Ishitushizya 8 - Tesitamenti Umupwa 1965

Ukuhomwa kwa masaji gasano nagavili

¹ Ilelo lwe higula ahalemezanyo ha vusano navuvili pe kumwanya kuhava mwa kuhavalilizyo ha nusu.

² Pe nkalola avahavizya vasano navavili vala ve vimiliye kuminso ga Mulungu, ve vahapelwa amasaji gasano nagavili.

³ Pʼuhavizyʼuwamwavo ahinza, ahimilila kushifinjilo, alemile munyove uluviga lwa sahabu ulwa kusushizyʼilyosi. Ahapelwa iṿwa kusushizya iṿwinji ukuti aṿisanganyaje poka nimputo zya vafinjile vonti pashifinjilo sha sahabu she shilungamine nishitengo sha vumwene.

⁴ Pʼilyosi lya vwa kusushizya lihazuva poka nimputo zya vafinjile ukufuma mumuhono wa havizya wʼali kuminso ga Mulungu.

⁵ Pʼuhavizya ahasendʼu luviga lwa kusushizyʼilyosi, ahizuzyʼumwoto wʼayohoye pashifinjilo muluviga lula, ahalutajila pansi. Ilelo pe kuhava umuligimbo nulungʼanto nimesyo zya mṿula nukuyingʼinsi.

⁶ Pʼavahavizya vasano navavili vala ve vapelilwʼamasaji gasano nagavili vahayisenganya ukuhomʼamasaji gavo.

⁷ Pʼumutanzi ahahomʼisaji. Pʼintalala numwoto ṿwe ṿisangine namavanda vihatajilwa pe pansi. Pʼishigavo shoka paṿitatu isha nsi shihapwa, nishigavo shoka paṿitatu isha makwi shihapwa, nisole ilyolo lyonti lihapwa.

⁸ Pe wope nuhavizya wa vuvili ahahomʼisaji. Pʼishintu she shali fwe ligambʼipiti lye likupwʼumwoto shihatajilwa mwa sumbi. Pʼusumbi ishigavo shoka paṿitatu ahagalunkana ahava fwe ngati mavanda.

⁹ Pʼishigavo shoka paṿitatu isha ṿipelelwa vwa mwa sumbi vwe ṿikufutʼumwuyu ṿihafwa. Nishigavo shoka paṿitatu isha meli zihananjiha.

¹⁰ Pe wope nuhavizya wa vutatu ahahomʼisaji. Pʼuluzota ulupiti lwe luhahaga umwoto fwe ngati lizondolo, luhagwa pashigavo shoka paṿitatu sha majenje napaṿiduda vwa minzi.

¹¹ Ilyenʼizina lya luzota lunulu vahati Intulembe. Pʼaminzi ishigavo shoka paṿitatu gahayipelʼukuva lintulembe, navantu ve vinji vahafwa kuminzi she gayipezilʼukuva mahali.

¹² Pe wope nuhavizya wa vune ahahomʼisaji. Pʼishigavo shoka paṿitatu ishʼizuva nisha mwezi nisha nzota ṿvihahomwa, mwe mumwo ṿihilupa ishigavo shoka paṿitatu, numusanya wutahalama ishigavo shoka paṿitatu, ṿwope nuvusiku vovulo.

¹³ Pe nkenya, nkiṿwa ipula lyoka likwelela nukudumunsanya pahati paya kumwanya, lihayangʼizwʼipiti lihati: Ye mayi we, ye mayi we, ye mayi we, kuli vonti ve vazenzile pansi kuzya mazwi ge gasyaye aga masaji ga vahavizya vatatu ve vandi vagahome.