VaEfeso 6 - Tesitamenti Umupwa 1965

¹ Mwe vanʼimwe, muvasajilʼavapafi vinyu mwa Mwene, she zye ngolosu zinizi.

² Ushindishe uso nuvinyu; lwe lulajizyʼulutanzi lunulu lwe luli nulumfingwi,

³ ukuti uyizyajʼahinza pamwanyʼipa nukulimuha nkani.

⁴ Namwe mwe vayise, mutavasambulanyajʼavana vinyu, nkandi muvalelaje munsambilizyo namuvumanyinsanyi uvufuma kwa Mwene.

⁵ Namwe mwe vazya muvasajilaje avapiti vinyu muvuntu, muvanyilaje nukutetema shisitakusiva inyinji mumoyo ginyu, inza she mukuhonzya kwa Chilisiti,

⁶ te mwe muvuzya vwa muminso vwelele inza she vakuhonzya ve vakwanzʼuvwankundwa kuvantu, nkandi muholanaje navanyamata va Chilisiti lwe mukuvomba numwoyo wonti zyʼuMulungu akasime,

⁷ muvavombele muvutehamu, muve fwe ngati mutakuvavombelʼavantu nkandi we Mwene.

⁸ Mumanyaje ukuti imbombʼinyinza yenga mwe vantu muvomṿile unʼiyakwe unʼiyakwe, yʼuMwene alivalipila, nashenga mwe vazya pamo mwe vasatushe.

⁹ Namwe vapiti vavo, muhonzyaje vovulo kuli vuvo. Muleshʼukuvogofwa. She mumanyile ukuti vanava poka namwe muli nuMwene wʼali kumwanya, wʼatakumusevelʼumuntu kuvwinza vwa kuminso.

Ishililo sha muchilisiti

¹⁰ Izya kuvumalilishilo lelo mwe vamwitu, mugomele mwa Mwene namumaha ga nguṿu zyakwe,

¹¹ Muyijelenkanye iṿilwilo ṿwa Mulungu ṿwonti mwe ṿivaliye, iṿwa kuvapelela apa kwimilila lwʼuMukwakwa akwanzʼukuvapota nuvugulugulu vwakwe.

¹² Shʼuvulugu vwe tukulwʼiswe vwe tutakulwa namavanda numuvili, nkandi navapiti, navamaha, navatilingansi va mushisi shinishi, inga nimpepo zya lombwa mumwanya.

¹³ Mwe mumwo muyijelenkanye iṿilwilo ṿwa Mulungu ṿwonti mwe ṿivaliye, ṿwe ṿivapelelaje apa kwimilila pisikʼigomu lila, pe mupotaje lwe mumalilizizye zyonti.

¹⁴ Musimpaje lelo, mufungaje uvwanalyoli fwe ngati lilamba; muzwalajʼuvugolosu fwe ngati shijela sha kuzigʼishifuva.

¹⁵ Izya kuyiyananya nzila mwIvangeli lya vwihalo zye zivanje ndyato zya muṿinama ṿwinyu.

¹⁶ Mulusyaje ukulema inkwela ya lwitiho iya kugazimanjizya amele gonti aga mwoto aga walombwa ula.

¹⁷ Havili mushiposhelaje ishisote sha pitwe she vwe vupokwa, nizwi lya Mulungu mulemaje, she lye shipanga sha Mupepo.

¹⁸ Zinizi zye muvombaje lwe mukuputa nukulambilizya shima mwa Mupepo. Zye mudamulilaje lwe mukuzyumishizya nkani nukuvalavila avafinjile vonti,

¹⁹ ukuti nane ndyagajʼizwi lwe nkuvusyʼilomu ukuvukumusya uvuzigizigi vwʼIvangeli shisitakutetema,

²⁰ lye ntumilwe ukulivombela namumunyololo, ukuti muli lilyo njangaje shisitakutetema inza she nkondeye ukuziyanga.

Izya kumpelela

²¹ Nkandi ukuti muzimanye namwe izyane, mwe mbaliye, uTikika uwamwitu unkundwa umuvombezi umutungamu mwa Mwene alivavuzyʼimwe zyonti,

²² we nkamutuma kumwinyu kuzinizi, ukuti muzimanyaje izya kumwitʼuku, havili ukuti avasuvizyajʼamoyo ginyu.

²³ Uvwila vuvanje navamwitu nishikunzi poka nulwitiho, ṿwe yikufuma kwa Mulungu uYise nakwa Mwene uYesu Chilisiti.

²⁴ Uvwila vuve navo vonti ve vamukunzite uMwene witu uYesu Chilisiti muvusitakuvola.