Ishitushizya 2 - Tesitamenti Umupwa 1965

Ukalata zvʼasimṿihve kushivanza sha mw-Efeso

¹ Uwenʼuhavizya wa shivanza sha mw-Efeso we umusimbilaje utinji: Lyʼakuyanga wuyo wʼalemilʼinzota zye zisano nazivili mumuhono wakwe umulilo, wʼakuzyungula pahati paṿilemanyale ṿwa sahabu ṿwe ṿisano naṿivili.

² Imanyilʼimbombo yaho, mbumanyile nuvwahayikungule vwaho nuvuzyihamulaha vwaho. Nkumanyilʼiwe ukuti avavivi iwe utamanyile ukwizya navo, nava ve vakuyiyanga veka ukuti vapositili nashenga te vapositili avene uvalinzile nukuvalemʼilenga.

³ Havili uli nuvuṿindilamalema, uyimṿile pazyʼizina lyane, utahatamfile.

⁴ Nkandi zye nkukupililʼine zyʼulesile ishikunzi shaho ishitanzi.

⁵ Ukumbuhaje lelo pe wamile lwe wagwanga, upinduhaje, uvombajʼimbombʼintanzi, nkandʼingʼukusita pe ndiyinza luvilo luvilo ukwefwa ishilemanyale shaho pupo pe shili ingʼutakupinduha.

⁶ Izyene nyene zyʼuli nazyo zyʼunonelezizye, shʼuzipasite imbombo zya vaNikolayiti zye nane nzipasite.

⁷ Uno wengʼali namakutwi wʼatejelezyaje zyʼuMupepo akuṿivuzyʼiṿivanza. Uno wengʼakupotʼuvulugu, we ndimupʼukulya izya mwikwi lya vulanzi lye lili mwa Paladisi wa Mulungu.

Ukalata wʼasimṿilwe kushivanza sha mu-Similina

⁸ Uwenʼuhavizya wa shivanza sha mu-Similina wʼumusimbilaje utinji: Lyʼakuyanga wuyo we Mutanzi havili Wakumpelela, uno wʼafuye, we havili akulandila.

⁹ Mbumanyile uvuhamantanilwa vwaho nuvupina vwaho, nkandi we dumbwe. Ngamanyile amatona ge vakukutona ve vakuyitaha veka ukuti vaYuda nashenga te vaYuda avene, nkandi ve va muluhomano lwa Setano.

¹⁰ Kwe ndah ukutetema zyʼuliyimba. Yenya, uMukwakwa alivigalila avamwinyu vamo mujela ukuti mulingwaje, muliyimṿilwa kumandʼishumi. Uvanje we mutungamu ukufiha nakuvufwe pe ndikupʼishipambwi sha vulanzi.

¹¹ Uno wengʼali namakutwi wʼatejelezyaje zyʼuMupepo akuṿivuzyʼiṿivanza. Uno wengʼakupotʼuvulugu, wʼuvufwe vwa vuvili vutalimunanga.

Ukalata wʼasimyilwe kushivanza shamu-Peligamu

¹² Uwenʼuhavizya wa shivanza sha mu-Peligamu wʼumusimbilaje utinji: Lyʼakuyanga wuyo wʼali nishipanga ishihozu isha vwembe kuvili.

¹³ Manyile ine ukuti mwʼuzenzile mwe shili ishitengo sha Setano. Lyope nizina lyane ulilemile nkani nulwitiho lwane utahaluhana, mwope namumanda ga Antipa uhome wane, umutungamu wane, pala pe vahamugogaga mumwinyu, mwʼazenzilʼuSetano.

¹⁴ Nkandi ndi nazyo zimo nyinsi izya kukupilila, she mumwaho uli navo vamo ve vazilemile zyʼuBilyamu amusambilizʼizyʼuBalaka ukuvihʼipunulo kuminso ga vana-Yisilayili, ilya kulyʼimputile zya malungu nilya kuvembuha.

¹⁵ Vope vamo ve vazyumishizizye zyʼavaNikolayiti vakusambilizya uli navo vovulo.

¹⁶ Upindushe lelo, shʼingʼutakupinduha pe ndiyinza luvilo luvilo ukulwa navo nishipanga she shili mwilomu lyane ishi.

¹⁷ Uno wengʼali namakutwi wʼatejelezyaje zyʼuMupepo akuṿivuzyʼiṿivanza. Uno wengʼakupotʼuvulugu we ndimupa umana wumo uwa vuzigizigi, we ndimupa nivwe izelu, havili pivwe izinʼipwa lye lisimṿilwe pupo, lye numo atalimanyile nkandi wuyo weka wʼakuliposhela.

Ukalata wʼasimyilwe kushivanza sha mu-Tiyatila

¹⁸ Uwenʼuhavizya wa shivanza sha mu-Tiyatila wʼumusimbilaje utinji: LyʼakuyangʼuMwana wa Mulungu wʼaminso gakwe gali fwe mwilo wa mwoto, we niṿinama ṿwakwe ṿikumekuha fwe ngati ṿipondʼivizelu.

¹⁹ Nzimanyilʼimbombo zyaho nishikunzi nulwitiho nuvuvombezi nuvuzyihamulaha vwaho, nukuti imbombo zyaho izya kumpelela zyalusya intanzi.

²⁰ Nkandi nkukupilila zyʼukumwolovelʼumwantanda uYisibeli wʼakuyitaha ukuti mukuvwi wʼakuvasambilizya nukuvatezya avanyamata vane ukuti vavembuhaje nukulyʼimputile zya malungu.

²¹ Havili imulesheye ahavalilizyo ha kupinduha, nkandi atakwanza ukupinduha kuluvembu lwakwe.

²² Yenya lelo, ndimugwisizya pashitala poka nave vakuvembuha nawo, nkuvagwisizya muvuhamantanilwa uvwinji, inga vatakuzigunjila imbombo zyakwe.

²³ Vope navana vakwe ndivahomanga nuvufwe. Pʼiṿivanza ṿwonti ṿilimanya ukuti nene ne nkusinkamizya mumfigo namumoyo. Ndivapa mwenti unʼiṿwakwe unʼiṿwakwe ukulandata mumbombo zyinyu.

²⁴ Nkandʼimwe mwe vamwavo mwe va mu-Tiyatila mwe mutali ninsambilizyo zinizi, mwe mutavumanyile uvwivizu vwakwe uSetano, inza ṿwe vakuyanga avene, imwe nkuvavuzya nkuti: Ntaliyonjezya ukuvavegazyʼimwe umuligo umumwamu.

²⁵ Nkandi mwumishizyaje huho he muli naho, muhafishe naho pupo pe ndiyinza.

²⁶ Nuno wengʼakupotʼuvulugu nuno wengʼakuzisunjililʼ imbombo zyane ukufiha nakumpelela, we ndimupʼavakunzi ukuti avanje wʼumwene wavo.

²⁷ Alivadima nindisa ya shijela, alivabazulanya fwe nsonta zyʼivumba, inza she nane uTata ampiye.

²⁸ Havili ndimupa nuluzota lwa shanzanche.

²⁹ Uno wengʼali namakutwi wʼatejelezyaje zyʼuMupepo akuṿivuzyʼiṿivanza.