VaEfeso 5 - Tesitamenti Umupwa 1965

¹ Mulandatʼamiho ga Mulungu inza she vakuhonzya avana avankundwa,

² havili mujendele mushikunzi, inza she wope nuChilisiti atukunzitʼiswe, ahatufwila ahayipelʼukuva ṿwa kuninchilizya niṿwa kufinjila, ukuti avanje mfungʼinonu kwa Mulungu.

³ Uluvembu nyene nuvuhandamanu vwonti nuvuluṿu, ṿwe mutaṿitahaje namazina imwe, inza ṿwe zivahondeyʼavafinjile.

⁴ Mutazitahaje zye zilʼumwiho ukuyanga mwilomu izya vuwelewele nizya mfuzyo zye zikwazya, zye zitakuhondela, nkandi muzitahaje zye zya lusalifwo.

⁵ She zye muzimanyile izya kuti umuvembu numo numuhandamanu numupapilaṿwonti, we munyamata wa malungʼaganji, atalipwanʼuvupwano vwa shinamwene sha Chilisiti nisha Mulungu.

⁶ Numo atavahopaje namazwi ge gali vwelele, she zye zizyo zikuvaletelʼavana va lusufanyo umulaha wa Mulungu.

⁷ Ilelo mutayipelaje ukuva mwe vamwavo navo.

⁸ She lulwo pe mwali mwe shisi, nkandi shinishi pe mwe luhozyo mwa Mwene. Shinishi pe mujendaje inza she zihondeye kuvana va luhozyo.

⁹ Shʼulwenʼulusanga lwa luhozyo luli muvwinza vwonti namuvugolosu namuvwanalyoli.

¹⁰ Muzilingajʼahinza muzimanyaje zye zihondeye kwa Mwene.

¹¹ Mutavombelanaje nimbombo zya mushisi zye zitakuhomʼinsanga nazimo, nkandi mulusyaje ukuzimenelezyʼapazelu.

¹² She zye vakuzivomba kukwilʼavene, zye zikuva zya nsoni ukuziyanga.

¹³ Zyonti nyene lwe luhozyo lukuzimenelezya, pe zikuvoneha apazelu. She zyonti zyenga zilolesile apazelu Zyope luhozyo.

¹⁴ Mwe mumwo likuti: Damulaga wʼukasitʼutulo, uzyuhaje kuvafwe, pʼuChilisiti alikuhozezya.

¹⁵ Mwandaje lelo musimishizyajʼahinza ulujendo lwinyu, mutavanje fwe ngati mwe vasitanjele, nkandi fwe ngati vanjele.

¹⁶ Muyisenganyaje shima ukuvombʼahinza penga palolesile apa kuvomba yimo, shʼamandʼiga mavivi.

¹⁷ Mwe mumwo mutavanje mwe vawelewele, nkandi mulumanyinsanyaje ulukasamo lwa Mwene ṿwe luli.

¹⁸ Kwope nukuholwa mutaholwajʼipele, shʼukuholwʼipele kukupelʼuvupopo, nkandi mwizulaje we Mupepo.

¹⁹ Lwenga mukwizya pe muyizizyaje nazye nyimbo zya kuputa nizya kutima nazye mukwata mwa mupepo. MumwimbilajʼuMulungu, mumuhomelaje namapango mumoyo ginyu.

²⁰ MumusalifwajʼuMulungu uTata shima kuli ṿwonti mwizina lya Mwene witu uYesu Chilisiti.

²¹ Mukonzelanaje mwe vuvo vatupu she mukumunyilʼuChilisiti.

Ukulandila kwa muchilisiti ninyumba yakwe

²² Avantanda vakonzaje kuvalume vavo inza she vakukonza kwa Mwene.

²³ Shʼumulume lye litwe lya mushi, inza she wopʼuChilisiti litwe lya shivanza, wʼuwene we muposhi wa muvili.

²⁴ Inza shʼishivanza shikonzile kwa Chilisiti, navantanda vahonzyaje vovulo ukukonza kuvalume vavo muli zyonti.

²⁵ Namwe mwe vanaṿuli, muvakundajeʼavashi vinyu, inza she wope nuChilisiti ashikunzite ishivanza, ahashifwila,

²⁶ ukuti ashipelelajʼuvufinjile pala pʼahashizelufwaga naminzi mwizwi,

²⁷ ukuti uwene ayimishilʼishivanza ishimwamu ishisitamazota nagamo, ishisitamankunya nagamo, ishisita natumʼutunji twe tuli fwe tutwo, nkandi shive shifinjile ishisitaṿilema.

²⁸ She pakuti vahonzyaje vovulo vope navanaṿuli, vavakundaje avashi vavo fwe ngati mavili gavo vuvo. Shʼuno wengʼamukunzite umushi wakwe pʼayikunzite wuyo.

²⁹ She numo atawupasite nalumo umuvili wakwe, nkandi akuwulelʼiṿintu nukuwuyananya, inza she wope uChilisiti akuhonzya kushivanza,

³⁰ she swe tuntu twa mumuvili wakwe.

³¹ Mwe mumwo umuntu akumuleha uyise nunyina, akwumishizya kumushi wakwe, ilelo pe ve vavili vanava vakuva muvili woka mwene.

³² Izya vuzigizigi zinizi zye mpiti nalyoli. Nkutaha izya Chilisiti nizya shivanza shakwe.

³³ Namwe pakuti muvakundajʼavashi vinyu, unʼuwakwe unʼuwakwe, inza she muyikunzite mwemwe mweka. Uwenʼumwantanda we pakuti amunyilajʼumulume.