Maliko 4 - Tesitamenti Umupwa 1965

Ishiholanyo sha mupesambeyu

¹ Pʼahavuyizya nohavili ahavasambilizyʼavantu kushipuma sha sumbi. Pe vahavungana pʼali avantʼavinjʼimpuga. Mwe mumwo ahayipashila mwivoti lye lyali muminzi, mwʼahatendama. Avenʼavantʼimpuga yonti vahazinga kushipuma sha sumbi.

² Pʼuwenʼahavasambilizyʼinyinji, ahayanjila muṿiho-lanyo. Ilelʼapene lwʼakuvavuzya munsambilizyo zyakwe pʼahati:

³ Simutejelezyaje. Yenyi, lumʼumupesambeyu ahavalʼukupesʼimbeyu yakwe.

⁴ Ayazile lelo lwʼakupesa pe yokʼimbeyu yihagwa mwidala. Pʼinyunyi zihafiha zihamalilizya nzila.

⁵ Yokʼiyamwavo yihagwa pansi ya mavwe mwʼintopʼitalʼinyinji. Yʼihamela luvilo luvilo, shʼintopʼitalʼinyinji.

⁶ Ilelo lwe litukuyʼizuva, pʼihafwoha, ihuma shʼitali namazi.

⁷ Yokʼiyamwavo yihagwa mulwangwa, lwe luhamelʼulwangwa luhajenda nukuyibuda, pʼihasita nukuhomʼinsanga.

⁸ Izyamwavo nyene zihagwa pansʼinyinza, zihamela, zihaṿula, zihahomʼinsanga; yokʼamashumi gatatu, yokʼamashumʼumutanda, yokʼamashumʼishumi.

⁹ Pʼuwenʼahati: Uno wengʼamakutwi ali nago, wʼatejelezyaje.

¹⁰ Ilelo lwʼayelelesile, pʼavene ve vali nawo poka navishumi navavili vahamuvuzilizyʼizya ṿiholanyo.

¹¹ Uwenʼahavavuzya ahati: Mwemwe mupelilwe ukuti muzimanye nizya vuzigizigi izya vumwene vwa Mulungu, avenʼavakunzi vala nyene zyonti zikuvinzila muṿiholanyo, ukuti

¹² Nashenga vali nagʼaminso aga kwenyelezya, pope pakuti vatangalola nazimo, nashenga vali nagʼamakutwi aga kutejelezya, pope vatangazimanyinsanya nazimo, nukupinduha vatangapinduha nalumo, nimbivi zyavo ukuti zitaswilwaje nalumo.

¹³ Havili ahavavuzya ahati: Inga shivapositʼukushimanyʼishiholanyo shinishi, pʼiṿwamwavo muliṿimanyinsanya vuli?

¹⁴ Ywʼakupesʼumupesi lye lizwi.

¹⁵ Ve vali mupipi nidala mwʼizwi lipesilwe, ve vuvo ve viṿuye, pʼatakuhavʼuSetano ukwinza ukusompolʼizwi lye lipesilwe mumoyo gavo.

¹⁶ Nava nyene ve vaholine naye yʼipesilwe pansi ya mavwe, ve vuvo venga viṿuyʼizwi, pe vakujenda nuluseshelo ukuliposhela luvilo luvilo.

¹⁷ Nkandi amazi ga muhati vate nagamo, Ilelo vakudila hansi vwelele. Pisinda ingʼizwi livapeleyʼuvupatwe nuvuṿwimilwa she vali nalyo, pe luvilo vakupunula.

¹⁸ Avamwavo ve vapesilwe mulwangwa, ve vuvo ve vakwiṿwʼizwi,

¹⁹ pe havili nulukutano lwa munsʼino, nuvusheṿu vwa vudumbwe, nuvupapila ṿwonti vwe vukwinjila muhati yavo, vwe vukubudʼizwi, ilelo pe ninsanga zikusitʼukwela.

²⁰ Avene nyene ve vapesilwe pansʼinyinza, ve vuvo ve vakutejelezyʼizwi nukuliposhela, ilelo pe vakujenda nukuhomʼinsanga; wokʼamashumi gatatu, wokʼamashumʼumutanda, wokʼamashumʼishumi.

Insambilizyo ukufuma mushiholanyo sha nyale nisha mbeyu

²¹ Havili ahayanga navo ahati: Inyale yikwinza amwe ikupishililwe mushitundu amwe yivisilwe mwizyungululu lya shitala? Yitakuvikwa pashilemo sha nyale?

²² She zyonti zyenga ziṿwamile ziliṿumbuha inga lumo, Zyope nazye zili kukwilu zyonti zililolehʼapazelu.

²³ Uno wengʼali nagʼamakutwi aga kutejelezya, wʼatejelezyaje.

²⁴ Havili ahavavuzya ahati: Mwandaje zye mukwiṿwa. Ishifinjilo shisho she mukulinjilʼimwʼavanji, she mulilinjilwa shisho namwenemwe, havili muliyonjelezelwa.

²⁵ Shʼuno wengʼali naṿwo yimo, wʼalipelwʼiṿwamwavo. Nkandʼuno wengʼate naṿwo naṿimo, we shikusompolwa nashʼali nasho.

²⁶ Havili ahati: She vuhonzizye vovulo uvumwene vwa Mulungu, vuli fwe muntu wʼakupesʼimbeyu yakwe mumugunda wakwe.

²⁷ Pʼuwenʼahakata nukudamuha nashavusiku nashamusanya. Iyenʼimbeyu ihamela nukukula uwene lwʼatayiwenyi.

²⁸ Shʼinsʼikuvomba yeka lwʼikupelʼinsanga; isutʼumulemṿwe, pʼikupwanizyʼamatwe, ilelo pʼikupela ninsanga zye zikwizula mumatwe.

²⁹ Apene nyene pengʼayazilʼinsanga zyeleye, pʼatahavʼukutumʼumufwu, shʼimṿuno yifisile.

³⁰ Havili ahati: Uvumwene vwa Mulungu tutinji vuli fwe shonu? Tushaje kwi ishiholanyo isha kuyanjila mumwo?

³¹ Vuli fwe hasanga ha muzimwa. Shʼahene lwʼumuntu akuvwala mumugunda, pe hakuva hansi kunsanga zyonti munsʼumu.

³² Nkandi lwʼumuntu ahavwaye, pe hakukula, hakulusya ṿwontʼiṿiyavo ṿwamwavo, hakutenga ninsambʼimpiti, ilelo pe ninyunyi zya kumwanya zikujenda nukutenjelʼiṿisanzo munzunda yakwe.

³³ Lwʼahavavuzya vovulʼinongwa, pʼahayanjila muṿiholanyo ṿwe ṿwinji, ahalinga panjele zyavo izya kuzimanyinsanya.

³⁴ Ukwenʼukuyanga vwelele, kwʼatahayanga nazimo. Zyonti zyʼahavavuzyaga zyʼahaziyanjila muṿiholanyo. Avenʼavasundikwa vakwe nyene vʼahavilulila zyonti lwʼayelelesile navo.

UYesu akupililʼinkungu 35-41: Mat. 8,18-27. Luk. 8,22-25.

³⁵ Musanya wuyo shamazuva, pʼahavavuzyʼavasundikwa vakwe ahati: Tulambʼisyila lila.

³⁶ Pe vahaleha pupʼimpuga ya vantu. Vahavala navʼuwene shʼali mwivoti, vahavuhʼukulamba. Gope naganjʼamavoti gahajenda nawo.

³⁷ Pʼihavuhʼinkungu impiti nkani. Amavilingwa gahadomoshela mwivoti, lihizula naminzi.

³⁸ Uwene shʼakasitʼutulo kushipulo asagamiyʼumusago. Pʼavene vahamuyinzya vahati: We Musambilizi, umwoyʼiwe utwaye kwi iwe, utakusajila she tukudwivʼiswe?

³⁹ Pʼuwenʼahavuha ahapililʼinkungu ahayanga nakwa sumbi ahati: Pumaga, uve mwa. Pʼinkungu yihategama nusumbi ahatehama.

⁴⁰ Ahayanga navo ahati: Lye lyoga vulʼimwe? Muli nishonu ukuva nulwitiho?

⁴¹ Pe vahatetema ishitetemwi ishipiti nkani, vahavuzilizanya vahati: Mwatinji wʼunanu wununo? She naye nkungu yikumusajila nusumbi vwelele.