Matayi 10 - Tesitamenti Umupwa 1965

Avapositili ishumi navavili nimbombo yavo

¹ Pʼahavunganihʼavasundikwa vakwe ishumi navavili, ahavapʼamaha aga kuvinjilʼimpepʼinkandamanu naga kukantulilʼimpungo zyonti nuvupotwe vwonti.

² Amazina ga vapositili ve valʼishumi navavili ge ganaga: Umutanzi uSimoni we vatili wʼuPeteli, nuAndeleya umuzuna wakwe, nuYakobu umwana-Zebedayi, nuYohani umuzuna wakwe,

³ nuFilipu nuBalitolomayi nuToma, nuMatayi musonkolamusonko, nuYakobu umwana-Alifayi, nuLebayi we vatili wʼuTadayi,

⁴ nuSimoni uwa mu-Kana, nuYuda uwa mu-Kalyoti wʼamwaniliye ulwa pisinda.

⁵ Avishumi navavilʼava vʼahavasontelezyʼuYesu ahavalajizya ahati: Mutajendaje mwidala lya vakunzi, namunkaya ya vaSamaliya mutahinjile.

⁶ Nkandi kungʼonzi zya nyumba ya Yisilayili zye zitezile, kwe muhavale nyene.

⁷ Lwe mukujenda muhakumusyaje ukuti vwinzilʼuvumwene vwa kumwanya, vuli papipi,

⁸ muhazuzuvushizyʼavavinu, muhazyusye navafwe, muvatelefwajʼavamambombo, muhavinje nimpepʼimbivi. Yenyi mbapiye vwelele, namwe muhavapanje vwelelʼimwe.

⁹ Mutalonkajʼusahabu nufeza nihela zya kuviha mumalamba ginyu.

¹⁰ Mutavanje nishiṿunda mwidala namashati gavili nindyato nindisa. Shʼumuvomṿi akuhondela ukuposhelʼiṿwa kulya ṿwakwe.

¹¹ Inga muvazilʼukufiha munkaya yoka—inga mpiti nga nyinsi—mwe muhamulondole mumwo wengʼahondeye, ilelo muhadile kukwakwe muhafishe pala pe mukusogola.

¹² Inga lwe mukwinjila munyumba, pe muhavalamushe avamunyumba.

¹³ Inga yihondeye pʼuvwihalo vwinyu vukuyinzilʼinyumba yavo. Nkandʼinga yitahondeye pʼuvwihalo vwinyu vukuvagalushila mwenemwe.

¹⁴ Umuntu lwʼakusita nukuvaposhela nukutejelezyʼamazwi ginyu, pe muhafume munyumbʼino namunkaya yiyo, muhakunyuntajʼulusuto lwa kuṿinama ṿwinyu.

¹⁵ Nalyoli nkuvavuzyʼine nkuti: Pisiku lya vulonzi pʼizya va mu-Sodomu nizya va mu-Gomola ziliva mpupusu kuzya nkaya yiyo.

¹⁶ Yenyi she nkuvatuma fwe ngʼonzi pahati pamapumpi. Muve mwe vasheṿu lelo fwe njoha, havili muve mwe vazelu fwe nkunda.

17-22: Mal. 13,9-13. Luk. 21,12-17.

¹⁷ Mwandaje lelo navantu, she valivatwalʼimwe mumabalaza, havili valivasyempʼimwe mumasinagogi gavo.

¹⁸ Mulikweselwa kuvahombe nakuvamwene pe pazyane. Izyo zivanje lusimishizyo kuli vuvo nakuvakunzi.

¹⁹ Apene nyene inga vakuvakungʼimwe vovulo, pe mutakutanaje ṿwe muliyanga nazye muliyanga. She muliposhela pahavalilizyo huho izya kuyangʼimwe.

²⁰ She mutaliyanga mwemwe, nkandi uMupepo wa So nyene aliyanjila mumwinyʼimwe.

²¹ Umuntu alimwanilila umunine ukuti agogwaje, nuyise umwana wakwe vovulo, vope navana valivagalulila avapafi vavo valivagoga.

²² Vontʼavantu valivapatʼimwe she muli nizina lyanʼine. Nkandʼuno wʼakujimbilila nakuvusilo wʼalipona.

²³ Apenʼinga vakuva-ṿwima munkayʼino pe muhashimbilile muyamwavo. Nalyoli nkuvavuzyʼine nkuti: UMwanamuntu aliyinza lwe mushili nukumalilizyʼinkaya zyonti mwa Yisilayili umu.

²⁴ Umusundikwa atakulusyʼuvupiti umusambilizi wakwe, numunyamata atakulusyʼuvupiti umwene wakwe.

²⁵ Inga numusundikwa ali fwe musambilizi wakwe, wope pe vovulo, inga numunyamata ali fwe wumwene wakwe, wope pe vovulo. Ingʼumuhatanyumba vamupiyʼilya Belizibuli, pe vati vavaleshe lelo avanyumba yakwe?

26-33: Luk. 12,2-9.

²⁶ Mutavogopaje lelʼimwe. She twontʼutu twenga tugwinchililwe twe tuligwinkulilwa, twonti nutwa kukwilu tulimanyihʼapazelu.

²⁷ Zyenga nkuvavuzya kukwilu, muhaziyanjʼapazelu. Zyenga mukunongʼonelwa mumakutwi, muhazikumusyaje pamwanya panyumba.

²⁸ Mutavogopaje vuvo ve vakugogʼumuvili weka, ve vapositwʼukugogʼumwoyo. Nkandi mulusyajʼukumunyila wuyo wʼali namaha ga kuloṿwʼumwoyo numuvili mugehena.

²⁹ Indundulu zivili zitakukalwa nihela yoka? Pope nimo itakulagala pansi shisitakumanya uSo winyu.

³⁰ Imwe nazye nsisi zyonti zya kwitwe zivazilwe.

³¹ Ilelo mutatetemaje. She muzilusizyʼuvugomu nazye ndundulʼinyinji.

³² Uno wengʼakuyiyanga kukwane lwe vakwiṿwʼavantu, we nane ndiyiyanga kukwakwe lwʼakwiṿwʼuTata wʼali kumwanya.

³³ Nkandʼuno wengʼakuyihana kukwane lwe vakwiṿwʼavantu, we nane ndiyihana kukwakwe lwʼakwiṿwʼuTata wʼali kumwanya.

34-36: Luk. 12,51-53.

³⁴ Mutasivaje ukuti ninzilʼukuvihʼuvwihalo munsʼumʼine. Ntinzilʼukuvihʼuvwihalo ndali, ndesite ye mpalala nye.

³⁵ She ninzilʼukuvalwisyʼavantu: Umwanʼumwanaṿuli nuyise, numwa-nʼumulindu nunyina, havili numuhamwana nunyinaṿwala.

³⁶ Vope navamunyumba ya muntu valila valugu vakwe.

³⁷ Uno wʼakuvakunda nuyise nunyina ukulusya kulʼine wʼahondeye kukwane. Havili wʼakuvakunda navaṿuli vakwe numulumendo numulindu ukulusya kulʼine atahondeye kukwane.

³⁸ Wope nuno wengʼatakuyivegazyʼishihovenkanyo shakwe nukundandata mwisindʼine, wʼatahondeye kukwane.

³⁹ Uno wʼakupulumusyʼuvulanzi vwakwe wʼakuvutezya, nkandʼuno wʼavutezizyʼuvulanzi vwakwe pe pazyane, wʼakuvupulumusya.

⁴⁰ Uno wengʼakuvaposhelʼimwe wʼakumposhelʼine, uno wengʼakumposhelʼine, wʼakumuposhela wuyo wʼantumilʼine.

⁴¹ Uno wengʼumukuvwi akumuposhela she mukuvwi, wʼaliposhelʼamalipilo ga mukuvwi. Wope nuno wengʼumugolosu akumuposhela she mugolosu, wʼaliposhelʼamalipilo ga mugolosu.

⁴² Wope wʼamungʼwesizye woka uwa vansʼiva lwe lupindi lwoka ulwa minzʼamahata she musundikwa, nalyoli nkuvavuzyʼine nkuti: Amalipilo gakwe atalitegwa.