Filipi 2 - Tesitamenti Umupwa 1965

Izwi lye likutulava ukuva poka

¹ Ilelo inga lulipʼulukumbusanyo lumo ulwa Chilisiti, nulusuvizyo lwa shikunzi, nuvulilani vwa Mupepo, nishikunzi sha mumwoyo, nulupepelezyo lwa muhati,

² pe munizuzyajʼuluseshelo, ukuti muve ninsivo zyoka zyene mwenti, muve nishikunzi shoka shene mwenti, mwenti muve numwoyo woka mwene nukusiva ahantu hoka hene.

Na muvwahayisye

³ Mutasivaje nazimo izya kupelʼukulundunkana nizya kuyimwamiha shaha, nkandi muyisyaje nukusivililana ukuti avana winyu vavalusizyʼimwe uvupiti.

⁴ Mutenyelezyajʼiṿwinyu unʼiṿwakwe unʼiṿwakwe, nkandi ṿwope naṿwe vwa vamwinyu muṿwenyelezyaje mwenti.

Ishiholanyo sha vwahayisye vwa Yesu nukuyifinjila

⁵ Muhati mumwinyu musivaje zizyo zye nuChilisiti Yesu ahasivaga mumwakwe.

⁶ We nashenga ali nishati sha Mulungu atahakulema ukuholana nuMulungu fwe ngati shisampwa.

⁷ Nkandʼuwene ahayipelʼukuva vwelele, ahasendʼishati sha muzya, ahayipelʼukuva muvuntu, havili mutuntu twonti ahalolehʼukuva muntu.

⁸ Ahayisya weka, ahitiha nakuvufwe, ena nakwe kuvufwe vwa pashihovenkanyo.

⁹ Zye zizyo havili uMulungu ahamukumusya, ahamukunjilʼizina lye lilusizyʼuvupiti amazina gonti,

¹⁰ ukuti iṿizwi ṿwa vonti avakumwanya navapamwanyʼipa navakunsi pansi pe pakuti ṿiyipintaje mwizina lya Yesu,

¹¹ nimili zyonti ukuti zimuyanje UYesu Chilisiti ukuva we wʼUmwene, zimushindishe mumwo uMulungu uYise.

Uvupokwa vulolehaje mulujendo

¹² Pe lelo mwe vankundwa vane, inza she muzilandite izyane amanda gonti, te lya kuti lwe nali namwe vwelele nkandi ukulusya nkani lwe ndʼukutali, mupitilizyaje ukuvuvombela uvupokwa vwinyu mulunyilo nukutetema.

¹³ She wʼuMulungu wʼakuvapelela mumoyo ginyu nukukasama nukuvomba mulukasamo lwakwʼulwinza.

¹⁴ Zyonti zyenga mukuvomba zye muvombaje shisitakukwinkwina mumwo navasitamaganigani,

¹⁵ ukuti muvanje mwe vasitakulongwa navasitavugulugulu, avana va Mulungu avasitaṿilema nashenga musangine navantu avagombanu iva avalemazu, ve muli vuvo imwe mukuhozya fwe ngati nkozyo munsʼumu,

¹⁶ lwe mukulyimihʼizwi lya vulanzi. Zye zizyo nkayitimile mumwo pisiku lya Chilisiti ukuti ntashimbiye shaha, havili ntayikunguye shaha.

¹⁷ Pope nashenga vakwitʼamavanda gane pashifinjilo nakuzya mbombo ye nkuluvombelʼulwitiho lwinyu, pe nkuseshela havili nkuseshela poka namwe mwenti.

¹⁸ She muhonzyaje lelo namwe museshelaje, havili museshelaje poka nane.

UTimoti

¹⁹ Nkusuvila mwa Mwene uYesu pasyaye pansi ukuvatumilʼimwe uTimoti, she nane nkwanzʼukusansamuha lwe namanya izya kumwinyu Ukwo.

²⁰ She ntamumanyilʼuwamwavo numo wʼali fwe wuyo umwoyo, shʼuwenʼinongwa zyinyu zyonti akuzisiva shisitamafuji.

²¹ She vontʼavinji vakuyanzila ṿwe ṿwavo vuvo, te ṿwa Chilisiti Yesu.

²² Ilelo mumumanyile namwe mwʼalolesilʼuvwinza, shʼahalivombelʼIvangeli poka nane inza ṿwʼumwana akuhonzya nuyise.

²³ We nkusuvila ukumutuma luvilo luvilo lwe nalola izyane kwe zikwenya.

²⁴ Nane ntungamiye mwa Mwene ukuti ntalihava ukwinza kumwinyu Ukwo.

UEpafulodito

²⁵ Shinishi nyene pe nazile hinza ukumutuma uEpafulodito uwamwitu, umuvomyi poka nane, umusikali wamwitu, we mwamutumile ukumbombela zye nasovelilwe.

²⁶ Shʼavasamṿile nkani imwe mwenti, ahasaganyaga, she mwiṿuye ukuti avinagʼuwene.

²⁷ Shʼavinile nkani, pasyaye pansi ukufwa. NkandʼuMulungu ahamufwilʼuvwila, te wuyo weka ndali, nkandi nine vwelele ukuti ntavanje nuvuswimililwa pavuswimililwa vwamwavo.

²⁸ Ilelo pe nkalusyʼukuyikungula kumutuma kumwinyu ukuti museshelaje havili lwe mwamulola, ine nonjezyaje ukusansamuha muvuswimililwa vwane.

²⁹ Ishi mumuposhelaje mwa Mwene nuluseshelo lwonti, muvashindihaje shima venga vali vovulo.

³⁰ She mbombo ya Chilisiti yʼimupeleye ukusyala hansi ukufwa, shʼahasita nukusaganyʼuvulanzi, ukuti avwizuzyajʼuvusovele vwe vusyaye kumwinyu uvwa kumbombelʼine.