Filipi 1 - Tesitamenti Umupwa 1965

Umulamu

¹ UPavuli nuTimoti avanyamata va Chilisiti Yesu tukuvasimbila mwe vafinjile mwenti mwa Chilisiti Yesu mwe muli mu-Filipi namwe vasungashivanza namwe vaṿwambombo:

² Uvwila nuvwihalo vwe vukufuma kwa Mulungu uTata witu nakwa Mwene uYesu Chilisiti vuvanje namwe.

Ulusalifwo nuluseshelo lwa Pavuli

³ NkumusalifwʼuMulungu wane shima lwe nkuvakumbuhʼimwe,

⁴ shima lwe nkuvaputila mwenti pe nkuputa nuluzevelo,

⁵ she nazile muli nuvulilani mwIvangeli ukufuma pisikʼitanzi lila ukufiha nakushinishʼuku.

⁶ Shʼine nzitungamiye zinizi ukuti uno wʼayanzitʼimbombʼinyinza mumoyo ginyu, wʼaliyimalilizya alifiha nayo pisiku lya Chilisiti Yesu.

⁷ She zye zigolosile kukwane ukuvasivilila mwenti zinizi she muli mumwoyo wanʼimwe, she muvwila mwe valilani vane mwenti mumunyololo nalwe nkuliyanjilʼIvangeli nukulisimishizya.

⁸ ShʼuMulungu we wʼuhome wane, amanyile ṿwe nkuvasambilʼimwe mushikunzi she shili mumwoyo wa Chilisiti Yesu.

Uluputo lwʼahavaputilaga ve vakuvazyʼukalata wakwe

⁹ Zye zizyo nkuputʼine ukuti ishikunzi shinyu shonjezyaje nkani ukuṿula muvumanyinsanyi namuvusavulanyi vwonti vwa munsivo,

¹⁰ ukuti muzilingajʼinongwa mwe zilehine, ukuti muvanje mwe vasitamafuji, havili mutavanje nazyo nazimo izya kuvalonga pisiku lya Chilisiti,

¹¹ lwe mwizuye insanga zya vugolosu zyʼapezilʼuYesu Chilisiti, izya kumushindihʼuMulungu nukumutundumiha.

Zye zyalolesile muvukungwa vwakwe

¹² Ilelo mwe vamwitu, nkwanzʼukuvamanyisya ukuti zye zinazilʼine zyonjezizye nkani ukujenzyʼIvangeli.

¹³ Musukumile she nakumanyololo wane wulolesile kumpuga yonti ya vasikali va Kesali nakuvanji vonti ukuti wuli pazya Chilisiti.

¹⁴ Vope navamwitu mwa Mwene vaṿuzile ve vatungamiye mwe mumunyololo wane ukuti vapitilizyaje ukujimba nukuyangʼizwi lya Mulungu shisitakutetema.

¹⁵ Valipo vamo ve vakumukumusyʼuChilisiti mulugulumwo namuhafwishi, nkandi valipʼavamwavo ve vakumukumusya namoyo amazelu.

¹⁶ Avene vanava shivatumile she shikunzi she vambwenyʼine ukuti nkuliyanjilʼIvangeli uvwinza.

¹⁷ Vala nyene lwe vakumukumusyʼuChilisiti, vate vasitavugulugulu, pe vukuvatuma vwe vupelakulundunkana, she vakwanzʼukunonjezya uvulemenchelelwa mumunyololo wane.

Akuseshela ukuti izya Chilisiti zyakumuha

¹⁸ Vuli vuli lelo? Inga vakumukumusya uChilisiti, nashenga shonu shikuvatuma, nashenga vakumukumusya kushifumbo pamo muvwanalyoli, popʼine nkuseshela. Havili ndiseshela.

¹⁹ She manyilʼine ukuti zinizi ziliyipelʼukuva zya kumpohʼine, she mukumputila, wope nuMupepo wa Yesu Chilisiti akuntula nkani.

²⁰ Inza she nkulwilwinta havili nkusuvila ukuti ntalisuha, nkandi nashinishi inzʼamanda gonti shisitakutetema ndimutundumiha uChilisiti mumuvili wane namuvulanzi vwane namuvufwe.

Amwe shonu she shima kushamwavo, uvulanzi pamo uvufwe?

²¹ ShʼuChilisiti we vulanzi vwane, havili ukufwa kwe vulonsi kukwane.

²² Ilelo ingʼuvulanzi vwa mumuvili vwe nsanga zya mbombo kukwane, pe nkupotwa ilya kuyisevela.

²³ Zye zimbufile zye zivili. She nkasime ukutuluha ukuvalʼukuva nuChilisiti, she kwe kulusizye nkani Uvwinza.

²⁴ Nkandʼimwe mumpeleyʼukuti kuvanje kwinza kwe kuva mumuvilʼisutʼine,

²⁵ Ilelo zye nzitungamiye, zye manyilʼine ukuti isuti nkuva, havili nkudila namwe mwenti ukuti mujendelele nukuva nuluseshelo lwa lwitiho,

²⁶ ukuti ukuyitima lwinyu kulafuhaje mwa Chilisiti Yesu mwe mumwane lwe ndiyinza ukuva namwe havili.

Insoshe zya kugomwʼumwoyo

²⁷ Nkandi ulujendo lwinyu luvanje inza ṿwe zihondeye mwIvangeli lya Chilisiti, ukuti nashenga nkwinza nukuvenyʼimwe nashenga ndʼukutali niṿwaje izyinyu ukuti musimfile mumupepo woka, ukuti muli numwoyo woka lwe mukulwa pazya lwitiho lwʼIvangeli.

²⁸ Havili mutavogopaje muli zyonti vuvo ve vakwanzʼukuvapingʼimwe. Zinizi zye zya kuvamanyila mumwo ukuti avene va kutupulwa, nkandʼimwe mwe va kupokwa. Zinizi zye zikufuma kwa Mulungu.

²⁹ Shʼimwe mutahakunjilwa lweka lwe lwitiho lwa kumwitihʼuChilisiti, nkandi nizya kumuyimbila vovulo she mwe vantu vakwe.

³⁰ Namwe mukupasʼulupaso lwe mwazile nkupasa nane, lwe nashinishi mukwiṿwa ukuti ndi nalwo.