2 Timoti 3 - Tesitamenti Umupwa 1965

Imbivi zye zikwinza

¹ Ilelo Umanye ukuti mumanda ga kumpelela pe galiyinzʼamaha ga mayimba.

² Shʼavantu valiyikunda veka, valiva vapapilampiya, valiyitima veka, valiva namabado, avaligandigo, ve vakuvilʼavapafi vavo, avasitakusalifwa, avasitavufinjile,

³ avasitashikunzi, avagulugulu, avakwalanzi, ve vatakuzipotʼimpapilo, avahali, ve vatakusungwʼinyinza,

⁴ inkomi, avapopo, ve vizuye uvwahayivale, ve vakwanzʼukuyiseshelezya vuvo veka ukulusya ukumukundʼuMulungu;

⁵ ve vakuloleha fwe ngati vanyilaMulungu, nkandi amaha ga vunyilaMulungu vakugahana. Vʼuvagunjile vanava.

⁶ She muli vuvo valipo ve vakuyinjizya munyumba nukutugomʼutwantanda twe tuyijelenkinye uvutalamalandu, twe zikutwembelezyʼimpapilo Zye nyinji;

⁷ utwenʼukusambilila kwe tukusambilila shima inongwa, nkandʼukufiha tutakufiha nalumo kuvumanyinsanyi vwa vwanalyoli.

⁸ Inza shʼuYanesi nuYambulesi valuye nuMose, ṿwe vahonzizye navanava, vope vakulwa nuvwanalyoli. Avantʼiva vananjisile injele, vatahondeye muzya lwitiho.

⁹ Ukwenʼukupitilizya nyene kwe vatalipitilizya ndali, shʼavantu vonti valivenyʼapazelu uvuwelewele vwavo, inza she vwalolesile nuvwa vala.

Izya kumusungʼuTimoti

¹⁰ Nkandʼiwe undandatʼine munsambilizyo namulujendo, namuli zizyo zye nakasimʼine, namulwitiho namuvuzyihamulaha namushikunzi namuvuṿindilamalema,

¹¹ namukuṿwimilwa namumayimba ge nkayimbaga mw-Antiyokiya namw-Ikoniyo namu-Lisitila, vwontʼuvuṿwimilwa vwe mbegazilwe, nkandʼuMwene amposile muli vwonti.

¹² Vonti venga vasungwilwe ukulandila mwa Chilisiti Yesu muvunyilaMulungu ve valiṿwimilwa.

¹³ Avene nyenʼavavivi nave vakuvahopʼavantu valipitilizya ukuva vavivi, ve vakuvatezyʼavantu nave vakutezelwa.

¹⁴ Nkandʼiwe usyelemetele muli zizyo zyʼusambilizilwe namuli zizyo zye zikuhozile, shʼuvamanyile ve vakusambilizizye,

¹⁵ havili ukufuma kuvunsi uvamanyile avakalata avafinjile ve vakukusontelezya kuvupokwa vwe vuli mwa Chilisiti Yesu.

¹⁶ UMupepo wa Mulungu avafutiyʼavakalata vonti, havili vahondeye kunsambilizyo, nukumenelezyʼimbivi, nukugolosyʼumuntu, nukumusundʼinjele zya vugolosu umuntu,

¹⁷ ukuti umuntu wa Mulungu avanje mwila, ayengupaje kumbombʼinyinza zyonti.