Maliko 6 - Tesitamenti Umupwa 1965

UYesu akuhanya mu-Nazaleti

¹ Pʼahepa pupo ahavala munkaya mwʼakuliye. Avasundikwa vakwe vahamulandata.

² Ilelo lwe lifisilʼisabati, pʼuwenʼahandʼukuvasambilizyʼavantu musinagogi. Avene vamʼavinji ve vahatejelezyaga vahasukumila, vahati: Zyʼazyazile kwi zinizi? Zye njele vuli zyʼali nazyo? Ge mamfindango vuli gʼakupela munyove zyakwe?

³ Amwʼate wuyo we muselemala, we mwana wa Maliya we wamwavo wa vaYakobu nuYose nuYuda nuSimoni? Avanavavo avalindu tute navo panapa? Pe vahapunula muli wuyo.

⁴ UwenʼuYesu ahavavuzya ahati: Umukuvwi atakusovʼumushinzi nkandi kwe kumwavo nakuvaenzi vakwe na munyumba yakwe.

⁵ Ahasita nukupela numʼumumfindango wa maha mumwo, heka he ha kuvihʼinyove vamʼavapotwe aha kuvazuzuvushizya.

⁶ Ahasukumila she vatali nulwitiho nalumo. Pʼahavala munkaya zyonti mwe zizyunguluye, ahavasambilizyʼavantu.

Avapositili ishumi navavili nukukumusyʼintumi kwavo

⁷ Ahavitʼavishumi navavili, ahavasogozya nkuvatuma Ukwo vavili Ukwo vavili. Ahavapa namaha aga kuvinjilʼimpepʼinkandamanu.

⁸ Ahavavuzya ahati: Mutasende naṿimo iṿwa kujenda naṿwo mwidala, ye ndisa yeka ye musendaje. Kwe ndali ukupayʼimpayo, ye ndali imbugulu, twe ndali utwahela mumalamba.

⁹ Nkandʼindyato zye muzwalaje kuṿinama. Amashati ge ndali ukuva gavili.

¹⁰ Ahavavuzya ahati: Ninyumba yenga mukwinjila mumwo, mwe muhakate mumwo, muhafishe pupo lwe mukuvuhʼukusogola nzila.

¹¹ Mwonti mwenga vakusitʼukuvaposhelʼimwe nukutejelezya zye mukuyanga, pe muhafume mumwavo, muhavakunyuntile nulusuto lwa kuṿinama ṿwinyu, zye zivanje zya kumanyila mumwʼavene.

¹² Pe vahavala, vahapangʼilya kuti simupinduhaje.

¹³ Vaha-fumwa nimpepʼimbivi zye nyinji nkani, navapotwe vahavapaha namafuta, ilelo pe vahazuzuvuha.

Ukufwa kwa Yohani umwozyi

¹⁴ Wope nuHelodi umwene ahiṿwa zinizi, shʼizina lyakwe lyakumusile. Ahati: WʼuYohani umwozyi, azyusile kuvafwe, mwe mumwo mwʼakupelʼamamfindango ganaga.

¹⁵ Vamo vahati wʼuEliya, vamo vahati mukuvwi ali fwe vakuvwi va lulwo.

¹⁶ UwenʼuHelodi lwʼayiṿuye pʼahati: UYohani we namudumuyʼitwe, azyusile kuvafwe.

¹⁷ ShʼuHelodi atumilʼavantu ukulemʼuYohani, ahanawigalila mujela pamulandu wa Helodiya umuha wa wamwavo uwa Filipu. Shʼamusenzite.

¹⁸ ShʼuYohani amuvuzizye atili: Zye mwiho ukuva nawʼumuha wamwinyu iwe.

¹⁹ PʼuHelodiya ahamufinjilagʼukumugoga, nkandi ahapotwa.

²⁰ ShʼuHelodi ahamunyilʼuYohani, shʼamuwenyi ukuvʼumuntʼumugolosu umufinjile. Shimʼahamusunga. Lwʼafumilʼukwiṿwa zyʼamuvuzizyʼuYohani, pʼahazilandata zye nyinji. Ahaseshelaga pakumutejelezya.

²¹ Lumo pe lihinzʼisikʼilyinza. ShʼuHelodi avisitʼavahombe vakwe navatwale va vulugu navanamfumu va mu-Galilayi ukulyʼiṿintu pachaka wa kukumbushilʼukupafilwʼuwene.

²² Pʼumwana-Helodiya umulindu ahinjila, ahapunzʼingʼoma, ahahondela nakwa Helodi nakuli vonti ve vatendime nawʼukulyʼiṿintu. Pʼumwene ahamuvuzyʼumulindu ahati: Lavaga hamo kukwane, nashenga ṿwonu ṿwengʼukasimʼukulava, nkukupa.

²³ Ahamulapila ahati: Ṿwonu ṿwengʼukulava nkukupa, nashenga nyusu ya vumwene vwane.

²⁴ Uwenʼahafuma kunzi ukumuvuzilizyʼunyina, ahati: Ndave shonu? Wuyo nyenʼahati: Itwe lya Yohani umwozyi.

²⁵ Ahashimbilʼukuvala mwʼalʼumwene, ahati: Nkulava nkuti mpanga shinishi vovulo itwe lya Yohani umwozyi pibeseni.

²⁶ Pʼumwene ahaswimililwa nkani. Ukwene nyene shʼafisilʼalafile, she nukwiṿwa viṿuye vuvo vʼahalya navʼiṿintu, pʼahanyilʼukuhana.

²⁷ Pʼumwene ahamutumʼumusinjala, ahati: Valaga, usendʼitwe lya Yohani. Wʼahavala, ahadumulʼitwe lyakwe mujela.

²⁸ Ahaletʼitwe lyakwe pibeseni, ahamuninchilizyʼumulindu. Uwenʼahavalʼukumupʼunyina.

²⁹ Ilelo lwe viṿuyʼavasundikwa vakwe, pe vahavalʼukusendʼiṿimba lyakwe, vahaliviha mumbipa.

Ukugaluha kwa vapositili

³⁰ Pʼavapositili vahavungana pupo pʼalʼuYesu, vahamuvuzya zyonti nazye vavomṿile nazye vasambilizizye.

³¹ Uwenʼahavavuzya ahati: Shushi, tuvale tuyelelesile mulwugwa mula, mwe muhatuzye hamo. She valʼavantʼavinji ve vahasusuntaga shima ukumutunjilʼuwene. Mwe mumwo nukulya vatahalyangʼahinza.

³² Pe vahalamba mwivoti, vahavala mulwugwa mwe vahayeleleha.

³³ Avenʼavantu ve vinji vahavalola lwe vakwepa, vahavamanya, pe vahafuma munkaya zyonti, vahapimpila niṿinama ukuvala kula, vahatalihʼukufiha kuli vuvo.

³⁴ IlelʼuYesu lwʼakuzuva pʼahenyʼavantʼimpugʼimpiti. Pʼahavapepelezya, she vali fwe ngʼonzi zye zite numudimi. Pʼahandʼukuvasambilizyʼinyinji.

UYesu akulisya avantu 5,000

³⁵ Vahalinga lwe vwiliye shamazuva avasundikwa vakwe, pe vahapalamila kukwakwe, vahati: Mwe mulwugwa munumu, vwope nuvusiku vwiliye,

³⁶ uvavwezyajʼavantu, vavale muṿwegwi mwonti namunkaya zyonti, kwe vayikalilʼiṿwa kulya.

³⁷ Uwenʼahamula ahati: Simuvapanje mwenemwe iṿwa kulya. Avene vahati: Ingavanga tuvalʼukuvakalilʼiṿintu ṿwa kulya pamadinali 200, inga pe tuvapanjʼiṿwa kulya?

³⁸ Uwenʼahavavuzilizya ahati: Muli namakati galinga? Valaji mwenye. Pe vahavalʼukwenya, vahati: Gasano, ninswi zivili.

³⁹ Ahati: Simuvavuzye vonti vatendame pansi muvulilo muvulilo mwisolʼilyolo.

⁴⁰ Pe vahatendama vahava mundongo mundongo, ukʼamashumʼishumi, ukʼamashumi gasano.

⁴¹ PʼuYesu ahasenda ge makati gasano gugo nazye nswi zivili, ahenya kumwanya, ahaputa. Pʼahamensulanyʼamakati ganaga, ahavaninchilizyʼavasundikwa vakwe, ve vahavapʼavantu. Zyope ninswi zivili ahavagavanya vonti.

⁴² Vahalya, vahikuta vonti.

⁴³ Vahavunganihʼiṿwalila, ṿihizulʼiṿisejʼishumi naṿivili, twope nutuswi twe twasyaye pupo.

⁴⁴ Avene ve valiyʼamakati ganaga vali 5,000, ukuvazya ve vanaṿuli veka.

UYesu akujenda pasumbi pamwanya

⁴⁵ PʼuYesu ahavalongolezyʼavasundikwa vakwe, ahati: Simuyipashile mwivoti, mutalishʼimwe ukulamba ukuvala mu-Betisayida isyila lila. Nkuvavwezya sutʼavantʼiva.

⁴⁶ Ilelo lwʼalagine navo, pʼahazuva pigamba ukuputa.

⁴⁷ Ilelo lwe vwiliye shamazuva, pʼivoti lyavo lyali pahati pasumbi. Uwenʼahava weka isyilʼili.

⁴⁸ Ahavenya, ahaga vakulwa namavilingwa ukujenzyaʼivoti, shʼinkungu yafumile kwe venyizye. Uwenʼahalinga pahavalilizyo ha vune, mwe vakuvazizya ve vakusunga pavusiku, ahavinzila, ahahanya pamwanya pasumbi ukujenda. Ahati mbashile.

⁴⁹ Avene lwe vamuwenyʼakujenda pamwanya pasumbi, pe vahati muhati ukuti she shitumbu, pe vahakuta.

⁵⁰ She vamuwenyi vonti, vahatentwa vonti muhati. Naluvilo uwenʼahayanga navo ahati: Simujimbaje, she nene, kwe ndali ukutetema.

⁵¹ Ahayipashila mwivoti mwe vali. Pʼinkungu yihategama. Pe vahatentwa muhati, vahasukumila nkani.

⁵² She vatazyazilʼinjele mumakati gala, shʼamoyo gavo gagomile.

Ukupola kwa vantu mu-Genesaleti

⁵³ Ilelo lwe valamṿile pe vahavalʼukufiha munsi ya mu-Genesaleti, mwʼivoti lihasulila kushipuma.

⁵⁴ Ilelo lwe vafumile mwivoti, pʼavantu vahamumanya luvilo,

⁵⁵ vahasavalila mwonti mwizyunguluye iya mumwo, vahavanyatula pamazagala vontʼavapotwe, vahavaleta kwe viṿuye ukuti ali kula.

⁵⁶ Mwonti mwʼahajendaga namunkaya, namumalinga, namuṿwegwi, mwonti vahavaviha pamasolo avayeyevazu, vahalambilizya kukwakwe vahati: Tulingajʼukulemʼinkanzu yakwe kuvupinte; ilelo vonti vuvo ve vayilemile, ve vahazuzuvuha.