2 Timoti 4 - Tesitamenti Umupwa 1965

¹ Muvwahome vwane nkukulajizya kuminso ga Mulungu naga Chilisiti Yesu wʼalivalonga avalanzi navafwe, kuvuvoneshelo vwakwe nakuvumwene vwakwe:

² Kumusyagʼizwi, vuhaga nalyo nashenga palingine nashenga patalingine, uvamenelezyaje, uvahalapilaje, uvayinzanyaje lwʼuvuzyihamulaha namunsambilizyo.

³ Shʼakwinzʼumwaha pʼavantu valisita ukuva ninsambilizyo impelavulanzi, nkandi inza she vasungwilwe vuvo valiyanzila avasambilizi impuga, mwe vazile mukunyejela mumakutwi gavo.

⁴ Namakutwi gavo valigasyetula kuvwanalyoli, vajende nukugasontelezya kutulumbe.

⁵ Iwe nyene nazimo zitahakuhole ndali, ujimbililaje amayimba, uvombʼimbombo ya munyatulʼIvangeli, ulunjisyaje uvuvombezi vwaho,

⁶ shʼine nakupungulwa shinishi. Isiku lya kutuluhʼine lyinzile.

⁷ Ulupasʼulwinza mpasile. Imazile ukushimbila mulutumṿanyo. Ulwitiho numishizizye.

⁸ Mwe mumwo shinishi ambishiyʼishipambwi sha vugolosu, shʼalimpa we Mwene pisiku lila, wuyo we mulonzi umugolosu. Ilelo atalimpa nene neka ndali, nkandi navonti ve vakunzitʼuvuvoneshelo vwakwe.

Intumi ya vuntu nizya kulagana

⁹ Upimpile, uyinze kukwane luvilo luvilo,

¹⁰ ShʼuDema ashimbiye, shʼakupapilʼizya munsi ino, avazile mu-Tesaloniki. Ukilesikesi avazile mu-Galatiya, uTiti avazile mu-Dalimatiya.

¹¹ Asyaye we Luka weka kukwane. Umunyatule uMaliko uyinze nawo, shʼakuntula nkani muvuvombezi.

¹² UwenʼuTikika wʼimutumile mw-Efeso.

¹³ Umwenda wanʼumutote we nakulesile mu-Tiloya kwa Kalopu ulete lwʼukwinza, navakalata, inkani amakwembe gala amatinyu agakusimba mumwo.

¹⁴ UAlekizanda umusyani wʼampeleyʼimbivi inyinji. Alimugalushizya we Mwene alilinga pe pambombo zyakwe.

¹⁵ Wʼushevaje nkani, shʼahanile nkani inongwa zyitu.

¹⁶ Ulutanzi lula lwe nkamulaga zye vahandonjelelaga, umuntu numo atali poka nine, nkandi vonti vandesile. Nkulava ukuti vatatashilwaje uvuvivi muli zinizi.

¹⁷ NkandʼuMwene ahanimila, ahangomwa, ukuti imalilizyaje uvukumusyi vwane, ukuti avakunzi vonti viṿwaje, mwe mumwo nkapona mwilomu lya nsama.

¹⁸ Havili uMwene alimfwula kumbombʼimbivi zyonti, alimpoha ukuti imfishe mushinamwene shakwe sha kumwanya. We wuyo ali nuvumwamu shimashima. Amen.

¹⁹ Ulamushe uPilisika nuAkwila ninyumba ya Onesifoli.

²⁰ UElasito asyaye mu-Kolinti. UTilofimo we namulesile avinile mu-Mileti.

²¹ Upimpile uyinze lwʼulupepo lushili. UYibulo nuPudesi nuLinosi nuKilavudiya navamwitʼavinji Vakuvalamuha.

²² UMwene avanje numupepo waho. Uvwila vuvanje nawe. Amen.