Maliko 13 - Tesitamenti Umupwa 1965

UYesu akukuvwa izya lunanjiho lwa tempeli nukusililishila kwa nsi

¹ Ayazile lwʼakufuma mwa tempeli, pe wokʼumusundikwa wakwe ahati: We Musambilizi, yenya, namavwʼiga ninyumbʼizʼuvwinza!

² UwenʼuYesu ahamula ahati: Uziwenyʼinyumbʼimpiti zinizi? Nalimʼivwe litalileshelwa pivwe lyamwavo isitakumongoha.

³ Ilelo lwʼavazilʼukutendama pigamba lya Mavula lwʼakulungamana nutempeli, pe vahamuvuzilizya avaPeteli nuYakobu nuYohani nuAndeleya ve vayelelesile nawo, vahati:

⁴ Utuvuzyajʼisiku lya kwinzila zinizi lili kwi? Nishimanyilo sha kumanyila mumwo ukuti zyinzile zyonti ukuti zisilaje, she shili vuli?

⁵ PʼuYesu ahandʼukuvavuzya ahati: Mwandaje, mwenye numo atavapuṿwaje.

⁶ She valiyinzʼavinji, valijendela mwe mwizina lyane, valitinji: Nene ne Wuyo; valipuṿwʼavinjʼavantu.

⁷ Inga lumo inga mwinzilʼukwiṿwa nuvulugu ninkolo ya vulugu, pe mutahagandushe, she zye pakuti zitali she ukuloleha zinizi, izyene nyene izya kuvumalilishilo lwe zishili suti.

⁸ She nuluho lwoka lwa vantu lulihalambihʼuluho ulwamwavo, nuvumwene vwoka nuvumwene vwamwavo; nukuyingʼinsi kuliyinga munsi munsi, ninzala yiligwanga. Zyonti zinizi nyene vwe vwando vwa kuvavwa.

9-13: Mat. 10,17-22. Luk. 21,12-17.

⁹ Mwandaje lelʼimwe, she valivatwalʼimwe pamalonjelwi namumasinagogi mulihomwa, mulivikwa nakuvapiti nakuvamwene pe pazyʼizina lyane. Zye zya kumanyila mumwʼavene.

¹⁰ NkandʼIvangeli lye pakuti isuti likumukwaje kunkolo zyonti.

¹¹ Apene nyene penga vakuvakunga nukuvalonjelela kuvalonzi, pe mutakutanaje nzila ukuti amwe tuyanje tutinji vuli, ndali, zizyo zyenga mwazile avapiye Wuyo pahavalilizyo huho, zye muyanje zizyo. She mutaliyanga mwenemwe ndali, aliyangʼuMupepʼuMufinjile.

¹² Vope navanamuntu valilonjelelana vuvo vatupu ukwambililana kukwo kwe vakugojelwa, wope numuntʼuyise alimwambilila kukwʼumwana wakwe, vope navana valilulihʼavapafi vavo, valivagoga.

¹³ Vontʼavantu valivapatʼimwe, she muli nizina lyanʼine. Nkandʼuno wʼakujimbilila nakuvusililo wʼalipona.

¹⁴ Inga lumo inga muvazilʼukwaga pavufinjile vapangulinye, vimisile zye zilʼumwiho mwe Zitahondeye—uno wengʼakuzyaga pakalata zinizi wʼamanyinsanyajʼahinza—pe vahashimbilile mumagamba vonti ve vali mu-Yudayi.

¹⁵ Uno wengʼali panyumba pamwanya, wʼatishe, wʼatahinjile mumwo ukusenda yimo munyumba yakwe.

¹⁶ Nuno wengʼali pamugunda wakwe, wʼatagalushile mwisinda ukusendʼinkanzu yakwe.

¹⁷ Ye mwe vantanda pamanda gala namwe mumwamile namwe mukwonsyʼavana!

¹⁸ Muputaje nyene izya kushimbilʼimwe ukuti zitavinzilaje lwe lupepo.

¹⁹ Uvupotwe vwa musanya wuyo vuliva vupiti, vusitakuva nuvwamwavo mwʼatalisilʼuMulungu ukupelʼinsi ukufiha nakushinishʼuku, uvusitakwinza nuvwamwavo napisinda.

²⁰ UMulungu ingʼasitagʼukudumulʼamanda gugo, pe nkandi numʼumuntu atakupona. Nkandʼaligadumulʼamanda gugo uwene, avasavulwa vakwe vʼavasavuye ukuti vapone.

²¹ Musanya wuyo inga mwazile wokʼakuvavuzya akuti: Yenyi, uChilisiti uyʼukwo, ali kula, pe mutahitihaje.

²² She pe valiloleha avachilisiti avashifumbo navakuvwi avashifumbo, valipelʼamamfindango namayele aga kulingʼukuvatezya nave vasavulwa.

²³ Nkandʼimwe mwandaje. Yenyi, ntalisile nzila ukuvavuzyʼimwe zyenezyo.

²⁴ Lwe vafumilʼukuyimbʼuvupotwe vwa manda ganaga avantu, pe nizuva liliyilupa numwezi alilehʼukulama.

²⁵ Zyope ninzota zililagala kumwanya, gope namaha ge gali kumwanya galiyugumbana.

²⁶ Pe valimwenyʼuMwanamuntu mumavingo, lwʼakwinza namahʼaminji nuvupiti.

²⁷ Pʼalitumʼavahavizya vakwe ve valivunganihʼavasavulwa vakwe, valifuma navo kunkungu zye zine, vonti ukufuma kuluvazu lwoka lwa nsi ukuvalʼukupela kuluvazu lwa kwivingo.

Ukuyisenganya shima

²⁸ Simusende ishiholanyo mwituvu. Lwʼinsamba zyakwe mukwaga zifufuye, zilemṿile nukulembʼamatundʼamolo, pe mukumanyila mumwʼishisuku ukuti shipalamiye.

²⁹ Vovulo lelo namwenemwe inga muziwenyi zyonti zinizi ukwinza, pe mumanyile mumwo ukuti zyinzile zili kushilyango.

³⁰ Nalyoli nkuvavuzyʼine nkuti: Avantʼavashinishʼiva vataliyepa vonti lwe zitapezilwe zyonti zinizi.

³¹ Niya kumwanya niya pansʼinsi zye zikwepa, nkandʼamazwi gane ge gataliyepa nalumo.

³² Ilyenʼisiku lila nyene nahavalilizyo hanaha, he numo atahamanyile, nga ve vahavizya va kumwanya, nga Mwana, nkandi we Tata weka.

³³ Mwandaje lelo, mudamule, muputaje, she mutamanyilʼumwaha.

³⁴ She zihonzizye fwe ngati zya muntu wʼavusilʼukushula, wʼakufuma munyumba yakwe, wʼakuvihʼavanyamata vakwe, akuvapa nimbombo unʼiyakwe, unʼiyakwe; wope numusungashilyango akumulajizya nkani ukuti adamule.

³⁵ Mwe mumwo mudamulaje, she mutamumanyile mwʼakwinzilʼumuhatanyumba, ukuti ngavanga shamazuva, ingavanga pavusiku pahati, ingavanga pankanda lwe zikutema, ingavanga shanzanche;

³⁶ ukuti lwʼakwinzʼapashezi atahaje mukasite.

³⁷ Izyene zye nkuvavuzya mwenemwe, zye nkuvavuzya vonti nzila, nkuti: Mudamule!