Ishitushizya 12 - Tesitamenti Umupwa 1965

Ishitushizya sha mwantanda ninjohʼimpiti

¹ Pʼumumfindango umupiti wuhaloleha kumwanya, umwantanda wʼazwayʼizuva fwe mwenda, numwezi ali kunsi kuvinama ṿwakwe. Kwitwe lyakwe azwayʼishipambwi sha nzota ishumi nazivili.

² Ali pavumwamu, ahakutaga, ali namayimba nuvuhamantanilwa ṿwa kupapʼumwana.

³ Numumfindango uwamwavo wuhaloleha kumwanya. Yenya, injoha isikisiki impiti ye yali fwe mwoto, yali namatwe gasano nagavili nimpembʼishumi. Pamatwe gakwe yazwayʼiṿipambwi ṿisano naṿivili.

⁴ Ulusinda lwakwe luhakwesagʼinzota zya kumwanya ishigavo shoka paṿitatu, luhazitaga pansi. Injoha yiyo isikisiki yihimilila ukulungamana numwantanda, ukuti ingʼakupapʼumwana wakwe yimumilaje.

⁵ Pʼahapapʼumwanʼumwanaṿuli uwa kuvadima ava munsi zyonti nindisa ya shijela. Pʼumwana wakwe ahasompolwa nukuvikwa kuminso ga Mulungu nakushitengo shakwe isha vumwene.

⁶ Umwantanda ahashimbilila mulwugwa mwʼahagʼuvuyo vwʼayananizilwe nuMulungu, mwʼahanyilila ukuti vamusungaje kumanda 1,260.

⁷ Pe kumwanya kuhavʼuvulugu. UMikayeli navahavizya vakwe vahalwa ninjoha isikisiki. Lyopʼisikisiki poka navahavizya vakwe lihalwa.

⁸ Nkandi lihapotwa, apavuyo patahaloleha nohavili kuli vuvo kumwanya.

⁹ Pe yihatagwa injoha isikisiki, ye njohʼinkali ye yikwitwa ilya Mukwalanzi nilya Setano, ye yikutezyʼinsi yonti mwe vazenzilʼavantu. Ahatagwa pe pansi, vope navahavizya vakwe vahagwa poka nawo.

¹⁰ Pe nkiṿwʼizwʼipiti kufuma kumwanya, lihati: Ishi pʼuvuposhi ninguvu nuvumwene ṿiyipezilʼukuva ṿwa Mulungu witu namaha gayipezilʼukuva ga Chilisiti wakwe. She uwa kuvalonjelela shima avamwitu atazilwe pansi, wuyo wʼakuvalonjelela kwa Mulungu shima shamusanya nasha vusiku.

¹¹ Vamuposite mwe mumavanda ga Hagonzi namwizwi lya vwahome ṿwavo, ṿwope nuvulanzi ṿwavo vatahavupepelezya ukufiha nakuvufwe.

¹² Mwe mumwo museshelaje, we ya kumwanya namwe musamiye mumwo. Ye mayi we, we nsi ya pansi nawe sumbi, shʼuMukwalanzi ayishiye kumwinyu, aṿisitwe nkani, shʼamanyile ukuti ahavalilizyo hakwe hafupi.

¹³ Ilelo injoha isikisiki lwe lyazile ukuti litazilwe pansi pe lihamuṿvwimʼumwantanda wʼapafilʼumwanʼumwanaṿuli ula.

¹⁴ Pʼumwantanda ahapelwa iṿwapa ṿivili iṿwʼipula ipiti iṿwa kuvwelela kuvuyo ṿwakwe mulwugwa mula, kwe vahamusunga umwaha wumo namaha gamo ninusu ya mwaha wumo ukutali kwʼinjoha isikisiki yihapotwa ukumwenya.

¹⁵ Pʼinjoha yihaswilʼaminzi mwilomu lyakwe ge gali fwe ngati lijenje ukulandata mwisinda mumwantanda ukuti gamusogozye.

¹⁶ Pʼinsi yihamutulʼumwantanda, yihasama kwilomu, yihalimilʼijenje lye lyaswililwe mwilomu lya njoha isikisiki.

¹⁷ Pʼinjoha isikisiki yihamuṿitililwa nkani umwantanda, yihavalʼukulwʼuvulugu navamwavo ve vasyaye ava mbeyu yakwe, ve vazisajiye indajizyo zya Mulungu nave vali nuvwahome vwa Yesu.

¹⁸ Yihimilila kushipuma sha sumbi.