Matayi 1 - Tesitamenti Umupwa 1965

Avanyenya va Yesu

¹ Ukalata wa luho lwa Yesu Chilisiti, umwana-Davidi, umwana-Abulahamu.

² UAbulahamu amupafilʼuYisikaka, uwenʼuYisikaka ahamupapʼuYakobu, uwenʼuYakobu ahamupapʼuYuda navamwavo,

³ uwenʼuYuda ahamupapʼuPelezi nuSelaka mumushi uTamali, uwenʼuPelezi ahamupapʼuHezeloni, uwenʼuHezeloni ahamupapʼuAlamu,

⁴ uwenʼuAlamu ahamupapʼuAminadabu, uwenʼuAminadabu ahamupapʼuNahasoni, uwenʼuNahasoni ahamupapʼuSalimoni,

⁵ uwenʼuSalimoni ahamupapʼuBohasi mumushi uLahabu, uwenʼuBohasi ahamupapʼuObedi mumushi uLuti, uwenʼuObedi ahamupapʼuYisayi,

⁶ uwenʼuYisayi ahamupapʼuDavidi umwene. UwenʼuDavidi ahamupapʼuSolomoni mumuha Uliya,

⁷ uwenʼuSolomoni ahamupapʼuLehobohamu, uwenʼuLehobohamu ahamupapʼuAbiya, uwenʼuAbiya ahamupapʼuAsa,

⁸ uwenʼuAsa ahamupapʼuYosafati, uwenʼuYosafati ahamupapʼuYolamu, uwenʼuYolamu ahamupapʼuUziya,

⁹ uwenʼuUziya ahamupapʼuYotamu, uwenʼuYotamu ahamupapʼuAhazi, uwenʼuAhazi ahamupapʼuHezekiya,

¹⁰ uwenʼuHezekiya ahamupapʼuManase, uwenʼuManase ahamupapʼuAmoni, uwenʼuAmoni ahamupapʼuYosiya,

¹¹ uwenʼuYosiya ahamupapʼuYekoniya navamwavo pamwahʼula we vavasamizizye mu-Babeli.

¹² Ulwa pisinda lwe vavasamizizye mu-Babeli, pʼuYekoniya ahamupapʼuSalatiyeli, uwenʼuSalatiyeli ahamupapʼuZelubabeli,

¹³ uwenʼuZelubabeli ahamupapʼuAbihudi, uwenʼuAbihudi ahamupapʼuEliyakimu, uwenʼuEliyakimu ahamupapʼuAzoli,

¹⁴ uwenʼuAzoli ahamupapʼuZadoki, uwenʼuZadoki ahamupapʼuAkimu, uwenʼuAkimu ahamupapʼuElihudi,

¹⁵ uwenʼuElihudi ahamupapʼuEliyazali, uwenʼuEliyazali ahamupapʼuMatani, uwenʼuMatani ahamupapʼuYakobu,

¹⁶ uwenʼuYakobu 5 ahamupapʼuYosefu umulume wa Maliya, wʼamupafilʼuYesu wʼakwitwa ilya Chilisiti.

¹⁷ Vonti lelo mwe vapwanilinkine muluho ukufuma pa-Abulahamu ukufiha pa-Davidi valʼishumi navane, havili ukufuma pa-Davidi ukufiha pala pe vavasamizizye mu-Babeli valʼishumi navane, havili ukufuma pala pe vavasamizizye mu-Babeli ukufiha pa-Chilisiti valʼishumi navane.

Ukupapwa kwa Yesu

¹⁸ UkwenʼukupapwʼuYesu Chilisiti, shʼahonzizye vovulo. UwenʼuMaliya unyina lwʼamwimayʼuYosefu, lwʼashili nukupalamana nawo, pe vahagʼamwamile mumaha ga MupepʼuMufinjile.

¹⁹ Uwene nyenʼuYosefu umulume wakwe shʼali mugolosu, she muhati ahati ntamupasyʼinsoni apazelu, pʼahasiva muhati ahati nkumutavula kukwilu.

²⁰ Ilelo lwʼakusiva zinizi vovulo pʼahitushilʼuhavizya wa Mwene akuti: Yosefu we mwana-Davidi, utogopaje ukusendʼuMaliya umushi waho, shʼamwamile mumaha ga MupepʼuMufinjile.

²¹ Alipapʼumwanʼumwanaṿuli wʼulimupʼizina lya Yesu, shʼalivapohʼavantu vakwe kumalandu gavo.

²² Zyonti zinizi lelo zihinza ukuti mwe zilunjihaje zizyo zyʼuMwenʼayanzile mumukuvwi wʼakuti:

²³ Yenya, umulindu alimwama, alipapʼumwanʼumwanaṿuli, we valimupʼizina lya Imanweli, lye likuti uMulungu ali naswe.

²⁴ UwenʼuYosefu lelo lwʼavusile mutulo, pʼahalandata zizyo zyʼamuhomelezizyʼuhavizya wa Mwene, ahasendʼumushi wakwe.

²⁵ Ahasitʼukumumanya suti ukufiha pʼahapapʼumwana wakwe umwanaṿuli wʼahamupʼizina lya Yesu.