VaEfeso 1 - Tesitamenti Umupwa 1965

Umulamu

¹ UPavuli umwapositili wa Chilisiti Yesu, nʼaninjizizye we Mulungu palukasamo lwakwe, nkuvalamuha mwe vafinjile mwe muli mw-Efeso namwe mumwitisile uChilisiti Yesu,

² nkuti Uvwila nuvwihalo vwe vukufuma kwa Mulungu uTata swenti nakwa Mwene uYesu Chilisiti vuvanje namwe.

Izya kumutundumihʼuMulungu

³ TumutimajʼuMulungu uYise wa Mwene witu Yesu Chilisiti, we swenti swe tuli mwa Chilisiti atulosite muvulote vwonti vwa mumupepo uvufumakumwanya,

⁴ Shʼuwene atusavuliye mwa Chilisiti, lwʼinsi yishili nukwalwa, ukuti tuvanje swe vafinjile avasitamazota kuminso kukwakwe.

⁵ Uwene mushikunzi ahatusavula nzila ukuti mwa Yesu Chilisiti mwe tuhave swe vana vakwe uwene, inza she zizyo akasime palukasamo lwakwe,

⁶ ukuti uvumwamu vwa vwila vwakwe vuvanje nulutimo vwʼatupiye muvwila mwe mwa nkundwa wakwe.

⁷ Muli wuyo tuli nuvuhombozi vwe gatuhomboyʼamavanda gakwe, nuvuswila vwa nchilanyo zyitu, ukulandata muvwila vwakwe vwe vutangaye,

⁸ wʼahatulafushizyʼiswe munjele zyonti namuvumanyinsanyi,

⁹ wʼahatumanyisya izya vuzigizigi vwa lukasamo lwakwe, zyʼalulumiye mumwoyo wakwe,

¹⁰ ukuti inga lumo zihinze izya kuyiyananizya lwe ginzilʼamaha gakwe, lwe zyonti zyavunganishilwa poka mwa Chilisiti, ṿwonti iṿwa kumwanya kula niṿwa pansi ipa. Muli wuyo,

¹¹ wʼahatupela ukuva swe vahatavupwano inza shʼalulumiye he hali nukutusavula, we wuyo wʼakupela zyonti mwʼakasime weka palukasamo lwakwe,

¹² ukuti tuvanje swe va kuvutundumishilʼuvumwamu vwakwe, swe twanzite nzila ukumusuvila uChilisiti.

¹³ Namwe muli wuyo mwiṿu-yʼizwi lya nalyoli, intumʼinyinza ya vupokwa vwinyu, havili mumwitisile wuyo nukuposhelʼishimanyilo sha MupepʼuMufinjile we pe pakuti ayinzaje,

¹⁴ shʼuwene we shipinjishilwa sha vupwano vwitu, she shikutusimishizya ukuti tukutavulwa ukuva swe nsavo yakwe, ukuti uwene avanje nulushindiho lwa vumwamu vwakwe.

Uluputo lwa kumumanyinsanyʼuMulungu. Amaha ga Mulungu palolesile muvuzyuha vwa Chilisiti.

¹⁵ Mwe mumwo nane lwe niṿwa ulwitiho lwinyu lwa kumwitihʼuMwene Yesu, havili nishikunzi she muvakunzitʼavafinjile vonti,

¹⁶ pe ntakutuzya ndali, shima nkusalifwa pazyinyu nukuvakumbuha mumputo zyane,

¹⁷ ukuti uMulungu wa Mwene witu uYesu Chilisiti, uTata wa vumwamu vwonti, avapanjʼimwe umupepo wa vumanyinsanyi nuwa kuzikupula izya vuzigizigi,

¹⁸ ukuti avahozezyajʼaminso ga moyo ginyu, mumanyaje ulusuvilo lwa lwito lwakwe ṿwe luli, havili uvudumbwe vwa vumwamu vwa vupwano vwakwe ṿwe vuli muvafinjile,

¹⁹ gope namaha gakwe ge gakuvomba mumwitu iswe swe twitisile ukuti mugamanyaje ukuva mapiti malusyi nzila ge gakuvoneha mumbombo zya maha gakwe ge mapiti,

²⁰ gʼavombeye mwa Chilisiti lwʼahamuzyusya kuvafwe, lwʼahamuviha kumuhono wakwe umulilo kumwanya kula,

²¹ pala pʼahamuzuṿwa ukushila kuvusongo vwonti, nakuvuhombe vwonti, nakumaha gonti, nakuvumwene vwonti, nakumazina gonti ge gakutashilwa mwe gavaliye, te mwe munsi yinino vwelele, nkandi namuli yila yʼiliyinza vovulo.

²² Vwonti amukonzezizye wuyo kuṿinama ṿwakwe, amupezilʼukuva litwe lya ṿintu ṿwonti mushivanza,

²³ she we muvili wakwe, kwe kukwila kwʼuno wʼakwiliye mwonti muli zyonti.