Matayi 13 - Tesitamenti Umupwa 1965

Ishiholanyo sha mupesambeyu

¹ Umusanya wuyo uYesu ahafuma munyumba, ahavalʼukutendama kushipuma sha sumbi.

² Pe vahavungana pupo pʼali avantu ve vinji. Pʼuwene ahazuva mwivoti mwʼahatendama. Avenʼavantʼimpuga vahavamba kushipuma.

³ Pʼuwenʼahavavuzya zye nyinjʼinongwa, ahayanjila muṿiholanyo ukuvavuzya ahati: Yenyi, lumʼumupesambeyu ahavalʼukupesʼimbeyu yakwe.

⁴ Ilelo lwʼamakupesʼimbeyu, pe yoka yihagwa pidala, pʼinyunyi zihinza zihaseva zihamala.

⁵ Yoka iyamwavo nyene yihagwa pansi ya mavwe, pʼintopʼitalʼinyinji. Yihamula luvilo luvilo shʼintopʼitalʼinyinji.

⁶ Ilelo lwe litukuyʼizuva, pʼihapwa yihuma shʼitali namazi.

⁷ Yoka iyamwavo nyene yihasangana nulwangwa lwe yagwa, ilelo lwe lumezilʼulwangwa, pe luhayibuda.

⁸ Yoka iyamwavo nyene yihagwa pansʼinyinza, yihahomʼinsanga. Yokʼihahomʼamashumʼishumi, yokʼihahomʼamashumʼumutanda, yokʼihahomʼamashumi gatatu.

⁹ Uno wengʼamakutwi ali nago wʼatejelezyaje.

Ukuvombelwa kwa ṿiholanyo

¹⁰ Pe vahapalamila kukwakwe avasundikwa vakwe vahamuvuzilizya vahati: Ukuyanjila shonu mumivi lwʼukuvavuzya?

¹¹ Uwene ahavavuzya ahati: Shʼimwe mupelilwe ukuzimanyinsanya izya kukwilu zya vumwene vwa kumwanya, avene vala nyene ve vatapelilwe.

¹² Shʼuno wengʼali naṿwo yimo, wʼakwonjelezelwa ukupelwa niṿwamwavo, we ṿikwinza ṿikulafuha. Uwene nyene wʼate naṿwo naṿimo, we hakusompolwa nahuho hengʼali naho.

¹³ Mwe mumwo nkuyanjila navo muṿiholanyo, she nashenga vakwenya vatakuzilola nazimo, nashenga vakwiṿwa vatakuzitejelezya nazimo, havili vatakuzimanyinsanya.

¹⁴ Zikuvinzila zila zyʼahakuvwagʼuYesaya lwʼatili: Ukwiṿwa namakutwi kwe muliyiṿwa, nkandi mutalizimanyinsanya, ukwenya naminso kwe muliyenya, nkandi mutalizilola,

¹⁵ Shʼamoyo ga vantu vanava gayipezilʼukuva mamwamu, amakutwi gavo gali namapuli ukwiṿwa, vasinziliye naminso. Mwe mumwo vakupotwa ukwenya naminso, nukwiṿwa namakutwi, nukuzimanyinsanyʼinongwa mumoyo, nukupinduha, ukuti imbazuzuvushizyaje.

¹⁶ Nkandi masangalusʼaminso ginyu she gakwenya, namakutwi ginyu she gakwiṿwa.

¹⁷ She nkuvavuzyʼine nalyoli nkuti: Navakuvwi navagolosu ve vinji vahasungwaga ukwenya zizyo zye mukwenyʼimwe, vahapotwʼukuzyenya nakumo, vahati twiṿwaje zizyo zye mukuzyiṿwʼimwe, vahapotwʼukuzyiṿwa nakumo.

Uvulondovozi vwa shiholanyo sha mupesambeyu

¹⁸ Ilelʼimwe mutejelezyajʼishiholanyo shʼula wʼahapesagʼimbeyu.

¹⁹ Uno wengʼakutejelezyʼizwi lya vumwene, ingʼatakulimanyinsanya, akwinzʼumunyala akusompola huho he hapesilwe mumwoyo wakwe. Uno lelo ye yiyo ye yapesilwe mwidala.

²⁰ Iyene nyene ye yapesilwe pansi ya mavwe we wuyo wʼakwiṿwʼizwi ilelo pʼakuseshela,

²¹ nkandʼamazi gʼate nago, wʼakusimpʼisiku lyoka vwelele. Lwʼayazilʼizwi likumu-pʼukuyimṿilwa nukuṿwimwa shʼali nalyo, pʼatakuhavʼukugalamuha zyenezyo.

²² Iyene nyene ye yapesilwe mulwangwa, we wuyo wʼayazilʼayiṿuyʼizwi, ilelo pe havili ukukutana kwʼikumupelelʼinsʼino, nishifumbo sha vulonsi, zyenezyo zye zikubudʼizwi, ilelo pe ninsanga zisite nukwela.

²³ Iyene nyene ye yapesilwe munsʼinyinza, we wuyo wʼayazilʼayiṿuyʼizwi, pʼakujenda nukulimanyinsanya nukuhomʼinsanga. Wokʼakuhomʼamashumʼishumi, wokʼamashumʼumutanda, wokʼamashumi gatatu.

Ishiholanyo sha ndezye

²⁴ Ahavavuzya nishamwavʼishiholanyo ahati: Uvumwene vwa kumwanya vuli fwe muntu wʼahapesagʼimbeyʼinyinza mumugunda wakwe.

²⁵ Ilelo lwe vakasitʼutulʼavantu, pʼumulugu wakwe ahavalʼukupesʼindezye mungana mumwo, ahepa.

²⁶ Ilelo lwʼamezilʼumulemṿwe, lwe gakufuma namatwe, pe zihaloleha Zyope nindezye.

²⁷ Pʼavanyamata vahavalʼukuyanga numuhatankaya vahati: Mwene, amwʼutapesilʼimbeyʼinyinza mumugunda waho? Zifumile kwi lelo indezyʼizi?

²⁸ Uwene nyene ahavavuzya ahati: Zyʼapesilʼumuntʼumulugu. Pʼavanyamata vahati: Vulʼiwe, ingavanga tuvale tusagulilaje?

²⁹ Uwene nyene ahahana ahati: Ndali, mungasagulila poka ningana lwe mukusagulʼindezye.

³⁰ Simuleshe zikulile poka zye zivili, zihafishe pamṿuno. Apene pamṿuno lelo pe ndiva-vuzyʼavaṿuni nditi: Simusagule suti zye ndezye, mupinyʼutusunzo, muzipembe mumwoto. Iyenʼingana nyene ye musezezyaje mumulaza wane.

Ishiholanyo sha Insanga lwa muzimwa ninyambo

³¹ Ahavavuzya nishamwavʼishiholanyo ahati: Uvumwene vwa kumwanya vuli fwe hasanga ha muzimwa, hʼumuntu ahahasenda ahahapesa mumugunda wakwe.

³² Shʼahene he hansi kumbeyu zyonti, apene nyene lwenga hakuzile, pe hakulusya ṿwontʼiṿiyavo uvupiti, hakuyipelʼukuvʼikwi, ilelo pe ninyunyi zya kumwanya zijende nukutenga iṿisanzo munsamba zyakwe.

³³ Ahavavuzya nishamwavʼishiholanyo ahati: Uvumwene vwa kumwanya vuli fwe ṿiluzizyo, ṿwʼahasendʼumwantanda, ahasanganya nuvusu iṿwivo ṿitatu pe vuhajenda nukulula vwonti.

³⁴ Zyonti zinizi uYesu ahayanjila muṿiholanyo lwʼakuvavuzyʼavantu ve vavunginʼimpuga, ukwenʼukuyanga vwelele kwʼatahayanga nazimo,

³⁵ ukuti zilunjihaje zizyo zyʼahayangʼuYesaya umukuvwi lwʼahati: Ndivusyʼilomu ukuyanjila muṿiholanyo, ndikumusya zizyo zye zyali kukwilu ukufuma pe yapezilwʼinsi.

Ukulondovolwa kwa shiholanyo sha ndezye

³⁶ Ilelo pʼuYesu ahavavwezyʼavantu mwe vavaliyʼimpuga yonti, vahavala, uwenʼahinjila munyumba. Pʼavasundikwa vakwe vahapalamila kukwakwe vahati: Utwilulilʼiswe ishiholanyo shila isha ndezye mumugunda.

³⁷ Uwenʼahavamula ahati: Uno wʼakupesʼimbeyʼinyinza we Mwanamuntu.

³⁸ Uwenʼumugunda we nsi. Iyenʼimbeyʼinyinza ve vanashinamwene, izyenʼindezye ve vana va vunyala.

³⁹ Uwenʼumulugu wʼakupesa we mukwalanzi; iyenʼimṿuno vwe vusilo vwa nsʼino. Avenʼavaṿuni ve vahavizya.

⁴⁰ Ilelo inza she vakuvunganihʼindezye vakuzipemba mumwoto, she valihonzya vovulo pavusilo vwa nsi.

⁴¹ PʼuMwanamuntu alivatumʼavahavizya vakwe ukuvunganiha zyonti ninyazyo navilankomelezyo vonti muvumwene vwakwe ukuzifumwa.

⁴² Ve valivataga mwipalazya mwʼakwahʼumwoto. Mwe ziliva zye nkuta ntupu, mwe luliva lwe lulumanyo lwa mino lutupu.

⁴³ Pʼavagolosu valilangalila fwe lizuva mushinamwene sha Yise. Uno wengʼali namakutwi wʼatejelezyaje.

Ishiholanyo sha havwʼahagomu nishuma nulwelo

⁴⁴ Havili uvumwene vwa kumwanya vuli fwe shuma she vazyisile mumugunda, she wokʼumuntu ahashaga havili ahashizyiha. Pʼahaseshela ahavalʼukukazya ṿwonti ṿwʼali naṿwo, ahakalʼumugunda wununo.

⁴⁵ Havili uvumwene vwa kumwanya vuli fwe mukazi wʼahanzagʼuvwambʼuvwinza.

⁴⁶ Ilelo lwʼavwazile vwokʼuvwambʼuvugomu nkani, pʼahavalʼukukazya ṿwonti ṿwʼali naṿwo ahakala vuvwo.

⁴⁷ Havili uvumwene vwa kumwanya vuli fwe lwelo lwe lwatazilwe mwa sumbi, luhavunganiha zyontʼinswi mwe zivaliye muluho muluho.

⁴⁸ Ilelo lwe zyizuye mumwo pe vahalukwesela kushipuma, vahatendamʼukusevʼinyinza zye vahaviha muṿiseje, izyenʼimbivi zye vahataga.

⁴⁹ She zili vovulo nizya vusilo vwa nsi. Pʼavahavizya valivuhʼukuvasavulʼavavivi mumpuga ya vagolosu.

⁵⁰ Valivataga mwipalazya mwʼakwahʼumwoto. Mwe ziliva zye nkuta ntupu, mwe luliva lwe lulumanyo lwa mino lutupu.

⁵¹ Muzimanyile zyonti zinizi? Avene vahati: Ena Mwene.

⁵² Uwenʼahavavuzya ahati: Mwe mumwo vontʼavamanyakalata venga vayipezilʼukuva vasundikwa va vumwene vwa kumwanya, vali fwe muhatankaya wʼakuṿumbula nimpwa ninkali mwʼavisilʼishuma shakwe.

UYesu ahanilwe mu-Nazaleti

⁵³ IlelʼuYesu lwʼamazilʼiṿiholanyo ṿiniṿi, pʼahavuhʼukuvala.

⁵⁴ Ahavalʼukufiha munkaya mwʼakuliye, ahavasambilizyʼinongwa musinagogi yavo. Pe vahasukumila nkani vahati: Umuntʼuno azyazile kwi injelʼizi namamfindango ganaga?

⁵⁵ Amwe wuyo ate mwana wa selemala? Amwe ate wʼunyina uMaliya izina? Avanine amwe vate ve vaYakobu nuYosefu nuSimoni nuYuda?

⁵⁶ Avenʼavanavavo avalindu amwe tute navo panapa vonti? Azyazile kwi lelo zyonti zinizi?

⁵⁷ Vahapunula muli wuyo. UwenʼuYesu nyene ahavavuzya ahati: Umukuvwi atakusovʼumushinzi nkandi kwe kumwavo namunyumba yakwe.

⁵⁸ Atahapelʼaminjʼamamfindango aga maha mumwo shʼavenʼulwitiho vatali nalwo nalumo.