Matayi 25 - Tesitamenti Umupwa 1965

Ishiholanyo sha valindʼishumi

¹ Pʼuvumwene vwa kumwanya vulive fwe ngatʼavamwali ishumi, ve vasenzitʼinyale zyavo, vahavuhʼukumutanganʼumusendamwantanda.

² Nkandi vasano vali vapukupuku, vasano vali ninjele.

³ Avapukupukʼiva inyale zye vahasenda, nkandʼamafuta ge vatahasenda.

⁴ Avenʼavanjele vahasenda namafuta munsupa poka ninyale zyavo.

⁵ Lwʼahaṿile umusendamwantanda, pe vahasupila vahakata nutulo vonti.

⁶ Ilelo pavusiku pahati pe lihavilishilwa ilya kuti: Yenyi, umusendamwantanda! Simuvushʼukumutangana.

⁷ Pe vahavuha vontʼavamwali vanava, vahayananyʼinyale zyavo.

⁸ Pʼavapukupuku vahavavuzyʼavanjele vahati: Simutupanjʼamafuta ginyu, shʼinyale zyitu zyamakuzima.

⁹ Avanjele nyene vahamula vahati: Ndali. She ngavanga pe gakusova swenti naswe namwe. Nkandi simuvale muyikalile.

¹⁰ Ilelo lwe vavazilʼukukala, pʼumusendamwantanda ahafiha, avene ve vayisenginye vahinjila nawo ukulyʼiṿwa pavusendelo, kushilyango kuhigalilwa.

¹¹ Pisinda pe vahinza vope navamwalʼavamwavo vala vahati: Mwene, mwene, utwigulile.

¹² Uwenʼahamula ahati: Nalyoli, nkuvavuzyʼine nkuti: Ntavamanyilʼimwe.

¹³ Mwe mumwo mudamule, she mutamanyile isiku nahavalilizyo.

Ishiholanyo sha ṿwuma

¹⁴ She zihonzizye fwe ngati zya muntu wʼakushula ukutali wʼahavita avanyamata vakwe, ahavaleshelʼiṿwuma ṿwakwe.

¹⁵ Woka ahamuleshelʼitalanta zisano, woka zivili, woka yoka, inza she vavaliyʼinjele. Pʼahavuha nzila ukushula.

¹⁶ Uwene nyene wʼaposheleyʼitalanta zisano, ahavalʼukuyitantanya, pʼahalonkʼizinji zisano.

¹⁷ Vovulo nuno waposheleye zivili, wopʼahalonkʼizinji zivili.

¹⁸ Uwene nyene wʼaposheleye yoka wʼahavala nayo, ahahana pansi, ahazyihʼulupiya lwa mwene wakwe.

¹⁹ Lwe padila nkani lelo, pʼahinzʼumwene wa vanyamata vanava, ahati: Simumbazizyaje.

²⁰ Pʼahapalamilʼuno wʼaposheleyʼitalanta zisano ahaziviha poka nitalantʼizyamwavo zisano ahati: Mwene, wampiyʼitalanta zisano, yenya, ndonsilʼizyamwavo italanta zisano.

²¹ Pʼumwene wakwe ahamuvuzya ahati: Hinza, we munyamata we mwinza we mutungamu. Wali we mutungamu panyinsi, nkukuviha pampiti. Yinjilaga kuluseshelo lwa mwene waho.

²² Wope nuno wʼaposheleyʼitalanta zivili ahapalamila, ahati: Mwene, wampiyʼitalanta zivili, ndonsilʼizyamwavo italanta zivili.

²³ Pʼumwene wakwe ahamuvuzya ahati: Hinza, we munyamata we mwinza we mutungamu. Wali we mutungamu panyinsi, nkukuviha pampiti. Yinjilaga Uluseshelo lwa mwene waho.

²⁴ Wope nuno wʼaposheleyʼitalanta yoka ahapalamila, ahati: Mwene, she nkumanyile ukuva we muntu we muhali, ukutondola namwʼutatoteye, ukuṿuna namwʼutapesile.

²⁵ Pe nkatetemʼine, nkavalʼukuzyihʼitalanta yaho. Yenya, alʼishi ishijela shaho.

²⁶ Uwenʼumwene wakwe ahamula ahati: We munyamata we muvivʼiwe we muhata! Wamanyilʼukuti nkutondola namwe ntatoteye, nkuṿuna namwe ntapesile?

²⁷ Pe wali nishonu lelo ukuvaninchilizyʼimpiya zyane ve vakuyitantanya? Shinishi lelo she ninzile pe nkwe nsendaje ishane nishilonkwa shakwe.

²⁸ Pʼahati: Simusendajʼitalanta yakwʼino, mumupanjʼuno wʼali nitalantʼishumi.

²⁹ She vonti ve vali naṿwo yimo, vakwonjelezelwʼumwonji ṿivatangalile. Avene nyene ve vate naho nahamo ve vakusompolwa nahuho he vali naho.

³⁰ Uwenʼumunyamatʼumuvivi nyene, mumutaje mushisi sha kuluvazu; Mwe ziliva mumwo zye nkuta ntupu nululumanyo lwa mino lutupu.

Isiku lya vulonzi

³¹ Apene nyene lwʼaliyinzʼuMwanamuntu muvupiti vwakwe navahavizya vakwe vonti, pʼalitendama pashitengo shakwe sha vumwamu.

³² Pʼavantu inkolo zyonti valivungana kuminso gakwe. Pʼuwenʼalivatapulanya inza shʼumudimi akuzitapulanya ingʼonzi ninduvi.

³³ Pʼingʼonzi aliziviha kumuhono wakwʼumulilo, izyenʼinduvi aliziviha kumumongo.

³⁴ PʼaliyangʼuMwene kuva kumuhono wakwʼumulilo aliti: Simwinzajʼipa mwe valotwa va Tata imwe, mupwanʼuvumwene vwʼuMulungu avayananizizye mwenemwe, atalisile pala pʼiyalizilwʼinsi.

³⁵ She lwe nali ninzala pe muhandetelʼiṿwa kulya, lwe nali nishinyoto pe muhangʼwesyʼaminzi, lwe nali ne mujeni pe muhamposhela munyumba zyinyu,

³⁶ lwe nali ishitali pe muhanzwihʼamenda, lwe nkavinaga pe muhinzʼukumṿula, lwe nali mujela pe muhansyungula.

³⁷ Pe valiyamulʼavagolosu valiti: Mwene, shali twakuwenyi shʼuli ninzala, tuhakuletelʼi-ṿintu, amwe shali nishinyoto tuhakungʼwesya?

³⁸ Shali twakuwenyi she we mujeni, tuhakuposhela munyumba zyitu, amwe shʼuli ishitali tuhakuzwihʼamenda?

³⁹ Shali twakuwenyi shʼuvinile amwe shʼuli mujela, tuhinza ukukuṿula?

⁴⁰ Pʼuwe-nʼuMwene aliyamula aliti: Nalyoli nkuvavuzyʼine nkuti: Yonti yenga mumuvombeye woka muvamwitu nashenga vansi, ye mumbombeye nenene.

⁴¹ Pe vope navakumuhonʼumumongo aliyanga navo aliti: Simwepe panapʼipa mwe vantipʼimwe, simuvale kumwoto wa shima we vapembelilwe numukwalanzi navahavizya vakwe.

⁴² She lwe nali ninzala pe mutahandetelʼiṿwa kulya, lwe nali nishinyoto pe mutahangʼwesyʼine,

⁴³ lwe nali ne mujeni pe mutahamposhela munyumba zyinyu, lwe nali ishitali pe mutahanzwihʼamenda, lwe nkavinaga, lwe nkavanga mujela, pe mutahamṿula.

⁴⁴ Pe vope valiyamula valiti: Mwene, shali twakuwenyi shʼuli ninzala, shʼuli nishinyoto, she we mujeni, shʼuli ishitali, shʼuvinile, shʼuli mujela, ukuti tutahinzʼukukuvombela?

⁴⁵ Pʼuwene aliyamula aliti: Nalyoli nkuvavuzyʼine nkuti: Shima lwe muhasitʼukumuvombela woka muvamwitʼavansi nkanʼiva, pe muhasitʼukumbombela nenene.

⁴⁶ Pʼavene vanava valivala kwe kusundwʼisunde lya shimashima.