uTiiti 1 - Tesitamenti Umupwa 1965

Umulamu

¹ UPavuli umunyamata wa Mulungu, umwapositili wa Yesu Chilisiti, ne wa kuluvombelʼulwitiho lwa vasavulwa va Mulungu muvumanyinsanyi vwa vwanalyoli vwe vukulandatana nuvunyilaMulungu,

² nulusuvilo lwa vulanzi vwa shimashima vwʼuMulungu umusitakuyangʼizyʼilenga ahatufinjila hali nkani lwʼamaha gashili nukuvazilwa,

³ we pisiku lyakwe alolesyʼapazelu izwi lyakwe nuvukumusyi vwe mpelilwe munyove, inza shʼandajizizyʼuMuposhi witu uMulungu.

⁴ Nkukusimbila we Titi we mwana wane nalyoli mulwitiho lwoka lwene lwe tuli nalwo: Uvwila nuvwihalo vwe vukufuma kwa Mulungu uTata nakwa Chilisiti Yesu uMuposhi witu vuvanje nawe.

Ukusevwa kwa vasongo va shivanza

⁵ Zye zizyo nakulesile mu-Kileti ukuti umalilizyaje ukuyananya zye zisyaye nukuvihʼavasongo avahatashivanza munkaya munkaya inza she nakulajizizye.

⁶ Umulemaje wengʼatayanzilwe nazimo, umulume wa mwantanda woka mwene, wʼatakuyangwa ilya vupopo nilya vusitakusajila.

⁷ Shʼubishopo pe pakuti avanje muzelu vwelele izya kumuyanga, alolehaje ukuva musungashuma wa Mulungu, wʼatakulandatʼulukasamo lwakwe wuyo weka, atavanje mupupusu ukuṿitwa, nga wushingʼwezi, nga wʼivo, iṿwa kulonka atalonkaje mwe muvifile.

⁸ Nkandi avanje mutesi, umukundavwinza, umusilimusu, umugolosu, umufinjile, wʼakuteshelʼiṿintu,

⁹ wʼakulema nkani izwi ukulandata munsambilizyo zya nalyoli, ukuti avanje namaha ga kuvasohʼavantu munsambilizyo impelavulanzi naga kuvamenelezya vuvo ve vakudalinkana nawo.

Avasambilizi vʼilenga

¹⁰ She valipʼavinji ve vatakuyikonzya, vakwata shaha utulumbe twa kupanga, vakuhopa navanji. Izyene zinizi valusizye nkani ava muvuvolwa.

¹¹ Ve pakuti umuntu avaṿumbatizyaje kwilomu. Avene vakuṿwalanganyʼinyumba yonti mwe zivaliye lwe vakusambilizya zye zilʼumwiho she vakwanzʼuvulonsi vwa nsoni.

¹² Woka muli vuvo, umukuvwi wavo, ayanzilʼatili: AvaKileti shima valumilenga, ṿikoko iṿihali, mahata gakulya kwe kulya.

¹³ Uvwahome vunuvu vwe vwa nalyoli. Mwe mumwo uvamenelezyaje uvapilile, ukuti vandushe vayipelajʼukuva vapuma mulwitiho.

¹⁴ Vatatejelezyajʼutulumbe twa vaYuda nindajizyo zya vantu ve vagunjiye uvwanalyoli.

¹⁵ Ṿwonti ṿizelu kuvantu ve vazelu. Nkandi kuvene avasitavuzelu nulwitiho ve naṿimʼiṿizelu, zihandamine insivo zyavo ninyenyezyo zyavo.

¹⁶ VakumutahʼuMulungu ukuti vamumanyile, nkandi mumbombo zyavo vakulegemuha. Vayipezilʼukuva ṿwa munyali, vakusufanya, vanamangusu kumbombʼinyinza zyonti.