Ishitushizya 20 - Tesitamenti Umupwa 1965

Ukukungzoa kwa Setano kumaha 1,000

¹ Havili nkalola uhavizya akwiha kufuma kumwanya, alemile ishigulilo sha shiliva sha kungolongo numunyololo umupiti munyove zyakwe.

² Ahayilemʼinjohʼimpiti, ye njohʼinkali, ye wʼuMukwalanzi havili wʼuSetano, ahamukunga amaha 1,000.

³ Ahamubunchilizya mushiliva sha kungolongo, ahamwigalila mumwo, ahaviha nishilemezanyo pamwanya ukuti atatezyaje inkolo zya vantu, ukwinzʼukufiha lwʼamaha 1,000 iga gasila. Lwe zyapitilila zinizi pe pakuti asatulwaje havili kumanda mansi.

⁴ Havili nkalolʼiṿitengo ṿwa vumwene, pe vahatendama pupo, avene nyene vahapelwa uvulonzi, havili nkalola namapepo ga ve vadumulilwe amatwe kuzya kumuhomeshezyʼuYesu nakuzyʼIzwi lya Mulungu, navala ve vatahaputaga kushintu nakushiholanyo shakwe, ve vataposheleye uvusimbe ṿwakwe pasheni napamahono gavo. Avene nyene vahalandila nukuva ve vamwene poka nuChilisiti kumaha 1,000.

⁵ Nkandi avafwe avamwavo ve suti vatapelilwe ukulandila ukwinzʼukufiha lwʼamaha 1,000 gashilinkine. Kwe kuzyuhʼukutanzi kunuku.

⁶ Musangalusu havili mufinjile uno wenga aposheleyʼishigavo shakwe muvuzyuha uvutanzi vunuvu. She kuli vanava uvufwe ṿwa vuvili vutali namaha nagamo, nkandi valiva vashiputo va Mulungu navakwe uChilisiti, valiva ve vamwene poka nawo kumaha 1,000.

Ukusatulwa kwa Setano nahapaka ha kumpelela

⁷ Ilelo lwʼamaha 1,000 ganaga gasila pʼuSetano alisatulwa mwʼakunzilwe.

⁸ Pʼalifuma nukutezya inkolo zya vantu muṿipembe ṿwa nsi vwe ṿine, nkumutaha uGogi nuMagogi. Alivavunganiha ukulwʼuvulugu. Uvwinji ṿwavo valiva fwe lusenga lwa kushipuma sha sumbi.

⁹ Pe vahazuva vahamala umukwembe wa nsi yonti. Vahavuzenjelela uvuyo ṿwa vafinjile ninkayʼinkundilwa, vahaṿiviha pahati. Pʼumwoto ahalagala kufuma kumwanya, ahavalya.

¹⁰ Pʼumukwalanzi wʼavatezizye ahatagwa mwa sumbi wa mwoto nuwa ṿibiliti, mwʼishintu numukuvwi wakwe wʼilenga valongoleye. Mwe valiyimba uvusiku numusanya shisitakusila nalumo lumo.

Ukuzyuha kwa vantu vonti nuvulonzi ṿwa kumpelela

¹¹ Pe nkalola ishitengo sha vumwene ishipiti ishizelu nawuyo wʼatendime pupo, wʼinsi ya pansi mya kumwanya ṿihashishimbila isheni shakwe. Ṿihasita nukupaga apavuyo napamo.

¹² Pe nkalda avafwe vonti avapiti navansi vimiliye ukulungamana nishitengo sha vumwene, navakalata vahakupulwa. Wope nukalata uwunji ahakupulwa, we wʼukalata wa vulanzi. Pʼavafwe vahalongwa ukulandata zye zyasimṿilwe muvakalata vala nukulandata mumbombo zyavo zye vavomṿile.

¹³ Wope nusumbi ahavafumwa avafwe ve vali mumwo. Vwope nuvufwe nuvuzimu vihavafumwa avafwe ve vali mumwo, pe vahalongwa vonti mwe vavaliye ukulandata imbombo zyavo.

¹⁴ Uvufwe nuvuzimu vihatagwa mwa sumbi wa mwoto. Uvu vwe vufwe ṿwa vuvili, usumbi wa mwoto.

¹⁵ Uno wenga vazile atasimṿilwe mwa kalata wa vulanzi, we wope ahatagwa mwa sumbi wa mwoto.