VaEfeso 4 - Tesitamenti Umupwa 1965

Ulwito lwa Mulungu lukuti tuve poka swenti

¹ Pe lelo nkuvatontela ne mukungwa mwa Mwene ukuti muhondele mulujendo muli zizyo zye mwisitwe lwʼavisite wuyo.

² Muyiṿizyaje, muvanje mwe vatelefu, mwolovelane nukwimilana mushikunzi.

³ Muyikungule ukuva shima poka mwa Mupepo, vuvakunjilinkanyaje vwe vwihalo.

⁴ She mwe muvili woka mwene, mwe Mupepo woka, inza she lwope nulusuvilo lwinyu lwe mwisitwe luli lwoka.

⁵ UMwene woka, ulwitiho lwoka, nulwozyo lwoka.

⁶ UMulungu woka mwene, uYise wa vonti, wʼavakonzizye vonti, wʼakuvombela nukusamila muli vonti.

⁷ Nkandi swenti atugavinyʼuvwila unʼuvwakwe unʼuvwakwe, atulinjiye pashifinjilo shʼatulinjiyʼuChilisiti.

⁸ Lye lilyo litili: Lwʼazuṿile kumwanya, pʼagomilʼavagomwa vakwe, avantu ahavapʼiṿwa kuvapa.

⁹ Ilyene ilya kuti “azuṿile” lye likuti vuli inga litakuyanga ukuti vovulo atalisilʼukwiha ukuvala kunsi kungolongo?

¹⁰ Uwene wʼahiha we wuyo havili azuṿile kumwanya, apitiliye avazilʼukufiha kuya kumwanya nkani, ukuti akwilaje muli ṿwonti.

¹¹ We wuyo avapezile vamo ukuva vapositili, vamo vakuvwi, vamo vakumusyi vʼIvangeli, vamo vadimi, vamo vasambilizi;

¹² ukuti vavayananyʼavafinjile, imbombo ya vuvombezi yivombwaje, ukuti umuvili wa Chilisiti azengwaje;

¹³ ukufiha pupo pe swenti tulivufishila uvwoka vwa lwitiho nukumumanyinsanyʼuMwana wa Mulungu, ukuti tulunjishe muvuntu, ukuti tuvanje nishifinjilo ishikuzi sha vulunjisu vwa Chilisiti.

¹⁴ Naswe ukuti tulehaje ukuva swe vana vansi ve vakuyugumbana nukwelela kunkungu zyonti izya nsambilizyo kuvusheṿu vwa vantu, namuvugulugulu uvupelavukwalanzi;

¹⁵ nkandi tulandate zye zya nalyoli mushikunzi, tukulaje, tumalilizyaje zyonti mwe mumwakwe wuyo uChilisiti, we litwe.

¹⁶ Shʼumuvili wonti wʼayisendenkinyʼutuntu twonti, wʼayisopenkinye nimpingu zyakwe ukusenda mwe mumwakwe wuyo amaha ga kukula, alandite mumwo mwe tukuvombelʼimbombo yavo utuntu twonti, ihʼiyakwe ihʼiyakwe, akuyizenga weka nukuyizenjela mushikunzi.

Ukulandila ukukali nukuputa

¹⁷ Ilelo zizyo nkuvavuzya nkuvahomeshezya mwa Mwene ukuti muleshʼukujenda inza she vakujendela navakunzi muzya mupumpu wa nsivo zyavo.

¹⁸ Vʼishisi shivahomile injele zyavo, ve vadumulilwe kuvulanzi vwa Mulungu, she vatamanyile nazimo, kwe kuvugomu vwa moyo gavo.

¹⁹ Avene she vasufilʼulusivo pe vayitazile muvusitakuyisunjilila, vakuvombʼizya vuhandamanu vwonti nuvuluṿu.

²⁰ Mutamusambiliye uChilisiti vovulo,

²¹ inga nalyoli mwamwiṿuye wuyo, inga mwalanganizilwe mumwakwe wuyo inza ṿwʼuvwanalyoli vuli mwa Yesu,

²² ukuti muzulajʼulujendʼulutanzi lwa muntʼumukali wʼananjisile mumpapilo zya shifumbo;

²³ ukuti mwanduhaje mumupepo wa nsivo zyinyu,

²⁴ muzwalʼumuntʼumupwa wʼapezilwe kushati sha Mulungu muvugolosu namuvufinjile vwa vwanalyoli.

Indajizyo zya manda gonti

²⁵ Mwe mumwo muleshʼukuyangʼizyʼilenga, mwenti muyangaje izya nalyoli, uno nuwamwavo uno nuwamwavo, she swe tuntu mwe tuvaliye uno aha wamwavo uno aha wamwavo.

²⁶ Inga mukuṿitwa pe mutatalajʼumulandu. Mwandaje izuva litahaswe lwʼumulaha winyu ashili ukusila.

²⁷ Umukwakwa mutamupanje apa kuhanya.

²⁸ Uno wengʼayiṿile yimo, wʼatavuyizyaje umwiva havili, nkandʼayikungulaje ukuvomba zimʼinyinza ninyove zyakwe, ukuti avanje naṿwo iṿwa kumupa wengʼate naṿwo naṿimo.

²⁹ Amazwi amavozu nagamo gatafumaje mwilomu lyinyu, nkandi ge minza geka ge gakugazenga amoyo ga vamwinyu lwenga mwazile pakuti muyanje zimo, ukuti gavanje ga vwila kuli ve vakwiṿwa.

³⁰ Mutamuswimili-zyajʼuMupepʼuMufinjile wa Mulungu, shʼuMulungu avavisilʼimwe ishimanyilo mumwakwe wuyo isha kuvamanyilʼimwe pisiku lya vuhombozi.

³¹ Mwefwe mumwinyʼumu umulaha wonti, nimbushilano zyonti, nuvuhalazu vwonti, nahalanga honti, numusamu wonti poka nuvunyala vwonti.

³² Muvanje mwe vatonsu kuvamwinyu, muvapepelezyaje, muswilane inza she wope nuMulungu avaswiliyʼimwe mwa Chilisiti amalandu ginyu.