Kolosi 4 - Tesitamenti Umupwa 1965

¹ Mwe vapiti, mugolosyaje ukuvapʼavazya vinyu ukulingana naṿwo, mumanyaje ukuti namwe muli nuMwene kumwanya.

² Mwumishizyaje ukuputa. Mudamulilaje lwe mukuputa nukusalifwa,

³ lwe mukutuputila niswe vwelele, ukuti uMulungu atwigulile ishilyango shʼizwi, tuziyangaje izya vuzigizigi vwa Chilisiti, zye zimpeleyʼukukungwʼine;

⁴ havili ukuti inzikumusyaje apazelu inza she pakuti inziyangaje.

⁵ Muvanje ninjele mulujendo lwinyu kuvakunzi, shima muvombajʼahinza penga palolesile apa kuvomba yimo.

⁶ Shima amazwi ginyu gavanje ga vwila, gavanje fwe ngati mulunzile iveya, ukuti mumanyaje ukuvamula vonti woka woka inza she zihondeye.

Umulamu wa vantu nizya kumpelela

⁷ Izyane alivavuzyʼimwe uTikika uwamwitu unkundwa, umuvomyi umutungamu, uwamwitu muvunyamata poka nane mwa Mwene.

⁸ Zye zizyo nane imutumile kumwinyu, ukuti muzimanyaje izyitu, havili ukuti avasuvizyaje amoyo ginyu.

⁹ Ali poka nuOnesimu uwamwitu umutungamu unkundwa, wʼafumile kumwinyu Ukwo. Ve valivavuzya zyonti izyʼuku.

¹⁰ Akuvalamuhʼimwe uAlisitaliki umukungwa poka nane, nuMaliko umwipwa wa Balinaba —we mwiṿuyʼizyakwe ukuti ingʼayinza pe mumuposhelʼahinza—,

¹¹ havili nu Yesu wʼakwitwa ilya Yusiti. Ve ndi navo veka vanava avafuma muvuvolwa ukuva vamwitu mumbombo ya vumwene vwa Mulungu, ve vayipezilʼukuva va kunsansamusyʼine.

¹² Akuvalamuhʼimwe nuEpafula wʼafumile kumwinyu, umunyamata wa Chilisiti Yesu, wʼakuvalwila shimʼimwe mumputo zyakwe, ukuti musi mpaje muvulunjisu, havili ukuti mukwilaje mulukasamo lwa Mulungu lwonti.

¹³ She zye nkumuhomeshezya ukuti ukuyikungula nkani ukuvavombelʼimwe nava mu-Layodikeya nava mu-Hilapoli.

¹⁴ Vakuvalamuhʼimwe uLuka umuganga unkudwa nuDema.

¹⁵ Muvalamushe avamwitu ava mu-Layodikeya nuNimfani nishivanza she shikuvungana munyumba yakwe.

¹⁶ Lwe mwavazyʼukalatʼuno, pe muhavatumile nava mushivanza sha mu-Layodikeya ukuti vope vavazye, nuwa ku-Layodikeya muvazye namwe.

¹⁷ Mumuvuzye uAlishipu muti: Uyenyelezyʼahinzʼimbombo yʼuMwene akupiye, uyivombajʼahinza.

¹⁸ We mulamu wa muhono wane ne Pavuli. Mukumbuhaje umunyololo wane. Uvwila vuvanje namwe.