Filipi 4 - Tesitamenti Umupwa 1965

Insoshe

¹ Mwe mumwo lelo mwe vamwitu avankundwa vane, mwe mbasamṿile nkani, mwe luseshelo lwane nishipambwi shane, musimpaje vovulo mwa Mwene, mwe vankundwa.

² Nkumuyinzanya uEvodiya, nkumuyinzanya nawe Sintike ukuti vavanje ninsivo zyoka mwa Mwene.

³ Ena nkukulambilizya nawe we mukunjilinkani wane uwa nalyoli, ukuti uvatulʼavantanda vanava, she vayikunguye ukukumusyʼIvangeli poka nane nuKelementi navamwavo ve vahantulʼimbombo, vʼamazina gavo gali mwa kalata wa vulanzi.

⁴ Museshelaje mwa Mwene shima, havili nkuvuyizya nkuti museshelaje.

⁵ Intembwele zyinyu zimanyihaje kuvantu vonti. UMwene apalamiye.

⁶ Mutakutanaje naṿimo ndali, nkandi zyonti zyenga musovelilwe zye muziyangaje kwa Mulungu muluputo lwonti namululavo lwe lusangine nulusalifwo.

⁷ Uvwene nyene Uvwihalo vwa Mulungu, vwe vulusizyʼinjele zyonti, vwe vuliyuvatila amoyo ginyu ninsivo zyinyu mwa Chilisiti Yesu.

⁸ Nkumalilizya lelo mwe vamwitu, nkuti izya nalyoli zyonti, nizya mushinzi zyonti, ningolosu zyonti, ninzelu zyonti, ninyinza zyonti, nazyonti zye zihondeyʼukuyangwa, nga zya vwahayisunde, nga zya kutimwa, zye muzipangamale zyonti zinizi.

⁹ Nazye musambiliye, nazye muposheleye, nazye mwiṿuye, nazye muwenyi kukwane, zye muvombaje zizyo. PʼuMulungu umuhatavwihalo aliva namwe.

Ulusalifwo lwa Pavuli kuzya shikuku sha vaFilipi

¹⁰ Pe nsesheye nkani mwa Mwene, she shinishi muvuyizizye havili ukunkumbuha. Mwatalisilʼukunsivilila zinizi nkandi mwalemenchelilwe mumanda gala.

¹¹ Mutatinji nkuziyanga zinizi fwe ngati nsovelilwe, ndali, shʼine mbelezinye ukuyanana naṿwo shima ṿwenga ndi naṿwo.

¹² Shʼimanyilʼine ukusevelwa, havili imanyile nukulafushilwa. Mbelezinye natwo twonti natwonti ine, nukwikutʼiṿintu nukulumwʼinzala, nuku-lafushilwʼiṿintu nukusovelwʼiṿintu.

¹³ Naṿimo ṿitakumpotʼine, she ndi muli wuyo wʼakumpʼamaha.

¹⁴ Ilelo muvomṿilʼahinza ukuva mwe valilani vane muvupotwe.

¹⁵ She mumanyile namwe, mwe vaFilipi, ukuti Kuvwando vwʼIvangeli pala pe nafumile mu-Makedoniya, pashivanza nashimo ishamwavo shitayipezilʼukuva shililani shane muzya kufumwa nizya kuposhela, nkandi mwenemwe mweka.

¹⁶ She pope nalwe nali mu-Tesaloniki muhantumila iṿwa kuntula ulutanzi nulwa vuvili ṿwe nasovelilwe.

¹⁷ Mutasivaje ukuti nkwanzʼiṿwa kumpʼine ndali, nkandi nkusuvilʼinsanga mwe ṿikuṿulʼiṿwuma ṿwinyu ṿwe mukuvunganiha.

¹⁸ Pe ndi naṿwo ṿwonti, ṿikulafuha. Yinkwiliyʼine, shʼahampa uEpafulodito ṿiṿwo ṿwe muhantumilʼimwe, ṿikununchilʼimfu-ngo, ye mputile yʼakuposhelʼuMulungu, yʼakuyishelʼuwene.

¹⁹ UwenʼuMulungu wane wʼalivizulizya mwonti mwe ṿivasoveyʼimwe, ukulandata muvudumbwe vwakwe muvumwamu vwa Chilisiti Yesu.

²⁰ UwenʼuMulungu uTata swenti atundumikwaje shimashima.

Izya kulagana

²¹ Muvalamushe avafinjile vonti mwa Chilisiti Yesu. Avamwitu ve ndi navo vakuvalamuhʼimwe.

²² Avafinjile vonti Vakuvalamuha, inkani ava mwisashi lya Kesali.

²³ Uvwila vwa Mwene Yesu Chilisiti vuvanje numupepo winyu.