Matayi 11 - Tesitamenti Umupwa 1965

UYohani umwozyi

¹ Ayazile lelʼuYesu lwʼamazilʼukuvalajizyʼavasundikwa vakwe ishumi navavili, pʼahavuha ahepa pupo ahavalʼukusambilizya nukukumusyʼintumi mwonti munkaya zyavo.

² UwenʼuYohani lelo mujela, lwʼayiṿuye zizyo zyʼahavombagʼuChilisiti, pʼahatumʼavasundikwa vakwe vavili kukwakwe,

³ ahamuvuzya ahati: Amwe wewe we vatinji akwinza, ingavanga tumugulililajʼuwunji?

⁴ UwenʼuYesu ahamula ahati: Simuvale muhamuvuzyʼuYohani nazye mukwiṿwa nazye mukwenya:

⁵ Avantonko vakwenya, ve vakudyogolela ukujenda vakujenda vakugolosya, avamambombo vakupela, avakutwi vakwiṿwa, avafwe vakuzyuha, avasamusu vakwiṿwʼintu-mʼinyinza;

⁶ havili nkuti: Musangalusu wengʼatakupunula mulʼine.

⁷ Lwe vavala vanava, pʼahanda pupʼuYesu ahamuyangʼuYohani kuvantu ve vahomine pupʼimpuga ahati: Mwavalʼukwenya shonu mulwugwa? Mwavalʼukwenyʼitete lye likuyihana kunkungu?

⁸ Amwe muvazilʼukwenya shonu lelo? Umuntu wʼakuzwalʼamendʼamatinyu? Vuvo ve vakuzwalʼamendʼamatinyu ve vali munyumba zya vamwene.

⁹ Amwe muvazilʼukwenya shonu lelo? Ukwenyʼumukuvwi? Ena, nalyoli nkuvavuzyʼine nkuti: Mupiti nakuvakuvwi.

¹⁰ She we wuyo wʼayanzilwe namwa kalata lwʼakuti: Yenya nkukutumilʼuhavizya wane uwa kulongola kwilongolela kukwaho, wʼaliyananizyʼidala lya kujenda pupʼiwe.

¹¹ Nalyoli nkuvavuzyʼine nkuti: Muli vonti ve vapafilwe kuvantanda atalolesile numo kuvʼumupiti kwa Yohani umwozyi. Nkandʼumunsi kuli vonti ava mushinamwene sha kumwanya, wʼamulusizyʼuvupiti.

¹² Vwanzite mumanda ga Yohani umwozyi ukufiha nakushinishʼuku uvumwene vwa kumwanya vukuṿijilizilwa, havili vuvo ve vakuṿijilizya ve vakuvusompola.

¹³ Shʼavakuvwi vonti ninkomelezyo vakuvwilwe ukufiha pa-Yohani.

¹⁴ Pʼinga mukwitiha ukuposhela, uwene wʼuEliya we vatili aliyinza.

¹⁵ Uno wengʼamakutwi ali nago wʼatejelezyaje.

¹⁶ Imbaholanye nishonu avantu vashinishʼiva? Vali fwe twana twe tutendime pamusolo, twe tukuvilishilana tukuti:

¹⁷ Nilonji twavahomeye, imwe nyene mutahashima; nilosyo twalosizye, imwe nyene mutahakutʼamansozi.

¹⁸ ShʼayinzilʼuYohani ahasita nukulya nukungʼwela, pe vahati: Ali nimpepʼimbivi.

¹⁹ AyinzilʼuMwanamuntu ahalya nukungʼwela, pe vahati: Ye, musukumilʼumuntʼumuluṿʼuno, wʼushingʼwezi wʼipele lya mampensya, mujenzi wa vasonkolamusonko navatalamalandu! Nkandʼizyenʼinjele zya Mulungu zikuloleha mwe mumbombo zyakwe ukuva ngolosu zizyo.

Ye mayi we kunkaya insita kwitiha

²⁰ Pʼahanda pupʼuYesu ahapililʼinkaya zila mwe gapezilwe ge minjʼamamfindango gakwe she zitapindusile:

²¹ Ye mayi we, we Kolazini! Ye mayi we, we Betisayida! shengʼamamfindango ge gapezilwe mumwinyʼumu, inga gapezilwe namu-Tili namu-Sidoni, pe nkandi vapindusile he hali nukuyipinyʼinkusʼinyezya nukutendama mwilota.

²² Ilelo nkuvavuzyʼine nkuti: Pisiku lya vulonzi, pe nizya mu-Tili nizya mu-Sidoni ziliva mpupusu kuzyinyu.

²³ Nawe we Kapelinahumu! Ukuti uhafishe kumwanya ukwimishilwa? Uliyishilwa ukufiha kuvuzimu. Shʼamamfindango ge gapezilwe mumwahʼumu, inga gapezilwe mu-Sodomu, pe nkandʼilipo nashinishi insʼila.

²⁴ Ilelo nkuvavuzyʼine nkuti: Pisiku lya vulonzi, pʼizya munsi ya Sodomu ziliva mpupusu kuzyahʼiwe.

Insivo zya shana

²⁵ Musanya wuyo pʼuYesu ahamula ahati: Nkukutiniha we Tata we Mwene wa kumwanya napansi, shʼuzyisile nakuvanjele nakuvamanyinsanyi, nkandʼuzigwinkuye kuvagolo.

²⁶ Ena we Tata, zye nyinza zinizi kuminso kukwaho.

Imbombo ya Yesu wuyo

²⁷ YwontʼampiyʼinʼuTata. NuMwana numʼatamumanyile, weka we Yise wʼamumanyile, nuYise numʼatamumanyile, weka we Mwana wʼamumanyile, nuno wengʼuMwana atili: Imugwinkulilaje.

²⁸ Nzagaji kukwane mwenti mwe muṿunzisile mwe vanyatulʼamaligo, pʼine mbapanjʼuvutuzyo.

²⁹ Musendʼulwanʼulutunyulilo lwa kutunyulilʼumuligo, musambilile kukwane, she ne mutelefʼine, njisizye mumwoyo wane, pe namoyo ginyu muligalonchelʼuvutuzyo.

³⁰ Shʼulwanʼulutunyulilo lutonsu, wope numuligo wane mupupusu.