2 Timoti 2 - Tesitamenti Umupwa 1965

¹ Iwe lelo we mwana wane, gomaga muvwila vwe vuli mwa Chilisiti Yesu.

² Zyonti zyʼuyiṿuye kukwane pavahomʼavinji, zyʼuvapanjʼavantʼavatungamu ve vahondeye ukuvasambilizya navamwavo.

³ Nawe lelo uyimbaje poka nane, uvoneshe ukuva we mulwavulugu umwinza uwa Chilisiti Yesu.

⁴ Numʼumulwavulugu atakuyilivinkanya mumbombo ya kuyanzilʼiṿwa kulya, ukuti ave mwinza kuminso ga mutwale wa vulugu.

⁵ Wengʼakupasʼulupaso, wope vatakumuzwihʼishipambwi ingʼatakulandata munkomelezyo zya lupaso.

⁶ Shʼumulimamugunda wʼakuyikungulʼukulima we pakuti atalishe wuyo ukulyʼinsanga zya mumugunda.

⁷ Tejelezyagʼahinza Zye nkuyanga. ShʼuMwene akukupʼinjele zya kuzyaganya zyonti.

⁸ Umukumbuhaje shimʼuYesu Chilisiti wʼazyusile kuvafwe, uwa mumbeyu ya Davidi, inza she likuyangʼivangeli lyane,

⁹ lye limpeleye ukuyimba nukukungwa munkusa fwe ngati ne muvombambivi. Ilyenʼizwi lya Mulungu nyene lye litakunzilwe.

¹⁰ Mwe mumwo lelo nkujimba muli zyonti she nkuvakumbuha avasavulwa, ukuti vope vafishe muvupokwa vwe vuli mwa Chilisiti Yesu poka nuvumwamu vwa shimashima.

¹¹ Litungamu izwi lye likuti: Inga tukufwa poka nawo, pe tulilandila poka nawo vovulo;

¹² inga tukujimba, pe naswe tuliva swe vamwene poka nawo; inga tukumuhanʼuwene, pe wope alituhana naswe;

¹³ inga te swe vatungamu, pʼuwene akuva mutungamu shima. Shʼuwene atangayihana wuyo weka.

Insoshe kuzya madali

¹⁴ Zyʼuvakumbusyaje zinizi, uvahomelezyaje nkani kuminso ga Mulungu ukuti vatadalinkanʼamadali ge gatakuvavosya nahamo, ge gakuvananga venga vakutejelezya.

¹⁵ Uyikungule ukutʼuMulungu akwenye ukuva we mutungamu, umuvomyi umusitansoni, wʼakugolosyʼukuvagavanyʼavantu izwi lya nalyoli.

¹⁶ Usegushe kunjango zya shaha insitavunyilaMulungu. Shʼava venga vazikasime, mwe vakwonjezya nkani ukumwilʼuMulungu.

¹⁷ Lyope nizwi lyavo likunyeta ngati lilonda lya ntali, muli vuvo valipo uHimenayi nuFileti,

¹⁸ ve vapagusile kunongwa zya nalyoli lwe vakuti uvuzyuha vulipo shinishi, vakuṿwalanganyʼulwitiho lwa vamo.

¹⁹ Ulwenʼulwalo lwa Mulungu nyene ulugomu lwe lusimfile, luli nishimanyilo she shikuti: UMwene avamanyilʼavakwe, nashe shikuti: Vonti venga vakutahʼizina lya Mwene, ve vatantamane kuvugombanu.

²⁰ Munyumbʼimpiti mwe ṿitakuva mumwo iṿililo ṿwa sahabu niṿwa feza ṿweka ndali, nkandi niṿwa makwi niṿwʼivumba, yimo nyene ṿwa mbombʼinyinza, ṿimo ṿwa mbombo ya munyali.

²¹ Ilelʼuno wengʼayizelufizye kuli Zye nataha, wʼaliva shililo sha kwimishilwa, ishifinjile, she shihondeye ukumuvombela umwenesho, she shihondeye kumbombo zyontʼinyinza.

²² Ushimbilʼimpapilo zya muvujaha, nkandʼuyikungule kuvugolosu nakulwitiho namushikunzi nakuvwihalo, mwʼusangane navo ve vakuputa kwa Mwene namoyʼamazelu.

²³ Uyileme kumadali ga vudedevazu amasitansambilizyo, ugamanye ukuti gakupapʼuvulugu.

²⁴ Uwenʼumunyamata wa Mwene we pakuti atalwanje ndali, avolovelajʼavantu vonti, amanye nukuvasambilizya, umujimṿi kumbivi,

²⁵ avasundaje ninjelʼintelefu venga vakululiha, ukuti ingavanga uMulungu avapanjʼulupinduho lwe lukuvapelelʼukuvumanyinsanya uvwanalyoli,

²⁶ havili vafume mwihonde lya Mukwakwa, lwʼavalemile ukumuvombela ulukasamo lwakwe.