Filipi 3 - Tesitamenti Umupwa 1965

Uvusitakuvosya mua mbombo zyʼuPavuli angazivomba muvugolosu vula muntu

¹ Zisyaye lelo zye zya kuti museshelaje mwa Mwene mwe vamwitu. Lwe nkuvuyizya shima ukuvasimbila zizyo, pe zitakundinkʼine, imwe nyene pe mukusimpa.

² Mwandajʼimbwʼizyo, mwandajʼavavombezi avavivi ivo, mwandajʼuvuvolwa uvwo vwe vakuvola nukuyinanga.

³ Shʼi-swe swe va vuvolwa, tukumuvombelʼuMulungu mwe mwa Mupepo, tukuyitimila mwa Chilisiti Yesu, tutakuvutungamila uvuntu.

⁴ Nashenga nane nali nazyo zimo izya kutungamila muvuntu. Ingʼuwunji wumo akusivʼukuti ali nazyo zimo izya kutungamila muvuntu—pʼine ndusizye.

⁵ She navolilwʼuvuvolwa lwe namalʼamanda umunana; ne mwana-Yisilayili; mfumile muluho lwa Benyamini, ne muHebuli umufuma muvaHebuli; munkomelezyo ne muFalisayi.

⁶ Izya kuyikungula zye nkashiṿwimʼishivanza, izya vugolosu vwa munkomelezyo zye nkasita ukuva nazyo nazimo izya kundonga.

UPavuli akusamba nkani ukuva poka nuChilisiti

⁷ Nkandi zizyo zye lulwo natinji vwe vulonsi, zye havili shinishi nziwenyi mwa Chilisiti ukuva zya kunazya ntupu.

⁸ Ilelʼishi zyonti nziwenyi ukuva zya kunazya, she mbwenyi ukumumanyinsanya uChilisiti Yesu uMwene wane kwe kulusizye uvugomu, we nziloṿezizye mumwakwe zyonti, we zyonti nziloleye mumwakwe ukuva makoko matupu, ukuti imulonche we Chilisiti,

⁹ havili ukuti ndolehaje mumwakwe wuyo, te lya kuti mbanje navwo vwe vugolosu vwane uvufuma munkomelezyo, nkandi mbe navwo uvugolosu vwa lwitiho lwa Chilisiti, vwe vukufuma kwa Mulungu, vwe vuyisimfizye mulwitiho,

¹⁰ ukuti mumumanye wuyo namaha ga kuzyuha lwakwe nuvulilani vwa mayimba gakwe, lwe nkuyanana nuvufwe vwakwe,

¹¹ ukuti nane lumo nkafishe kuvuzyuha vwa vafwe.

¹² Ntakuti nsompoye nzila, ntakuti ne mwila nzila, nkandi nkuyikungula ukuti insompole, inza shʼuChilisiti Yesu atalisilʼukunsompolʼine.

¹³ Mwe vamwitu, ine ntakuyisivilila ukuti nsompoye ndali, nkandi hoka vwelele: Lwe nkuluṿwa izya mwisinda zyonti nkunyululushila kuzya kwilongolela.

¹⁴ Aminso gali kumpelela kulutumṿanyo, nkuyikungula kwe kuhuma ha kusompola aha lwito lwa kumwanya ulwa Mulungu mwa Chilisiti Yesu.

¹⁵ Swenti lelo swe tulunjisile tusivaje zinizi. Apene nyene inga mukusiva zimo payo, pe zyopʼuMulungu alivakupulila.

¹⁶ Nkandi muli zyonti zinizi zye tumanyinsinye pe pakuti tujendaje mumwo.

Ishiholanyo sha Pavuli ukuti shilandatwaje

¹⁷ Mundandatʼine mulujendo, mwe vamwitu. Muvenyelezyaje vuvo ve vakujendela mumwo inza she tuvapeleyʼimwe ukuva swe shiholanyo.

Avalugu va shihovenkanyo sha Chilisiti

¹⁸ Shʼavinji vakujendela, ve nkavavuzyagʼimwe ulwinji, havili nashinishi nkuvavuzyʼimwe lwe nkukutʼamansozi ukuti ve valugu va shihovenkanyo sha Chilisiti.

¹⁹ Avene kumpelela kwe vutupulwa vutupu, shʼavene umulungu wavo vula, uvumwamu vwavo vuli munsoni zyavo, vakupangamala zye zya munsʼino.

²⁰ Shʼuvuhaya vwitu vuli kumwanya, kwe gope naminso gitu genyizye, she tukuti kwʼakufuma uMuposhi uMwene Yesu Chilisiti,

²¹ wʼaliyandula umuvili witu umusamusu ukuti aholane numuvili wakwe uwa vumwamu, shʼuwenʼali namaha aga kukonzya ṿwonti.