Matayi 15 - Tesitamenti Umupwa 1965

UYesu akwamula lwe vukumuvuzilizya izya kushilanyʼamata

¹ Pe vahapalamila kwa Yesu navaFalisayi navamanyakalata ve vafumile mu-Yelusalemu vahati:

² Avasundikwa vaho vakushilanya twashʼutulajizyo twa vasongo? She vatakusukusula munyove lwe vavusilʼukulyʼuvugali.

³ Uwenʼahamula ahati: Imwʼulwa Mulungu ululajizyo mukulushilanya lwashi, she mukuti tulandate twe twinyu utulajizyo?

⁴ ShʼuMulungu ahomelezizye nilya kuti: Uno wengʼakuliga nuyise nunyina we pakuti afwanje kwe kufwa.

⁵ Nkandʼimwe mukuti she pajelelezizyʼumuntu ingʼakuyanga nakwa yise nakwa nyina akuti: Namile nkupanje ahantu ha kukutula nkandʼishi lelo ha kufinjila,

⁶ pʼatakushindiha uyise nunyina. She muhonzizyʼimwe, ilya Mulungu izwi lye mukulilotelezya she mukuti tulandate twe twinyʼutulajizyo.

⁷ Mwe valumilenga mwe, amwʼatalovosizyʼuYesaya lwʼahavayanjila nzila lwʼahati:

⁸ Avantʼiva vakunitiha ge malomu geka, amoyo gavo she galʼukutali,

⁹ vakunchindishilʼine shaha vwelele, vakusambilizyʼinsambilizyo zye tulajizyo twa vantu.

¹⁰ Lwʼavavunganisilʼavantʼimpuga, pʼahavavuzya ahati: Simutejelezyaje muzimanyinsanye!

¹¹ Twenga tukwinjila mwilomu tutakuhandamanyʼumuntu, nkandi tutwo twe tukufuma mwilomu twe tukuhandamanyʼumuntu.

¹² Pe vahapalamila kukwakwe avasundikwa vakwe vahati: Uvawenyi avaFalisayi ukupunula lwe viṿuyʼizwi lila?

¹³ Uwenʼahamula ahati: Ywontʼiṿivwalwa ṿwʼatavwayʼuTata wa kumwanya ṿwe yiliyitwa.

¹⁴ Simuvaleshe. Ve vantonko ve vakuvalongolelʼavantonko vamwavo. Ingʼuwantonko akumulongolʼuwantonko uwamwavo, pe vakugwila mushiliva ve vavili vonti.

¹⁵ PʼuPeteli ahamula ahati: Utuvuzyajʼishiholanyʼishi.

¹⁶ Uwene ahati: Fwane mushili suti namwe, musyayʼinjele namwe?

¹⁷ Mushilʼukuzimanyinsanya zye nkuti ṿwonti ṿwe ṿikwinjila mwilomu ṿikuvala muvula, havili ṿikutagwa mumusalani?

¹⁸ Izyene zye zikufuma mwilomu, zye zifumile mumwoyo zizyo nyene zye zikuhandamanyʼumuntu.

¹⁹ She zikufuma mumwoyo zyontʼinsivʼimbivi, nuvugozi, nuluvembu, nizya vwa malaya, nuvwiva, nuvwahome vwʼilenga, namatona, nindigo.

²⁰ Zye zikumuhandamanyʼumuntu zizyo; nkandʼizya kulyʼuvugali lwʼutasukusuye munyove we muntu, zye zitakumuhandamanya ndali.

Ukupola kwa mwana umulindu uwa vakunzi

²¹ PʼuYesu ahafuma pupo, ahashimbilila munsi ya mu-Tili niya mu-Sidoni.

²² Pe vahitushilʼumwantanda woka umu-Kanani, akufuma mumwo mwe zipahinʼinsi zinizi, ahavilishila ahati: Umfwilʼuvwila, we Mwene we Mwana-Davidi! Shʼumwana wanʼumulindu impepʼimbivi yimupenuye nkani.

²³ Uwene nyene ahasita nukumwamula nalyokʼizwi. Pʼavasundikwa vakwe vahamulambilizya vahati: Umuvwezyaje shʼakuvilishila mwisinda.

²⁴ Uwenʼahamula ahati: Ntumilwe kwe kungʼonzi zye zitezile izya nyumba ya Isilayili ine, ntatumilwe nakuzinji izya vwelele.

²⁵ Pʼuwenʼumwantanda ahapalamila, ahakupama kukwakwe ahati: Mwene mula!

²⁶ Uwenʼahamula ahati: Hate hinza ukusendʼuvugali vwa vana ukutajilʼutuvwa.

²⁷ Uwenʼumwantanda ahati: Kwe nalyoli Mwene, havilʼine ntili she nutuvwa tukusevʼutwalila twe tukulagala pameza zya vahatatuvwa.

²⁸ PʼuYesu ahamula ahati: We mwantanda, lupitʼulwitiho lwaho! Zyinzaje kukwaho zizyo zyʼulaṿile. Pʼumwana wakwe ahazuzuvuha pahavalilizyo huho.

Avinji vakuzuzuvuha

²⁹ IlelʼuYesu lwʼayefile pupo, pʼahavala kwa sumbi wa mu-Galilayi, ahazuva pigamba, pʼahatendama pupo.

³⁰ Vahapalamila kukwakwe avantʼimpugʼimpiti, vahavaleta nave vakugugʼukujenda, navantonko, navashinunu, navalemazu, navamwavʼavinji, vahavaviha kuṿinama ṿwakwe. Uwenʼahavazuzuvushizya.

³¹ Pʼavantʼimpuga yonti vahasukumila lwe vawenyi nukuyangʼavashinunu nukuyanana ve valemayʼumuvili, nukujenda ve vahagugaga nukwenyʼavantonko. VahamutimʼuMulungu wa Yisilayili.

Ukulisya avantu 4,000

³² PʼuYesu ahavitʼavasundikwa vakwe, ahavavuzya ahati: Nkuvapepelezyʼavantʼimpugʼiva. She valinzitʼamanda gatatu kukwanʼuku vasitakulya naṿimo. Ntakwanzʼukuvavwezya she vataliye naṿimo, ukuti vatagwanjʼulusyo mwidala.

³³ Avenʼavasundikwa vakwe vahamula vahati: Tugaje kwi mulwugwʼumu amakati ga kuvalelʼavantʼimpuga vovulo?

³⁴ UwenʼuYesu ahati: Muli nago galingʼamakati? Avene vahati: Tuli nago gasanu nagavili nutuswi tunsi.

³⁵ PʼuYesu ahavavuzyʼavantʼimpuga yonti ahati: Simutendame pansi.

³⁶ Pʼahasendʼamakati gasanu nagavilʼaga nutuswʼutu, ahasalifwa. Pʼahaga-mensulanya, ahavapʼavasundikwa vakwe, avenʼavasundikwa vahavapʼavantʼimpuga yonti.

³⁷ Ve vahalya, vahikuta vonti. Pe vahavunganihʼutwalilʼutu twe valeshe, tuhizula muṿitundu ṿisanu naṿivili.

³⁸ Avene ve vahalya vali 4,000 ukuvazya ve vanaṿuli veka kusitakuvazya navantanda navana.

³⁹ Ilelo lwʼavavwezizyʼavantʼimpuga yonti, pʼahazuva mwivoti, ahavala munsi ya mu-Magadani.