VaHebuli 10 - Tesitamenti Umupwa 1965

Imputile ya Chilisiti yipwaniye pazya mputile zya munkomelezyo zya Musa

¹ Shʼinkomelezyo shali shinzyunguli sha nyinza zye zikwinza, te shati sha zizyo mwe zivaliye nalyoli, mwe mumwo izyenʼinkomelezyo zitamanyilʼukuvapʼuvulunjisu nalumo vuvo ve vakufinjilʼimputile shima pamwaha shisitakuleha,

² inga zye zyavapangʼuvulunjisu amwe pe nkandi vatalesile ukufinjilʼimputile, shʼavavombezi ve vazelufilwe lwoka lwene pe nkandi vatakuyilola uvutalamalandu munyenyezyo zyavo?

³ Izyene ziyipezilʼukuva zya kuyikumbusya mumwo uvutalamalandu shima pamwaha,

⁴ shʼamavanda ga nkambaku naga vasavwe gatali namaha aga kwefwʼamalandu.

⁵ Mwe mumwo lwʼa-kwinza munsʼumʼuwene pʼakuti: Imputile niṿwa kukuletela iwe utakasime, we muvili nyene wʼunkonzezizye;

⁶ nimputile zya kulungulizya zyonti nimputile zya pavutalamalandu ntali nuluseshelo muli zizyo.

⁷ Pe nkati: Yenya, ninzile, inza she zizyo njanzilwe mwa kalata, ukuti inzivombaje zyʼukasimʼiwe we Mulungu.

⁸ Lwʼatalisile ukuyanga atili: Imputile niṿwa kukuletela iwe nimputile zya kulungulizya zyonti nimputile zya pavutalamalandu zyʼutakasimʼiwe, havili utali nuluseshelo muli zizyo, Zye vakuzileta ukulandata munkomelezyo;

⁹ havili ahonjezya pupo nilya kuti: Yenya, ninzile ukuti inzivombaje zyʼukasimʼiwe, we Mulungu. Akuzimanjizya intanzi ukuti azyimihaje izya vuvili.

¹⁰ Mulukasamo lunulu tupezilwʼuvufinjile mumputile ya muvili wa Yesu Chilisiti yʼayifinjiye lwoka lwene.

¹¹ Havili avashiputo vonti vakuvomba shima amanda gonti uvuvombezi vwavo, vakuvuyizya ukufinjila imputile zizyo havili havili, Zye zitamanyile ukwefwʼamalandu.

¹² Uwene nyene lwʼafinjiyʼimputile yoka yene iya shimashima pazya malandu, pʼahavalʼukutendama kumuhonʼumulilo wa Mulungu.

¹³ Ilelo pʼuwene akwenyelezya pupo ukuti: avalugu vakwe valivikwa ukuva hatengo ha kuviha pupo iṿinama ṿwakwe.

¹⁴ She mumputile yoka ahavalunjisya shima vuvo wʼavapiyʼuvufinjile.

¹⁵ She wope nuMupepʼuMufinjile akutuvuzya zinizi, akuzihomeshezya lwe suti ayanga ati:

¹⁶ Ulu lwe lwitinkano lwe ndiyitinkana navo lwe gashilinkinʼamanda gugo, lyʼakuyangʼuMwene, ndivihʼinkomelezyo zyane mumoyo gavo, havili ndizisimba munsivo zyavo,

¹⁷ namalandu gavo nuvusitankomelezyo vwavo ntaliṿikumbuha nalumo.

¹⁸ Apene lwenga ṿiswililwe ṿiniṿi, pe Zyope nimputile zya kufinjila pazya malandu zyasila.

Izya kugomwa amaha ninsoshe

¹⁹ Ilelo mwe vamwitu, she tuli nuvusansamusu mumavanda ga Yesu ge gatwiguliye pavwinjililo vwa kwinjilila pavufinjile,

²⁰ muvupwa atupeleyʼidala ipwa lya vulanzi lye lipulunkinye muvwizigo vwa mwenda, nkutahʼumuvili wakwe uwa vuntu;

²¹ she tuli nawo uwashiputʼumupiti wʼavisilwe panyumba ya Mulungu,

²² mwe mumwo tupalamile lelo swe va moyo ga vwanalyoli, swe lutuhozilʼulwitiho, swe vamoyo ge gasansilwe uvusansilwa vula vwe vukuzimanjizya inyenyezyʼimbivi, swe tugezile mumuvili naminzʼamazelu.

²³ Twumishizyaje ukuhomeshezyʼulusuvilo lwitu shisitakuyugumbana, she mutungamu uwene wʼafinzile ulumfingwi lunulu kulʼiswe.

²⁴ Tusungane, tusunchilizanye kushikunzi nakumbombo zyonti inyinza.

²⁵ Tutagalushilaje kuluhomano mwe tukuvungana, inza she vamo vavelezinye, nkandi tukumbusanyaje iswe, Zye tupitilizyajʼukuvomba inza ṿwe muliwenyi isiku ukuti likupalamila.

²⁶ Shʼinga tukutalʼamalandu umwenzo lwe tuposheleye uvumanyinsanyi vwa vwanalyoli, pʼitalipo imputile iyamwavo pazya malandu gitu ndali,

²⁷ nkandi she shitetemwi she shikwenyelezya kuvulanzi nuvuhalazu vwa mwoto wʼakwinzʼukuvalya vonti avasufanyi.

²⁸ Umuntu wonti wengʼazisufinye inkomelezyo zya Mose wʼahafwa shisitalupepelezyo kuvwahome vwa vantu vavili pamo vatatu.

²⁹ Imwe vuli lelo lwe mukusiva, valipela poshi ukusundwʼisunde ilusyi uvuvivi venga vamuhanyilʼuMwana wa Mulungu niṿinama, ve namavanda ga lwitinkano vagayanzilʼukuva ga vwelele, ge muli gugo vayipezilʼukuva vafinjile, nuMupepo wa vwila vamutonilʼamatona.

³⁰ She tumumanyilʼuno wʼatili: Ululanduzyo lwane nene, ndigalushizya pupo nene, havili: UMwene alilonga avantu vakwe.

³¹ Mumwamu umupelanahavwila munyove zya Mulungu inga we muntu ugwiliye mumwo.

Insoshe zya kujendelezya ukugoma amaha

³² Mukumbuhaje amanda ga lulwo lwe mwaposhelʼuluhozyo, muhayimbaga muvulugu uvwinji vwe vuhavapelelaga uvuhamantanilwa,

³³ lwe muhajimbaga indigo nuvuhamantanilwa, ṿwe ṿwavapezilʼukuva mwe hantu aha kusukumila mumwo avantu vonti, muli zizyo muhayipelʼukuva mwe vamwavo va vala ve vahajendaga ulujendo lunulu.

³⁴ She nukuvapepelezya mwavapepelezizye ava mumunyololo, havili muhaseshela lwʼavantu vakusampʼiṿwinyu, she mwamanyile ukuti imwe muli nishuma ishilusyʼuvwinza she shitakusila nalumo.

³⁵ Kwe ndali ukuvutaga lelo uvutungamilo vwinyu, vwe vuli niṿwa kuvalipilʼiṿipiti.

³⁶ She suti pe pakuti muzyihajʼumulaha, ukuti lwe mwavombʼulukasamo lwa Mulungu muposhelaje ulumfingwi lwʼavafinjiye.

³⁷ She pasyaye pansi nkani, pʼaliyinza wuyo wʼakwinza, atalihava.

³⁸ Ilelo umuntu wane wengʼuvugolosu vwakwe vufumile mulwitiho, wʼalilandila, nkandʼuno wengʼakuyitetela, wʼumwoyo wane atakumushela.

³⁹ Iswe nyene te swe va kuyitetela ve venyizye kuvutupulwa ndali, nkandi swe va lwitiho, swe twenyizye kuvupokwa vwa vulanzi vwitu.