Maliko 3 - Tesitamenti Umupwa 1965

Ukupola kwa muntu wʼinyove yakwe yumiye

¹ Pʼahavuyizya ahinjila nohavili musinagogi. Mwʼahamwagʼumuntu wʼumuhono wakwe ayumiye.

² Avene vahamutega vahati twenye ingʼakumuzuzuvushizya pisabati, ukuti vazyagaje pupo izya kumulonjelela.

³ Uwenʼahayanga kumuntu wʼumuhono ayumiye, ahati: Vuhaga, uyimililʼapazelʼipa.

⁴ Ahavavuzya ahati: Zyonu zihondeye pisabati? Nukuvombʼinyinza nukuvombʼimbivi, nukuzuzuvushizyʼumuntu nukugoga? Avene vahapuma mwa.

⁵ Uwenʼahatalanganya ukuvenya, ahaṿitwa. Havili uvugomu vwa moyo gavo vuhamupelela nahavwila. Pʼahamuvuzyʼumuntʼuno ahati: Golosyʼumuhono. Uwenʼahawugolosya. Pʼahanduhʼumuhono wakwe, ahava mwinza.

⁶ PʼavaFalisayi vahafuma kunzi, vahavalʼukuyangana navanyamata va Helodi, vahitinkana izya kuti tumugoje.

Ukupolʼukunji

⁷ Pe nuYesu navasundikwa vakwe vahavuhʼukuvala kwa sumbi. Avantʼimpugʼimpiti va mu-Galilayi vahamulandata; ukufuma namu-Yudayi,

⁸ namu-Yelusalemu, namu-Itumayi, namwisyila lila lya Yolidani, namunsi ya Tili niya Sidoni avantʼimpugʼimpiti, ve viṿuye zyʼapezile zyonti, vahamwinzila.

⁹ Uwenʼahayanga navasundikwa vakwe, ukuti vamwanzilʼahavoti aha kutendama mumwo, ukuti avantu vatatitilinkane nawo.

¹⁰ Shʼavazuzuvushizyagʼavinji. Pe vahamushimbilila vonti ve zyavavaṿizyʼimpotwe zyavo, vahati tumupalamansye.

¹¹ Zyope nimpepʼinkandamanu lwe zimuwenyi pe zihamugwila, zihapongomoha zihati: We Mwana wa Mulungu iwe!

¹² Uwenʼahazipilila nkani ahati: Mutankumusyaje.

UYesu akuvasavula avapositili ishumi navavili

¹³ Pʼahazuva pigamba ahavita vengʼakasime wuyo. Avene vahavala kukwakwe.

¹⁴ Ahavimihʼishumi navavili ava kuti vavanje poka nawo, ukuti avatumajʼukukumusyʼinongwa,

¹⁵ ukuti vavanje namaha ga kuvinjila impepʼimbivi.

¹⁶ Ahavimiha avʼishumi navavili: NuSimoni ahamupaʼizina lya Peteli,

¹⁷ nuYakobu umwana-Zebedayi, nuYohani umuzuna wa Yakobu, vʼahavapʼilya Bwanelegesi izina, ilya kuti vana-lujilimo,

¹⁸ nuAndeleya, nuFilipu, nuBalitolomayi, nuMatayi, nuToma, nuYakobu umwana-Alifayi, nuTadayi, nuSimoni wa mu-Kana,

¹⁹ nuYuda wa mu-Kalyoti wʼamwaniliye ulwa pisinda.

UYesu akwamula lwe vakuti akuvombʼimbombo kuvutuli vwa Setano

²⁰ Pʼahinjila munyumba. Mwe vahavungana nohavili avantʼimpuga, ve vahatitilinkana nawo, vahapotwʼukulyʼiṿintu.

²¹ Lwe viṿuye zinizi avajenzi vakwe, pe vahavala ukumulema, she vahati umwoyo akumupota.

²² Avenʼavamanyakalata ve vafumile mu-Yelusalemu vahati: Ali nuBelizibuli, Zyope namwa songo wa mpepʼimbivi akuzivinjilʼimpepʼimbivi.

²³ Uwene ahavavunganiha, ahavavuzya muṿiholanyo ahati: USetano woka wʼatinji amuvingaje vulʼuSetano uwamwavo?

²⁴ Uvumwene inga vululinkine vuvwo vutupu, pe vutakusimpʼuvumwene vuvwo.

²⁵ Yope ninyumba ingʼilulinkinʼinyumba yiyo ntupu, pʼitakusimpa.

²⁶ Wope nuSetano ingʼahalambine wuyo, ingʼalulinkine weka, pe wope atakusimpa ndali, pʼakusila.

²⁷ Numo atakwinjila munyumba ya wanguṿu ukusampʼiṿijela ṿwakwe ingʼatamukunzile sutʼumuhatasho. Nkandi ingʼamukunzile nzila pe fwane pʼasampaje iṿwa munyumba yakwe.

²⁸ Nalyoli nkuvavuzyʼine nkuti: Gontʼamalandu ge vakutalavantu gakuswilwa, gonti naga musamu inga vasamuye.

²⁹ Nkandʼuno wengʼamusamuyʼuMupepʼuMufinjile, wʼatakwaga nalumo lumo uvuswila ndali, uwenʼumulandu wakwe uno akuva wa shimashima.

³⁰ Zyʼahavavuzya she vatili ali nimpepʼimbivi.

Uvwanamuntu vwa nalyoli

³¹ Pe vahinza nunyina navanine, vahimilila kunzi, vahatumʼuwa kumwitʼuwene.

³² Ilelʼavantu vamuvisile pahati lwe vatendime nawo. Ve vahamuvuzya vahati: Yenya, nuvinyu navanino vali panapa, vakukwanza.

³³ Uwenʼahamula ahati: Umayʼinʼunanu, avamwitu ve vali kwi?

³⁴ Pʼahatalanganya ukuvenyʼavantu ve vamuzinganiye pʼatendime, ahati: Yenyi, wʼumayi, ve vamwitu ine vanava.

³⁵ Shʼuno wʼakuvomba zizyo zyʼakasimʼuMulungu, we wamwitu wuyo, we mwanawitʼine, we wʼumayi ine wuyo.