Kolosi 1 - Tesitamenti Umupwa 1965

Umulamu

¹ UPavuli umwapositili wa Chilisiti Yesu, nʼaninjizizye we Mulungu palukasamo lwakwe, nuTimoti uwamwitu,

² tukuvasimbila mwe vafinjile mu-Kolosi namwe vamwitu mwe vitisi mwa Chilisiti. Uvwila nuvwihalo uvufuma kwa Mulungu uTata swenti vuvanje namwe.

Ulusalifwo nuluputo

³ Shima lwe tukuputa pe tukumusalifwʼuMulungu uYise wa Mwene witu uYesu Chilisiti pazyinyu,

⁴ she twiṿuye ulwitiho lwinyu lwe mumwitisilʼuChilisiti Yesu, nishikunzi she muvakunzitʼavafinjile vonti,

⁵ she muli nulusuvilo lwe musengulilwe kumwanya, lwe mwiṿuye hali mwizwi lya nalyoli ilyʼIvangeli,

⁶ lye muli nalyo kumwinyu Ukwo, inza she likuhomʼinsanga munsi yonti nukukula inza she Ukukula mumwinyu ukufuma pisiku lye mwiṿuye nukuvumanya Uvwila vwa Mulungu muvwanalyoli.

⁷ Shʼuvwene vuli inza shʼavavuzizye uEpafula umunyamata wamwitu unkundwa, umuvombezi umutungamu wa Chilisiti pazyinyu,

⁸ wʼahatuvuzya izya shikunzi shinyu sha mwa Mupepo.

⁹ Pe naswe tuhandʼumusanya wuyo lwe twiṿwa zinizi, tuhasita ukutuzya ukuvaputilʼimwe nukulava ukuti mwizulaje uvumanyinsanyi vwa lukasamo lwakwe, ukuti mulumanyinsanyaje munjele zyonti namuvusinkamizyo vwʼakupelʼuMupepo,

¹⁰ ukuti mujendaje inza mwe zivahondeyʼimwe mwa Mwene, lwe mukuhomʼinsanga zya mbombʼinyinza nukukula munjele zya kumumanyinsanyʼuMulungu,

¹¹ mugomaje mumaha gonti, ukulandata amaha ga vumwamu vwakwe. Ilelo zinizi zivapelelaje uvuzyihamulaha vwonti nukutembelʼamanda, poka nuluseshelo,

¹² lwe mukumusalifwʼuTata wʼavahondezizyʼimwe ukupwanʼishigavo sha vupwano vwa vafinjile muluhozyo.

¹³ Wʼatuposile ukufuma mumaha ga shisi, atusamizizye mushinamwene sha Mwana wa shikunzi shakwe;

¹⁴ we muli wuyo tuvwazile uvupokwa, uvuswila vwa malandu.

UChilisiti nimbombo yakwe

¹⁵ WʼuMulungu umusitakuloleha muminso amuhozizyʼishati shakwe, wʼuhatote kuṿipelelwa ṿwonti.

¹⁶ She ṿwonti ṿipe-zilwe mumwakwe wuyo, iṿwa kumwanya niṿwa pansi, ṿwe ṿikuvoneha muminso naṿwe ṿitakuvoneha, navimishilwa, nuvumwene vwonti, nuvusongo vwonti, nuvuhombe vwonti. Vwonti ṿipezilwe mumwakwe wuyo ukuti ṿivanje ṿwakwe.

¹⁷ Uwenʼalipo lwe yishili ṿwonti, havili muli wuyo ṿwonti ṿikulemanʼukusimpa.

¹⁸ Havili uwene we litwe lya muvili, lya shivanza. We vwando wuyo, wʼuhatote ukufuma kuvafwe, ukuti ave mutanzi wuyo muli ṿwonti.

¹⁹ She zihondeye ukuti uvulunjisu vwonti vuvanje muli wuyo,

²⁰ ukuti muli wuyo ayikundanizizye iṿintu ṿwonti, shʼapezilʼuvwihalo mumavanda ga pashihovenkanyo shakwe; mwe muli wuyo, niṿwa pansʼipa niṿwa kumwanya kula.

²¹ Namwe mwe mwatantamine lulwo, havili mwali mwe valugu munsivo zyinyu mumbombo zya lombwa,

²² shinishi nyene avakundinyʼimwe mumuvili wa vuntu vwakwe mwe muvufwe, ukuti muvanje mwe vafinjile kuminso gakwe, avasitaṿilema navasitakulonjelelwa.

²³ Inga nalyoli mukulwumishizya ulwitiho, inga muyibaniye, inga musimfile, inga nahamo hatakuvasegusya kulusuvilo lwʼIvangeli lye mwiṿuye, lye likumusile kuṿipelelwa ṿwonti ṿwe ṿili kunsi kwivingo, lyʼine ne Pavuli njipezilʼukuva ne muvomṿi wakwe.

Ishigavo sha Pavuli mumbombo ya Chilisiti

²⁴ Shinishi pe nkuseshela mumayimba ge nkuvayimbilʼimwe, lwe nkumalilizya mumuvili wane zye zisyaye izya vuswimililwa vwa Chilisiti, zye nkuwuvombelʼumuvili wakwe, nkutaha ishivanza.

²⁵ She zye njipezilʼukuva ne wa kushivombela, ndandite muvuvombezi vwʼuMulungu ampiye uvwa kuvavombelʼimwe, uvwa kuliyanga lyonti mwe livaliyʼizwi lya Mulungu,

²⁶ izya vuzigizigi zila zye zizyihime zyanzite mumaha amakali namumbombʼinkali. Nkandi shinishi zivitushizizye avantu vakwe avafinjile,

²⁷ vʼuMulungu akasime ukuvamanyisya ukuti uvwinji vwa vumwamu vwa vuzigizigi uvu vupiti muvakunzi, she wʼuChilisiti wʼali mumwinyu, Ulusuvilo lwa vumwamu.

²⁸ We wuyo tukumukumusya lwe tukusoha avantu vonti woka woka nukuvasambilizya avantu vonti munjele zyonti, ukuti avantu vonti woka woka tuhavavishe kuminso ga Mulungu ukuva vila mwa Chilisiti.

²⁹ Zye zizyo nane nkuyikungula lwe nkulwa, nkulinga pamaha gakwe gʼakuvombela nkani mwe mumwane.