Maliko 1 - Tesitamenti Umupwa 1965

¹ Uvwando vwʼIvangeli lya Yesu Chilisiti uMwana wa Mulungu.

UYohani umwozyi nukukumusya kwake

² Inza she lisimvilwe mwa Yesaya umukuvwi: Yenya, nkukutumilʼuhavizya wane uwa kulongolela kwilongolela kukwaho, wʼaliyananyagʼidala lyaho.

³ Izwi lya muvilishizi mulwugwa likuti: Simuyananye nidala lya Mwene, mugolosye nutuswatuho twakwe.

⁴ Ali mulwugwa uYohani ahavozyʼavantu, ahakumusyʼulwozyo lwa lupinduho lwe lukuti mukuposhelʼuvuswila vwa malandu.

⁵ Ilelo vahafuma mumwavo ukuvala kukwakwe insi yonti ya Yudayi nava mu-Yelusalemu vonti, ahavozya mwijenje mwa Yolidani, vahaṿumbulʼamalandu gavo.

⁶ UwenʼuYohani ahazwalagʼinkanzu ya vusepe vwa ngamila, ahayifungagʼilamba lya luhova mumusana. Ahalyanga numakanta nuvwushi vwa nzushi.

⁷ Ahakumusyʼinongwa ahati: Mwisinda mumwane mwʼakwinzʼuno wʼandusizye namahʼine, we ntahondeye nukwinama ukusatulʼutuhova twa mundyato zyakwe ine.

⁸ Ine mbozizye nage minzi, uwene nyene alivozezya nawʼuMupepʼuMufinjile.

Ukwozelwa kwa Yesu

⁹ Ilelo pe mumanda gugo, pʼuYesu ahafuma mu-Nazaleti ya mu-Galilayi, ahavala kwa Yohani, wʼahamwozya mwa Yolidani.

¹⁰ Naluvilo lwʼakufuma muminzi, pʼahaga kumwanya kukwiguha, ahagʼuMupepo ahamwishila ngati nkunda.

¹¹ Nizwi likufuma kumwanya likuti: We Mwana wane unkundwa, we nkuseshela kulʼiwe.

Ukulingwa

¹² PʼuMupepo atahahava ukumusogozya ukumutwala mulwugwa.

¹³ Mwe mulwugwa mwʼahalindʼamandʼamashumi gane. PʼuSetano ahamulinga. Ahizya niṿikoko ṿwa mwilala. Navahavizya vahamuvombelagʼimbombo.

UYesu akwandʼimbombo yakwe

¹⁴ Ayazile lelo vamulemilʼuYohani, pʼuYesu ahavala muGalilayi ahakumusyʼinongwa izya kupulumushila mumwo izya Mulungu,

¹⁵ ahati: Umwaha ayinzile, uvumwene vwa Mulungu vwinzile, vuli papipi. Simupindushe, mwitishʼinongwa zyʼIvangeli.

Ukwitwa avasundikwa vakwʼavalanzi

¹⁶ Ilelo lwʼakupitilila papipi kushipuma sha sumbi wa muGalilayi, pʼahavaga nuSimoni nuAndeleya umuzuna wa Simoni lwe vakutajilʼulwelo lwavo mwa sumbi. She vali vaṿuṿi.

¹⁷ PʼuYesu ahavavuzya ahati: Simundandate mwisinda, nkuvapelʼukuva mwe vaṿuṿi va vantu.

¹⁸ Pe vahalela pupʼinyelo zyavo luvilo luvilo, vahamulandata wuyo.

¹⁹ Ilelo lwʼapitiliye hansi, pʼahavaga nuYakobu umwana-Zebedayi numuzuna wakwʼuYohani lwe vakusopʼinyelo zyavo mwivoti.

²⁰ Vope luvilo ahavita. Pe vahaleha mwivoti nuyise Zebedayi navapambombo, vahamulandata wuyo.

UYesu akumupozya mua mpepʼimbivi mu-Kapelinahumu

²¹ Pe vahajenda vahavalʼukufiha mu-Kapelinahumu. Ilelo pisabati pʼahinjila musinagogi, ahavasambilizya.

²² Pe zihavahola muhati zyʼahavavuzyaga, she lwʼahavasambilizya pʼalolehagʼuwene ukuva we muhatamaha, atahayanga fwe vamanyakalata.

²³ Pe vahitushilʼali musinagogi yavo umuntu wa mpepʼinkandamanu akupongomoha

²⁴ akuti: Tuli vuli naswe nawe we Yesu wa mu-Nazaleti? Uyinzilʼukututupula, tukumanyilʼiswe, she we Mufinjile wa Mulungʼiwe.

²⁵ UwenʼuYesu ahayipilila ahati: Pumaga, ufume mumuntʼuno!

²⁶ Pʼimpepʼinkandamanu ihamusunkulanya mwonti mwonti umuntʼuno, yihafuma lwʼipongomosilʼizwʼipiti.

²⁷ Pe vahatentwa vonti vahavuzilizanya vahati: Zili vuli zinizi? Zye nongwʼimpwa! Shʼali namaha ga kuzipililʼimpepʼinkandamanu, izyene pe zikumwitiha.

²⁸ Pʼuwene ahakumuha luvilo luvilo munsi zyonti zye zipalamiye kuya mu-Galilayi.

UYesu akupozyʼunyinaywala wa Peteli navanjʼavinji

²⁹ Naluvilo lwʼafuma musinagogi, pʼahavala munyumba ya vaSimoni nuAndeleya. Mwʼahinjila poka navaYakobu nuYohani.

³⁰ Uwene nyenʼunyinaṿwala wa Simoni vahaga ali muvulili, shʼinzegema yamuhominye. Naluvilo vahamuvuzyʼuYesu.

³¹ Pʼuwene ahapalamila ahamulemʼumuhono ahamuvusya. Pʼinzegema yihamuleha luvilo luvilo. Pʼuwenʼahavavombela.

³² Shamazuva lelo, lwʼizuva lyaswa, pe vahaleta kukwakwe vonti navapotwe navʼimpepʼimbivi zivinjiye.

³³ Avamunkaya yiyo vonti vahavungana kushilyango.

³⁴ Uwenʼahavazuzuvushizyʼavapotwe vonti ve vali nuvuvinu uvwinji, ahazivinga nimpepʼimbivi zye nyinji. Ahazilesya lwʼimpepʼimbivi zitili tuyanje. She zyamumanyile.

UYesu akuyeleleha ukuputa nukwepa mu-Kapelinahumu

³⁵ Shanzanche ahalavilʼuYesu lwe kushilʼukusha kunzi, ahavala mulwugwa mwʼahaputa.

³⁶ Avene nyenʼavaSimoni navamwavo vahavalʼukumwanza.

³⁷ Ilelo lwe vamwazile, pe vahati: She vonti vakukwanza.

³⁸ Uwenʼahati: Tuvale mwonti namunkaya zyamwavo mupipʼumu, mwope nkumusyajʼinongwa, she zye zizyo ninziye.

³⁹ Pʼahavalʼukukumusya mumasinagogi gavo munsi yonti ya mu-Galilayi nukufumwʼimpepʼimbivi.

Ukupola kwa wamambombo

⁴⁰ Pʼahapalamila kukwakwʼumuntʼuwamambombo. Wʼahasugamila pansi ahalambilizya kukwakwe ahati: Ingʼukasime pʼuli namaha iwe ukumpozya.

⁴¹ UwenʼuYesu ahamupepelezya muhati yakwe, ahagolosyʼumuhono, ahamupalamansya mumuvili, ahati: Nkasime, polaga.

⁴² Pe luvilo luvilo amambombo gakwe gahepa, ahapola.

⁴³ PʼuYesu ahamupilila nkani, ahamushimbizya luvilo luvilo,

⁴⁴ ahati: Wandaje lelo, utamuvuzyaje numʼumuntu. Nkandi valaga, uyilolesye kuwashiputo, umutwalile niṿwa kufinjila iṿwa kupolʼiwe, ṿwʼalajizizyʼuMose. Ṿwe yivanje iṿwa kumanyila mumwʼavene.

⁴⁵ Uwenʼumuntu wununo nyene, wʼahavala ukuzikumusya nkani nukuziyanga mwonti mwonti inongwa zinizi. PʼuwenʼuYesu ahapotwʼukwinjilʼapazelu munkayʼino, ilelo pʼahava mwe mulwugwa. Pʼavantu vahafuma mwonti mwonti, vahavala pʼuwenʼali.