Filemoni 1 - Tesitamenti Umupwa 1965

Izya kutaliha

¹ UPavuli umukungwa wa Chilisiti Yesu nuTimoti uwamwitu, tukukusimbila we Filemoni unkundwa umuvomyi poka naswe,

² nuApiya umwanawitu nuAlikipu umulwavulugu wamwitu nishivanza shonti sha munyumba yaho:

³ Uvwila vuvanje namwe nuvwihalo vwe vukufuma kwa Mulungu uTata witu nakwa Mwene uYesu Chilisiti.

Ukumulavilʼumuzya umushimbilizi

⁴ Shima nkumusalifwʼuMulungu wane pazyaho lwe nkukukumbuha mumputo zyane,

⁵ she niṿuye ishikunzi shaho nulwitiho lwaho lwe lwenyizye kwa Mwene witu uYesu nakuvafinjile vonti,

⁶ ukuti uvulilani vwa lwitiho lwaho vuvombʼimbombo muvumanyinsanyi vwa nyinza zyonti Zye tuli nazyo, Zye zyenyizye kwa Chilisiti.

⁷ She nali nuluseshelo ulwinji nuvusuvizi ṿwe ṿwafumile mushikunzi shaho, shʼamoyo ga vafinjile gahagʼamaha mumwahʼiwe, we wamwitu.

⁸ Mwe mumwo nkuyanga shisitakutetema mwa Chilisiti, nkukulajizya zye pakuti uzivombaje,

⁹ nkulusyʼukukulambilizya, she nkonzizye vovulo lelo, ne Pavuli ne mugosi, havili shinishi njipezilʼukuva ne mukungwa wa Chilisiti Yesu,

¹⁰ nkukulambilizya pazya mwana wane, we imupafile mwe munkusa zyane, nkutaha uOnesimo,

¹¹ we lulwo atakuvombeye nahamo, nkandi shinishi akutuvombelʼahinza iwe nine vwelele.

¹² We wuyo imugalusizye kukwaho, wuyo nyene we mwoyo wane, umuposhele;

¹³ wʼine natili atendamaje kukwane ukuti shʼiwe utalipo ambombelaje munkusa zyʼIvangeli limpeleyʼine.

¹⁴ Ine nyene ntakasime ukuvomba nazimo shisitakuzimanyʼiwe, ukuti inyinza zyʼukuvomba zitavanje zya kuṿijilizilwa nkandi zivanje zya muvusatushe.

¹⁵ She ngavanga zyʼayepeye kukwaho kuhavalilizyo hansi, ukuti uvanje nawo shimashima.

¹⁶ Ishi utamusivaje ilya muzya vwelele ndali, nkandi ukulusya pavuzya umusivililaje ukuva wamwinyu unkundwa. Shʼalusizye ukuva wamwitʼine, pʼakupela poshi ukuva wamwinyʼiwe mumuvili namwa Mwene!

¹⁷ Ishi inga umbwenyʼine ukuva ne mulilani waho, pʼumuposhele fwe ngati ukumposhela nene.

¹⁸ Nkandʼinga ananzile yimo kukwaho, inga ṿilipo vimo iṿwa kuti pe pakuti akupanje, ṿwʼumbazizye nene.

¹⁹ Nene ne Pavuli nsimṿile numuhono wane, ine ndikulipa. Zye ntakukukumbusya izi ukuti uli numulandu nawe kukwane uwa kuyilipa kukwane wenewe.

²⁰ Ena, we wamwitu, uleshe nane ndonkaje hamo kukwaho mwa Mwene. Unsansamusyaje umwoyo wane mwa Chilisiti.

Izya kumpelela

²¹ Lwe nakusimbila pe nkutungamiye ukuti ulinitiha. Imanyile ukuti ulipitilizya napali zizyo Zye ninzile.

²² Pope napavukato unjananizyaje nzila. She nkusuvila ukuti imputo zyinyu zilimpa ukuva ne shikunjilwa she shikwinzʼukukunjilwa kulʼimwe.

²³ Akukulamuha uEpafula, we tukunzilwe poka nawo mwa Chilisiti Yesu,

²⁴ nuMaliko nuAlisitaliki nuDema nuLuka, ve vavombezi poka nane.

²⁵ Uvwila vwa Mwene Yesu Chilisiti vuvanje numupepo winyu. Amen.