VaEfeso 3 - Tesitamenti Umupwa 1965

UPavuli mumbombo yakwe akulolesyʼizya vuzigizigi vwa Mulungu

¹ Zye zizyo ne Pavuli njipezilʼukuva ne mukungwa wa Chilisiti Yesu, nkuvayimbila mwenemwe mwe vakunzi—

² inga mwiṿuye uluyananyo lwa vwila vwa Mulungu, lwʼampiyʼine ukuti mbaletelʼimwe.

³ Shʼizya vuzigizigi zinizi zyʼankupuliyʼine inza she zizyo nkavasimbilʼulutanzi mumazwi mansi.

⁴ Mwe inga mukuzivazya, pe mulimanyʼahinza injele zyane zye ndi nazyo muzya vuzigizigi vwa Chilisiti.

⁵ She zizyo mumaha amakali avana va vantu vatapempulilwe, inza she zikupulilwe shinishi kuvapositili vakwe avafinjile nakuvakuvwi mwa Mupepo.

⁶ Mwe mumwo navakunzi vayipezilʼukuva vapwanilavupwano vovulo numuvili woka mwene vovulo navalilani muli zyʼuMulungu afinzile ulumfingwi mwa Chilisiti Yesu mumbombo zyʼIvangeli,

⁷ lyʼine mpezilwe ukuva ne muvombezi wakwe mushikunjilwa sha vwila vwa Mulungu vwe mpelilwe muvuvombezi vwa maha gakwe.

⁸ Nene ne mbalusizye vontʼavafinjile uvwahayisye, nʼampiye uvwila vunuvu uvwa kuvavuzyʼavakunzi uvudumbwe vwa Chilisiti, vwe numʼumuntu atavusinkamizizye mwe vuvaliye,

⁹ havili ukuti mbahozezyajʼavantu vonti, vamanye uluyananyo lwa vuzigizigi vwe vwazyihamaga shima mwe mwa Mulungu uMupelaṿwonti ukufuma he hali,

¹⁰ ukuti ishivanza shivavuzyaje navasongo navahombe va kumwanya uvumanyinsanyi vwa Mulungu vwe vuli mumavila mumavila.

¹¹ Zizyo zyʼazilulumiye nzila he hali, zyʼazivomṿile mwe mwa Chilisiti Yesu uMwene witu,

¹² we muli wuyo twigulilwe ishilyango shisitakunyila she tumutungamiye wuyo lwe tumwitisile.

¹³ Zye zizyo nkulava ukuti mutasilikitwaje mumayimba ganʼiga ge nkuvayimbilʼimwe, ge gayipezilʼukuva lushindiho lwinyu.

Uluputo lwa kuzisinkamizyʼizyʼIvangeli

¹⁴ Zye zizyo nkupintʼiṿizwi ṿwane nkumusugamililʼuTata,

¹⁵ wʼuluho lwonti ulwa kumwanya nulwa pansi lukutakwa mwe mumwakwe wuyo izina,

¹⁶ ukuti ukulandata muvudumbwe vwa vumwamu vwakwe avapanjʼamaha aga kugomwʼumuntu wa muhati mwe mwa Mupepo wakwe,

¹⁷ ukuti mulwitiho uChilisiti asamilaje mumoyo ginyu, musimpajʼamazi mushikunzi nukuyibanila,

¹⁸ ukuti muvusinkamizyaje poka navafinjile vonti uvubaba nuvutali nuvutunyusu nuvwivizu,

¹⁹ ukuti mumanyaje ishikunzi sha Chilisiti she shilusizye nzila uvupiti vwa vumanyinsanyi, ukuti mulunjihaje muvulunjisu vwonti uvwa Mulungu.

²⁰ Uwene nyene wʼali namaha aga kuvomba nkani ukupitilizya kuli ṿwonti ṿwe tukulava naṿwe tukusiva, inza she ziholine namaha ge gakuvomba mumwitʼiswe,

²¹ wʼashindikwaje mushivanza namwa Chilisiti Yesu muvulandatano vwa nkolo zyonti shimashima. Amen.