Maliko 15 - Tesitamenti Umupwa 1965

UYesu kwa Pilati, umusungansi wa shiLoma

¹ Pe vahalavila shanzanche, vahahomana navashiputʼavapiti navasongo, navamanyakalata navalonzi vonti, vahayangana. Pe vahamukungʼuYesu, vahavala nawo, vahamutwala kwa Pilati.

² PʼuPilati ahamuvuzilizya ahati: Amwe we mwene wa vaYudʼiwe? Uwenʼahamula ahati: Uyanzile wenewe.

³ Pʼavashiputʼavapiti vahamulonjelelʼutuntʼutwinji.

⁴ PʼuPilati havili ahamuvuzilizya ahati: Sutakwamula nalimo? Yenya, utuntʼutu twe vakukulonjelela!

⁵ UwenʼuYesu ahasita nukwamula nalimo. Pe wope nuPilati ahasukumila.

⁶ Shima pachaka pʼahava numwiho wa kuvatavulila umukungwa woka, wenga vamuseva vuvo.

⁷ Ilelo pʼali woka umukungwa we vatili uBalaba izina, wʼakunzilwe poka navamwavo ve vahahalambihʼinkaya, ve vagozile numuntu lwe vahalambisilʼinkaya.

⁸ Ilelo pʼavantʼimpuga yonti vahazuvʼukuvala kwa Pilati, vahati: Ututavulile wokʼumuntu nashinishi, inza shʼukuhonzyaga.

⁹ UwenʼuPilati ahamula ahati: Ngavanga mukwanza ukuti imbatavulilʼumwene wa vaYuda?

¹⁰ Shʼavamanyilʼavashiputʼavapiti ukuti havatumile he hafwishi lwe vamulonjeleye kukwakwe.

¹¹ Avenʼavashiputʼavapiti vavapiyʼinkama nzilʼavantu, vatili muhatinji: UtutavulilʼuBalaba.

¹² UwenʼuPilati ahavuyizyʼukuvavuzilizya ahati: Imuhonzye vuli, uno we mukuti wʼumwene wa vaYuda?

¹³ Pʼavene vahapongomoha havili vahati: Umuhomele pashihovenkanyo.

¹⁴ UwenʼuPilati ahati: Atazile malandu vuli? Avene pe vahonjezya ukupongomoha nkani vahati: Umuhomele pashihovenkanyo.

¹⁵ UwenʼuPilati lelo ahati mbombe zye vakasimʼavantu, pʼahavatavulilʼuBalaba. Nkandi ahavaninchilizyʼuYesu lwe vamuhoma ukuti ahomelwe pashihovenkanyo.

Avasikali vakumwizizyʼuYesu

¹⁶ Pavasikali vahavala nawo muluvungano, lwe luli munyumba ya vulonzi, vahamwitililʼimpuga yonti.

¹⁷ Vahamuzwihʼinkanzu inchemamu, vahatava nishipambwi sha lwangwa, she vahamuviha kwitwe.

¹⁸ Vahandʼukumulamuha, vahati: Tukukulamuha, we mwene wa vaYuda.

¹⁹ Vahamuhoma nitete pitwe, vahamuswila namati, vahamusugamilila, vahamushindiha.

²⁰ Ilelo lwe vamusufizye vovulo, pe vahamuzulʼinkanzu inchemamu ila, vahamuzwihʼagakwʼamenda havili. Pe vahavala nawo ukumuhomela pashihovenkanyo.

Ukuhomelwa kwa Yesu

²¹ Vahamulema wokʼumuntu, izina lyakwe ali wʼuSimoni wa mu-Kileni, uyise wa vaAlekizanda nuLufu, wʼafumile kumugunda wakwe atili mpitilile. We vahamusinjilizya vahati: Umunyatulilʼishihovenkanyo shakwe.

²² Vahafiha nawo pe vakuti pe pa-Goligata, lye likuti pe Palupanga.

²³ Vahati tumungʼwesyʼipele lya mampensya lye vasanginye numulembo wa mila. Uwenʼahahanʼukuposhela.

²⁴ Ilelo lwe vamuhomeleye pashihovenkanyo, pe vahilihʼishili ukugavanyʼamenda gakwe, shihayanga she shili ukutʼushitʼulive akusendʼahantʼahalivʼiha.

²⁵ Ukwenʼukumuhomela pashihovenkanyo kwe vamuhomeleye pahavalilizyo ha vutatu.

²⁶ Gope namalandu ge vamugojeye vahagasimba, vahagaviha pamwanya, vahati: wuyo we wʼumwene wa vayuda.

²⁷ Vahavahomela poka nawo navagogavantu vavili, woka kumuhono wakwe umulilo, woka kumuhono wakwe umumongo.

²⁸ Mwe mumwo mwe zyinzilʼizya mwa kalata wʼatili: Vamusanginye navatalamalandu.

²⁹ Ilelo vonti ve vahatuhaga pupo vahamusamula, vahayinzya namatwe gavo, vahati: Oho! We umanyilʼukumongolʼutempeli, havilʼukuzenga umupwa kumanda gatatu.

³⁰ Shinishi uyiposhe weka, uyishe pashihovenkanyo!

³¹ Vope navashiputʼavapiti navamanyakalata vovulo, vope vahitinkana ukumuholela, vahati: Avanji avapohaga shima, nkandʼakupotwa ukuyipoha weka.

³² WʼuChilisiti, wʼumwene wa vaYisilayili, ayishe pashihovenkanyo lelo, naswe tusukumile lelo, twitishe. Vope nava ve vahomelilwe poka nawo, vope vahamupupusya.

Ukufwa kwa Yesu

³³ Pe shihalinga pahavalilizyo ha mutanda, pʼishisi shihagwa insi yonti, shihavalʼukufiha pahavalilizyo ha vusano navune.

³⁴ Ahalinga pahavalilizyo ha vusano navune uYesu ahavilishilʼizwʼipiti ahati: Eloyi, Eloyi, lama sebakatani? lye likuti: we Mulungu wane, we Mulungu wane, undesile shonu?

³⁵ Vamo nyene ve vali pupo lwe viṿuyʼizwi linili, pe vahati: AkumwitʼEliya.

³⁶ Pe wokʼahashimbila luvilo luvilo, ahasendʼahenda, ahahatumpiha mwasiki, ahahafwiha mwitete, ahamungʼwesya. Ahati: Yiṿwi, twenye ingʼakwinzʼukumupohʼEliya.

³⁷ UwenʼuYesu ahavuyizyʼukuvilishila izwʼipiti, pʼahasililishila.

³⁸ Pe numwenda we vapituye mutempeli, pʼahazepunkana, ahataliha kumwanya, ahavalʼukufiha pansi, ahayipelʼukuva gavili.

³⁹ Uwenʼumutwale wa vasikali, wʼayimiliye pupo wʼalungamine nawo, lwʼawenyi lwʼakufwa vovulo, pʼahati: Nalyoli, we Mwana wa Mulungu umuntu wununo.

⁴⁰ Vali pupo navantandʼahapuga, ve vahenya she vatantamine. Vali uMaliya wa mu-Magadala nu-Maliya unyina wa vaYakobu umunsi nuYose, nuSalome.

⁴¹ Ve vuvo vamulandite lwʼali mu-Galilayi, ve vahamuvombelaga, navamwavo ve vinji ve vazuṿile nawo lwʼakuvala mu-Yelusalemu.

Ukusyilwa kwa Yesu

⁴² Ilelo lwe vwiliye shamazuva pisiku lya kuyananya, lye likulongolela lwʼisabati ishili,

⁴³ pʼuYosefu wa mu-Alimatiya umuhombe umwimishilwa, we wope ahagulililʼuvumwene vwa Mulungu, wʼahayitumpiha ahinjila kwa Pilati, ahalavʼiṿimba lya Yesu.

⁴⁴ UwenʼuPilati ahasukumila lwʼayiṿuyʼukuti afuye hali. Pʼahamwitʼumutwale wa vasikali, ahamuvuzilizya ahati: Afuye hali, vati?

⁴⁵ Ilelo umutwale wa vasikali lwʼamuvuzizye, pʼahamupʼiṿimbʼuYosefu.

⁴⁶ Uwenʼahavalʼukukalʼumwendʼumuzelu, ahamwisya, ahamupinya mumwendʼuno, ahamuviha mumbipa ye vadiṿile mwiyalavwe, ahagalagasyʼivwe ahaliviha kushilyango sha mbipa.

⁴⁷ AvenʼavaMaliya wa mu-Magadala nuMaliya unyina wa Yose vahenya mwe vakumuviha.