Matayi 23 - Tesitamenti Umupwa 1965

UYesu akuvalonga avamanyakalata navaFalisayi

¹ PʼuYesu ahavavuzya navantʼimpuga yonti navasundikwa vakwe

² ahati: Pashitengo sha Mose pe vatendime navamanyakalata navaFalisayi.

³ Zyonti lelo zyenga vakuvavuzya zye mulandate, zye muvombaje. Izyene nyenʼimbombo zyavo zye vakuvombʼavene, zye mutashelaje. Shʼavene zye vakuyanga zye vakusitʼukuvomba.

⁴ Vakupinyʼamaligʼamapiti amamwamu ge vakuvavegazya paṿipungʼavantu, avene nyene vatakugapalamansya nulwove lwavo nga lwoka vwelele.

⁵ Zyontʼimbombo zyavo lwe vakuvomba, pe vakuti mwe vatwenyelezyajʼavantu. Utwa kalata twavo twa kuyikumbushila mumwo vakuyananya ukuva tubaba, gope namakope ga menda ukuva matali.

⁶ Lwe vakuvalʼukulyʼiṿintu pe vakuyisevela pavwimishilwa avene, namumasinagogi vakwanzʼiṿi-tengo ṿwa vupiti.

⁷ Vakasime ukuti vavalamushʼavantu pamasolo vavatashʼilya Labi.

⁸ Nkandʼimwe mutavatashʼavantu ilya Labi. She muli numusambilizi winyu woka mwene, nkandʼimwe mwe vanamuntu mwenti.

⁹ Havili mutamutashe numʼumuntu ukuva wuso munsʼumu, she muli nuSo winyu woka mwene we wa kumwanya.

¹⁰ Nilya mulongozi vatavatashʼimwʼavantu, she muli nuMulongozi winyu uChilisiti.

¹¹ Uno wengʼavalusizyʼuvupiti mwe vamwavo, wʼavanje wa kuvavombelʼimbombo mwe vamwavo.

¹² Nkanaʼuno wengʼakuyimiha weka, we wa kumwisya. Havilʼuno wengʼakuyisya weka, we wa kwimishilwa.

¹³ Ye mayi we, namwe vamanyakalata namwe vaFalisayi, mwe valumilenga, mukwigalila kushinamwene sha kumwanya lwe vakuti twinjilʼavantu. Shʼimwe mutakwinjila nave vakwinjila mukuvadinda.

¹⁴ Ye mayi we, namwe vamanyakalata namwe vaFalisayi, mwe valumilenga. She mukulyʼinyumba zya vazishe, pe havili mukupitilizya ukuputa imputʼintali izya mafuji. Zye zizyo mulipitilizilwa ukusundwa.

¹⁵ Ye mayi we, namwe vamanyakalata namwe vaFalisayi, mwe valumilenga. She mukuzyungula mwa sumbi wonti ninsi zyonti lwe mutili tumwanze wumo uwa kumupelelʼukuva mwitisi. Havili inga mumwazile wumo, pe mukumupelelʼukuva mwana wa gehena ukuvalusyʼimwe.

¹⁶ Ye mayi we, namwe valongozi mwe vantonkʼimwe, mwe mukuti: Uno wengʼakulapʼakuti; Inza she nakwa tempeli, pʼalafile shaha, nkandʼuno wengʼakulapa akuti: Inza she nakwa sahabu wa tempeli, wʼalafile ayikunjiliye pupo.

¹⁷ Mwe ṿipukupuku, mwe vantonko! Shonu shipiti nusahabu nitempeli yʼikumupʼuvufinjile usahabu?

¹⁸ Havili uno wengʼakulapʼakuti: Inza she nakushifinjilo, pʼalafile shaha, nkandʼuno wengʼakulapʼakuti: Inza she napamputile yʼili pamwanya pashifinjilo, wʼalafile ayikunjiliye pupo.

¹⁹ Mwe vantonko! Shonu shipiti nimputile nishifinjilo isha kufinjila pupo she shikuyipʼuvufinjilʼimputile?

²⁰ Mwe mumwo uno wengʼakulapa kushifinjilo, pʼalafile nakuli shisho nakuli ṿwonti ṿwe yili pamwanya pala.

²¹ Nuno wengʼakulapa kwa tempeli, pʼalafile nakuli yiyo nakuli wuyo wʼali muhati.

²² Nuno wengʼakulapa kwe kumwanya, pʼalafile nakushitengo sha Mulungu nakulʼuno wʼatendime pala.

²³ Ye mayi we, namwe vamanyakalata namwe vaFalisayi, mwe valumilenga. She napamuzimwa napanyunzu pe mukusavula iṿwa pishumi, izyenʼimpiti nyene munkomelezyo muzilesile—nizya vulonzi, nizya lupepelezyo, nizya lwitiho. Nkandʼinga mwatinji zimʼizi zye tuzivombaje, Zyope nizyamwavo zila zye mutazilehaje.

²⁴ Mwe valongozi vantonko! Insyuvuvu zye mukususa izyenʼingamila nyene zye mukungʼwelela kwoka.

²⁵ Ye mayi we, namwe vamanyakalata namwe vaFalisayi, mwe valumilenga. She kunzi impindi zyinyu ninsahani zyinyu mukwozya, muhati nyene mwe vupumaṿintu vutupu mwe vupafu vutupu vwizuye mumwo.

²⁶ We muFalisayi we wantonkʼiwe, nkandʼukwozya suti vwe vwa muhati mumpindi namunsahani, pe pakuti vwope nuvwakunzi vuzelupaje.

²⁷ Ye mayi we, namwe vamanyakalata namwe vaFalisayi, mwe valumilenga. She muli fwe mbipa zye vasinguye nibanya zye kunzi zili fwe ngati nyinza, nkandi muhati mwe gizuye mumwo ge mafupa navwe vuvozu vutupu.

²⁸ She muhonzizye vovulo namwe, kunzi muli fwe ngati mwe vagolosu kwe vakwenyʼavantu, nkandi muhati mwe gizuye mumwo nage malenga nuvwilanyankomelezyo vutupu.

²⁹ Ye mayi we, namwe vamanyakalata namwe vaFalisayi, mwe valumilenga. She mukuzenjela nimbipa zya vakuvwi, mwe mukunonelezya namavwe ga pambipa zya vagolosu.

³⁰ Havili mukuti: Inga twalipo pamwahʼula we valipʼavatata, Pe nkandi tutitinkine navo ukwitʼamavanda ga vakuvwi vala.

³¹ Mwe mumwo mwe muyilatiye mweka ukuva mwe vana va vala ve vagozilʼavakuvwi.

³² Ukwo lelo mumalilizyajʼishilinjilo sha malandu ga vaso vala.

³³ Mwe njohʼimwe mwe luho lwa nzoṿwa imwe, mulishimbila vuli uvulonzi vwa gehena?

³⁴ Mwe mumwo, yenyi, nkuvatumilaga navakuvwi navanjele navamanyakalata. Vamo mulivagoga mulivahomela pashihovenkanyo. Vamo mulivasyempa mumasinagogi ginyu, muli-vayumṿanya munkaya munkaya.

³⁵ Amavanda ga vagolosu ge gitisile munsʼumu pe pakuti gavinzilaje mwenemwe, gonti vwelele, ukufuma pamavanda ga Hebeli umugolosu ukufiha pamavanda ga Zahaliya umwana-Belekiya, we vamugozile pahati patempeli nishifinjilo.

³⁶ Nalyoli nkuvavuzyʼine nkuti: Zyonti zinizi zikuvinzilʼavantu vashinishʼiva ve valipo.

UYesu akulosezyʼulunanjiho lwa nkaya ya Yelusalemu

³⁷ We Yelusalemu, we Yelusalemu, wʼukugoga navakuvwi, wʼukutinza namavwe nave vatumilwe kukwaho, amwe patalʼapinji lelo pe ntili mbavunganishʼavana vaho, inza shʼinyinankuku yikuvunganihʼinyana zyakwe muṿwapa ṿwakwe? Imwe nyene muhasita.

³⁸ Yenyi, inyumba yinyu mukuleshelwa yikuyipelʼukuva litongo.

³⁹ Nkandʼine nkuvavuzya nkuti: Mutalinenya nalumo, mulivalʼukufiha pala pe muliyanga muliti: Uyangaje we ukwinzila mwizina lya Mwene.