu yaho yiliyitwa,

¹⁹ shʼuwene atili uMulungu ali namaha aga kumuzyusyʼumuntu nakuvafwe. Mwe mumwo ahamuposhela fwe ngati mwe mushiholanyo.

²⁰ Mulwitiho uYisikaka ahavalota uYakobu nuYesavu namuli Zye zyashili ukwinza.

²¹ Mulwitiho uYakobu lwʼamakufwa ahavalota avana va Yosefu ve vavili, pʼahinamʼukuputa lwʼayegamiye indisa yakwe.

²² Mulwitiho uYosefu lwʼamakusililishila pʼahakumbuha izya kufuma kwa vanaYisilayili, havili ahavalajizya izya mafupa gakwe.

²³ Mulwitiho uMose lwʼapapwa, avapafi vakwe vahamuzyiha amezi gatatu, she vazile mwana mwinza nkani, havili vahasita nukutetema ululajizyo lwa mwene.

²⁴ Mulwitiho uMose lwʼakula ahahanʼukutashilwʼukuva mwana wa samwene wa Falayo.

²⁵ Shʼuwene ayazilʼukuti ukuyimba poka navantu va Mulungu nukuluva iṿwa pavutalamalandu kumanda mansi— kwinza kwe kuyimba navantu va Mulungu. Zye zizyo zyʼahayisevela.

²⁶ Ahati ukuzwelushila mwa Chilisiti kulusizye iṿwuma ṿwonti ṿwa mw-Egipiti uvugomu, shʼuwene ahenyaga kuṿwa kumulipila.

²⁷ Mulwitiho ahepa mw-Egipiti shisitakunyilʼumulaha wa mwene, shʼahagomelagʼamaha muli wuyo umusitakuvoneha muminso, ahava fwe ngati amuwenyi.

²⁸ Mulwitiho ahayananyʼuPasa nukusansilʼamavanda, ukuti umugogavahatote ula atahavapalamansye avene.

²⁹ Mulwitiho vahalambʼusumbi umushemamu fwe ngati vakujenda pe pansʼinyumu. PʼavEgipiti vahamila lwe vakulinga ukuhonzya vovulo.

³⁰ Mulwitiho ilinga lya mu-Yeliho lihamongoha lwe valiliviyʼamanda gasano nagavili.

³¹ Mulwitiho uLahabu umalaya atahalova poka navasitakwitiha, shʼavaposheleyʼavaṿulizi muvwihalo.

³² Njangaje zyashi zinizi? She pe ngapotwa apa vuyanjilo inga nkuti njangaje nizya Gidiyoni nuBalaka nuSamusoni nuYefuta nuDavidi nuSamweli inga navakuvwi,

³³ ve mulwitiho vahakonzyʼinsi zya vamwene, vahavombʼizya vugolosu, zihavinzila zizyo zyʼuMulungu afinzile kuli vuvo, vahaṿumbatizya amalomu ga nsama,

³⁴ vahazimwʼamilo ga mwoto, vahapona kuvwembe vwa shipanga, vahagomʼamaha muvuyeyevazu, vahasimpa muvulugu, vahazishimbizyʼimpuga zya valugu.

³⁵ Avantanda vahaposhela avafwe vavo ve vazyusile. Avamwavo nyene ve vahavizizya niṿijela ṿwa kuvayimṿizyʼa-vantu, nkandi vatahenyelezya ukutavulwa, shʼavene vahati tuhafishe kuvuzyuha uvulusyʼuvwinza.

³⁶ Avamwavo vahalingwaga mumusamu, nakumfwimbo Zye vahasyempwaga, nakumanyololo namujela.

³⁷ Vahatinzwaga namavwe, vahadumulwaga numusumeni, vahalingwaga, vahafwa kushipanga, vahayeluhaga lwe vazwaye inguvo zya ngʼonzi ninguvo zya mbuzi, vasovelilwe iṿintu, vahahamantanilwa, avantu vahavavombelagʼimbivi.

³⁸ Insʼino yitahondeye ukuva navo avantu vanava. Vahayeluhaga mulwugwa namumagamba namuninga namumpaho zya nsi.

³⁹ Ilelo vonti vanava vʼulwitiho lwavapeleye ukuyanjilwa ahinza, ve zitavinziye zizyo zyʼuMulungu afinzile,

⁴⁰ shʼatusavuliye nzilʼiswe hamo ahalusyi, ukuti avene vatatuleshelelaje ukuvufishilʼuvulunjisu.