Ishitushizya 1 - Tesitamenti Umupwa 1965

Izya kutaliha numulamu

¹ Ishi she shitushizya sha Yesu Chilisiti shʼuMulungu amupiye isha kuvalanganizya mumwo avanyamata vakwe zye pakuti zyinzaje shisitakuhava. She shisho ahamutumʼuhavizya wakwe uwa kumulangʼuYohani umunyamata wakwe,

² wʼahomeshezizye inongwa zya Mulungu nuluhomeshezyo lwa Yesu Chilisiti, zyonti zyʼaziwenyi.

³ Musangalusu wengʼakuvazya pakalata amazwi ga vukuvwi nave vakutejelezya nukugaviha mumoyo gavo gala ge gasimṿilwe mumwo, shʼumwaha apalamiye.

⁴ Nene ne Yohani nkuvasimbila mwe vamuṿivanza ṿisano naṿivili ṿwe ṿili mw-Asiya. Uvwila vuvanje namwe nuvwihalo vwe vukufuma kuli wuyo wʼalipo shinishi, wʼalipo nalulwo, havili wʼaliyinza, nakumpepo zisano nazivili zye zili kuminso ga shitengo shakwe isha vumwene,

⁵ nakwa Yesu Chilisiti, uhome umutungamu, uhatote wa vafwe, umupiti wa vamwene vonti ava munsʼumu. Wʼatukunzite iswe, atwozizye uvutalamalandu vwitu mumavanda gakwe,

⁶ wʼatupezilʼiswe ukuva swe vumwene nukuva swe vashiputo va Mulungu uYise, wʼuvumwamu vuli na wuyo ninguyu zyonti nuvusitakusila nalumo lumo. Amen.

⁷ Yenyi, akwinza mumavingo. Aminso ga vonti woka woka galimwenya. Valimwenya vope nava ve vamulasile. Ninkolo zyonti izya munsʼumu zilidwegana pazyakwe. Ena nalyoli. Amen.

⁸ Nene ne Alifa havili ne Omega, vwʼakuyanga uMwene uMulungu, wuyo wʼalipo shinishi, wʼalipo nalulwo, havili wʼaliyinza uMuhatamaha gonti.

Ishitushizya sha Chilisiti

⁹ Nene ne Yohani ne wamwinyu, ne mulilani poka namwe muvuhamantanilwa namuvumwene namuvuzyihamulaha mwe mwa Yesu. Nali munsungo ye vakuti wʼuPatimo izina, pazya nongwa zya Mulungu nuluhomeshezyo lwa Yesu.

¹⁰ Nali muMupepo pisiku lya Mwene, pe mwisinda mumwane nkivwa izwi ipiti fwe ngati lyʼisaji,

¹¹ lihati: Zyengʼukuzyenya shinishi zyʼusimbaje mwa kalata, uzitumaje kuvivanza visano naṿivili, isha mw-Efeso nisha mu-Similina nisha mu-Peligamu nisha mu-Tiyatila nisha mu-Salidisi nisha mu-Filatelefiya nisha mu-Layodikeya.

¹² Pe nkasyetunkana ukuti inenyʼizwi lye likuyanga nane, ilelo pe lwe nsyetunkine nkagʼiṿilemanyale ṿisano naṿivili iṿwa sahabu,

¹³ napaṿilemanyale pahati pe nkaga umuntu ayimiliye ali fwe ngati Mwana-wa-muntu, azwayʼinkanzu intali, pashifuva pʼafunzilʼilamba lya sahabu.

¹⁴ Itwe lyakwe ninsisi zyakwe ṿwali mpe fwe ngati masepʼamazelu ngati nganda yʼiguyʼamajela. Aminso gakwe gali fwe ngati mwilo wa mwoto.

¹⁵ Niṿinama ṿwakwe ṿihamekuhaga fwe ngati yipondʼiṿizelu ṿwe ṿisamiye mushintengwi. Izwi lyakwe lyali fwe ngati lizwi lya minzi aminji.

¹⁶ Mumuhono wakwʼumulilo alemilʼinzota zisano nazivili. Mwilomu lyakwe mwe shalʼishipanga ishihozu isha vwembe kuvili. Kuminso ahalamaga fwe ngati lizuva mumaha gakwe.

¹⁷ Ilelo lwe imuwenyi pe nkagwa pansi kuṿinama ṿwakwe, nkava fwe ngati mfuye. Pʼuwene ahambihʼumuhono wakwe umulilo, ahati: Utogopaje, she nene ne Mutanzi, havili ne Wakumpelela nenene,

¹⁸ ne Mulanzi nenene, nafuye, havili yenya, nkulandila nakuvusitakusila nalumo lumo. Ndi niṿwigulilo ṿwa kuvufwe niṿwa kuvuzimu.

¹⁹ Simbaga lelo zyʼuziwenyi zye zilipo shinishi nazye ziliyinza ukulandata palʼizi.

²⁰ Usimbajʼizya kusukumilʼuvupiti izya nzota zisano nazivili zyʼuziwenyi kumuhono wanʼumulilo nizya yilemanyale ṿisano naṿivili iṿwa sahabu iṿi. Inzota zisano nazivili zye ve vahavizya va ṿivanza ṿisano naṿivili. Iṿwenʼiṿilemanyale ṿisano naṿivili ṿwe ṿivanza ṿiniṿi ṿisano naṿivili.