uTiiti 2 - Tesitamenti Umupwa 1965

Ulujendo lwa shichilisiti namwe lusimfile

¹ Nkandʼiwe uyangaje Zye zihondeye munongwʼimpelavulanzi.

² Avanaṿuli avasongo vateshelʼiṿintu, vavanje vamwamu, avasilimusu, avapuma mulwitiho namushikunzi namuvuṿindilamalema.

³ Vope navantanda avasongo vavanje vafinjile mulujendo, vatavanje vakwalanzi, vatavanje vazya va kungʼwelʼipele ilyinji, nkandi vavanje vasambilizi va nyinza,

⁴ ukuti vavasunde navantandʼavalindu ukuti vakundaje avalume navana vavo,

⁵ vavanje numushinzi, avazelu mumoyo, ve vakuvomba munyumba zyavo nukuyikonzya kuvalume vavo, ukuti izwi lya Mulungu litasamulwaje.

⁶ Vope navajaha vovulo uvavuzye vavanje numushinzi.

⁷ Muli zyonti iwe uyipelajʼukuva we wa kwenyelezya mumwo imbombʼinyinza, namunsambilizyo ulolesyaje uvusitashipuva nuvumwamu,

⁸ izwi lyaho livanje lipuma shisitakuyanjilwa vuvi, wengʼakulwa naswe pe pakuti avanje ninsoni lwʼakupotwa ukutuyangʼiswe imbivi.

⁹ Avazya uvavuzye vakonzaje kuvapiti vavo muli zyonti, vahondelaje kuminso gavo, shisitakuvadalisya,

¹⁰ vativaje, vavanje vatungamu muvutungamu vwonti, ukuti vazinonelezye insambilizyo zya Muposhi witu uMulungu muli zyonti.

Zyʼavachilisiti valulumiye

¹¹ Shʼuvwila vwa Mulungu vwe vukuvaletelʼavantu vonti uvuposhi vulolesile,

¹² vukutusunda ukuti tuvuhanaje uvusitakumunyiluMulungu niṿipapilo ṿwa munsi, tulandilaje mumanda ga shinishi mumushinzi namuvugolosu namuvunyilaMulungu,

¹³ lwe tukugulilila Ulusuvilo ulupelavusangalusu nuvuvoneshelo vwa vumwamu vwa Mulungu umupiti havili uMuposhi witu uChilisiti Yesu,

¹⁴ wʼatufwiliye ukuti atutavuzyaje kuvusitankomelezyo vwonti, havili ukuti ayizelufizyaje uluho lwe nsavo yakwe nzila, lwa vantu ve vakuyikungula kumbombʼinyinza.

¹⁵ Zyʼuyangaje zinizi nukuvayinzya nukuvamenelezya namaha gonti. Numo atakupupusyaje.