Ishitushizya 15 - Tesitamenti Umupwa 1965

Ishitushizya mbiga zisano na zivili nintipo

¹ Pe nkalda umumfindango uwamwavo kumwanya, umupiti uwa kusukumila, avahavizya vasano navavili ve vali nintipo zisano nazivili izya kumpelela, shʼuvuhalazu ṿwa Mulungu vuhalunjiha muli zizyo.

² Havili nkalda shimo fwe ngati wʼusumbi wa magalasi ge gasangine numwoto, nave vaposite nukufupuha kushintu shila nakushiholanyo shakwe nakumbazyo yʼizina lyakwe, vimiliye kuluvazu kwa sumbi wa magalasi uno, valemilʼamapango ga Mulungu munyove.

³ Vahimbʼulwimbo lwa Mose umunyamata wa Mulungu nulwimbo lwa Hagonzi, vahati: Mpiti, zya kusukumila imbombo zyaho, we Mwene Mulungu, we Muhatamahagonti. Amadala gaho ge ga vugolosu, ga nalyoli, we Mwene wa nkolo zyonti.

⁴ Wʼunanu wʼatangakunyila nukulitundumiha izina lyaho, we Mwene? Shʼiwe weka we we Mufinjile, shʼinkolo zyonti ziliyinza havili zilisugamila kuminso gaho, shʼimbombo zyaho zya vugolosu zigwinkulilwe.

⁵ Havili lwe zyapitilila zinizi pe nkalda ukuti itempeli yʼihema lya kuhomeshezya inongwa lye lili kumwanya yigusile,

⁶ pʼavahavizya vasano navavili vala ve valemilʼintipo zisano nazivili vahafuma mu tempeli, vazwayʼamendʼamazelu ge gakulangalila, havili vafunzilʼamalamba ga sahabu paṿifuva.

⁷ Pe shoka kufuma muṿipuma ṿine ṿila shihavapʼavahavizya ve vasano navavili imbiga zya sahabu zye zyizuye uvuhalazu ṿwa Mulungu wʼalipo shima nakuvusitakusila nalumo lumo.

⁸ Pʼitempeli ya Mulungu yihizulʼilyosi lya vumwamu vwa Mulungu nilya maha gakwe, pe suti numo atahinjila mwa tempeli, she vatili suti zisilʼintipo zya vahavizya ve vasano navavili iva.