Matayi 8 - Tesitamenti Umupwa 1965

Ukumupozyʼuzvamambombo

¹ Uwene lelo lwʼakwiha pigamba, pe vahamulandatʼavantʼimpugʼimpiti.

² Pe vahaga uwamambombo, ahapalamila kukwakwe ahamusugamilila ahati: Mwene ingʼukasime, pʼumanyilʼiwe ukumpozya.

³ PʼuYesu ahagolosyʼumuhono, ahamupalamansyʼumuvili ahati: Nkasime, polaga. Pʼahapola pupʼamambombo.

⁴ PʼuYesu ahamuvuzya ahati: Yenya lelo, utamuvuzyaje numʼumuntu, nkandʼuvalʼuyilolesye kuvashiputo, ufinjile huho hʼahomelezizyʼuMose, he havanje ha kumanyila mumwʼavene.

Ukupola kwa muvomyi wa mupiti wa vasikali

⁵ Ilelo lwʼakwinjila mu-Kapelinahumu, pʼumupiti woka wa vasikali ahapalamila kukwakwe ahalambilizya,

⁶ ahati: Mwene, umuntu wane ali muvulili kuhaya, avinilʼishulu, shikumuyimṿwa nkani.

⁷ Ahamuvuzya ahati: Nkwinza nkumuzuzuvushizya.

⁸ Uwenʼumupiti wa vasikali ahamula ahati: Mwene, ntahondeyʼine ukutʼiwe uyinjilaje munyumba yane. Yangagʼizwi lyoka vwelele, pʼakuzuzuvuhʼumuntu wane.

⁹ She ne muntu nane mbisilwe kuṿinama kuvapiti, nane ndi navasikali kuṿinama kumwane. Ilelo inga nkuyanga kuli woka nkuti: Valaga, pʼakuvala, kuwamwavo inga nkuti: Nzagaga, pʼakwinza, uwenʼumunyamata wane inga nkumuvuzya nkuti: Vombagʼahalivʼiha, pʼakuvomba.

¹⁰ UwenʼuYesu lwʼayiṿuye zinizi, pʼahasukumila ahavavuzya ve vahamulandata ahati: Nalyoli ulwitiho inzʼulu, lwe ntalwazile mwa Yisilayili umu.

¹¹ Nkuvavuzyʼine lelo nkuti: Valifuma nakuvutukulo vwʼizuva nakuvuswelo ve vinji ve vakwinzʼukutendama navaAbulahamu nuYisikaka nuYakobu ukulyʼiṿintu mushinamwene sha kumwanya.

¹² Nkandʼavenʼavanashinamwene ve valibunchilwa mushisi sha kuluvazu, mwe ziliva mumwo nkuta ntupu, mwe luliva mumwo nululumanyo lutupu lwa mino.

¹³ UYesu ahayanga kwa mupiti wa vasikali ahati: Iwe valaga ukwaga azuzuvusile inza she zizyo uyitisile wenewe. Pʼumuntu wakwe ahazuzuvuha pahavalilizyo huho.

Ukuzuzuvuha kwa nyinaṿwala wa Simoni navanji vamʼavinji

¹⁴ PʼuYesu ahafiha munyumba ya Peteli, mwʼahagʼunyina-ṿwala wa Peteli muvulili ninzegema.

¹⁵ Ahamulemʼumuhono, pʼinzegema yihamuleha. Pʼahavuha nukuvatelamishilʼiṿintu.

¹⁶ Ilelo lwe vwiliye shamazuva, pe vahamuletelʼavinji ve vali nimpepʼimbivi. Uwenʼimpepo zinizi ahazishimbizya nalye lizwi lyeka. Vonti nava ve vavinile ahavazuzuvushizya,

¹⁷ ukuti zilunjihaje zizyo zyʼayanzilʼuYesaya umukuvwi wʼatili: Uwene nuvupotwe vwitu ayivegazizye, nuvuyeyevazu vwitu anyatuye.

Ukulingwa kwa ve vali vavanje vasundikwa

¹⁸ Ayazile lelʼuYesu avantʼimpuga vamwimiliye vamuvisile pahati, pʼahahomelezyʼukulamba mwisyila lila.

¹⁹ Pe wokʼumumanyakalata ahapalamila kukwakwe ahati: We musambilizi, nkukulandata mwonti mwʼukujenda.

²⁰ UwenʼuYesu ahamuvuzya ahati: Izyenʼinyimba zili namashembo, Zyope ninyunyi zili niṿisanzo. UwenʼuMwanamuntu nyene wʼate napamo apa kusagamihʼitwe.

²¹ Uwamwavʼumusundikwa ahayanga nawo ahati: Mwene, undeshe suti imbale ukusyilʼutata.

²² UwenʼuYesu ahamuvuzya ahati: Ndandatagʼiwe, uvaleshʼavafwe vavasyilajʼavafwe vavo.

UYesu akupililʼusumbi ninkungu ukuti vitehame

²³ Pʼahazuva mwivoti, avasundikwa vakwe vahamulandata.

²⁴ Yenyi, usumbi ahalambana nkani namavilingwa gahadomoshela mwivoti. Uwene shʼakasitʼutulo.

²⁵ Pe vahinzʼukumuyinzya vahati: Mwene utupohaje tukulova.

²⁶ Uwenʼahati: Mukwogopa shonu mwe valwitihʼulupupusʼimwe? Pʼahavuha ahapililʼinkungu nusumbi, ilelo pe kuhategama vwelele.

²⁷ Avenʼavantu vahasukumila vahati: We muntu vulʼuno? Shʼinkungu nusumbi vikumusajila.

Avampepʼinkandamanu va mu-Gadaleni

²⁸ Ilelo lwʼavazilʼukufiha isyila lila, munsi ya vaGadaleni, pʼahahomana navantu vavili ve vali nimpepʼimbivi, ve vahafuma mumbipa. She valʼavahali nkani, navantu vapositwʼukutuha mwidala lilyo.

²⁹ Avene vahavilishila vahati: Tuli vuli naswe nawe we Mwana wa Mulungu? Uyinzilʼukutwizizya lwe pashili?

³⁰ Lyalipo lelo apatali pupo pilisyo idimilʼipiti lya nguluve.

³¹ Pʼimpepʼimbivi zihalambilizya kukwakwe zihati: Fwane ingʼukutufumwa pʼututumaje mwidimilo lya nguluve lila lelo.

³² Uwenʼahamula ahati: E, mwinjilaje. Izyene zihafuma, zihinjila munguluve. Pʼidimilo lyonti lihagalagatila kuluvambala, vahayitaga mwa sumbi.

³³ Avene ve vahadimagʼinguluve vahashimbila vahavala munkaya, vahazitangazya zyonti nazye zya vantu va mpepʼimbivʼiva.

³⁴ Pʼavantu inkaya yonti vahafuma, vahavalʼukumwenyʼuYesu. Ilelo lwe vamuwenyi pe vahalambilizya kukwakwe vahati: Uyepaje munsi yitʼumu.