VaHebuli 1 - Tesitamenti Umupwa 1965

Izya kutaliha

¹ UMulungu we hali ayanzile apinji namumihʼaminji muvakuvwi kuvatata vitu,

² we munsiku zya kumpelela shinishi ahayanga kulʼiswe muMwana, wʼamuvisile ukuva mupwanavupwano vwa ṿwonti, havili we muli wuyo ahayipelʼinsi.

³ Uwene we vulangalizu vwa vumwamu vwa Mulungu, shati sha wuyo mwʼavaliye ula, mwizwi lya maha gakwe aṿipezile ṿwonti ukuva, lwʼayipezilʼukuva luzelufwo lwa vutalamalandu vwitu, pʼahavala ukutendama kumuhonʼumulilo wa Vuhatavupiti muvutunyusu.

⁴ Uwene ahavalusya nave vahavizya uvupiti, inza ṿwʼizina lyʼalipwanile lili payo kuli vuvo.

UMwana wa Mulungu mupiti kuvahavizya

⁵ Shʼali kwi uhavizya wʼamuvuzizye lumo ilya kuti: We mwana wane iwe, ine nkupafile umusanyʼuno? havili ilya kuti: Ine njipezilʼukuva ne yise, uwenʼayipezilʼukuva we mwana wane?

⁶ Nohavili lwengʼayinzilʼukumwinjizya uhatote munsʼino mwe vasamiyʼavantu, pʼakuti: Vontʼavahavizya va Mulungu vaputaje kukwakwe.

⁷ Havili kuzya vahavizya akuti: Wʼakuvapelʼavahavizya vakwe ukuva mpepo, navanyamata vakwe ukuva milo ga mwoto.

⁸ Ilelo kuzya Mwana akuti: Ishitengo shaho sha vumwene, we Mulungu, she sha shima, havili nindisa impelavugolosu ye ndisa ya vumwene vwaho.

⁹ Ukunzitʼuvugolosʼiwe, uvupasitʼuvwilankomelezyo. Mwe mumwo we Mulungu uMulungu waho, akupasilʼamafuta zya luseshelo ukulusya kuvamwinyu vonti.

¹⁰ Havili akuti: Kuvwando, we Mwene, waye ulwalo lwa nsi, yope niya kumwanya mbombo ya nyove zyaho.

¹¹ Izyene ziliyomoha, nkandʼiwe ulipo shima. Ṿwonti ṿilikulupa fwe ngati shizwalo.

¹² Ulizizinga fwe ngati mwendʼumutote, pe ṿijende nukwanduha, nkandʼiwe wewe wuyo shima, gope namanda gʼukulandila gatakusililishila.

¹³ Wʼali kwi uhavizya wʼamuvuzizye lumo atili: Tendamaga kumuhono wane umulilo, uhafishe pupo pʼavalugu vaho ndivapela ukuva hatengo ha kuviha pupo iṿinama ṿwahʼiwe?

¹⁴ Amwe vonti te mpepo imbombezi Zye zitumilwe ukuvavombela vuvo ve vakupwanʼuvupokwa fwe ngati vupwano?