2 Timoti 1 - Tesitamenti Umupwa 1965

Umulamu nulusalifwo

¹ UPavuli umwapositili wa Chilisiti Yesu, nʼaninjizizye we Mulungu palukasamo lwakwe ukulandata mulumfingwi lwe lukuti muli nuvulanzi mwa Chilisiti Yesu.

² Nkukusimbila we Timoti we mwana wane unkundwa: Uvwila nulupepelezyo nuvwihalo, ṿwe yikufuma kwa Mulungu uYise nakwa Chilisiti Yesu uMwene witu, ṿwe ṿivanje namwe.

³ Nkugwʼulupi kwa Mulungu we nanzite ukumuvombela kwe kuvasekulu ne wa nyenyezyʼinzelu, lwe nkukukumbuha mumputo zyane umusanya nashavusiku.

⁴ Nkukusamba nkani lwe nkukumbuhʼamansozi gaho, ukuti nizulaje uluseshelo.

⁵ Zimo zinkumbusizyʼulwitiho lwaho lwʼuli nalwo ulusitamafuji nagamo, lwe lwatalisilʼukuzenga mwa nyohokulu uLoyisi, namwa nyohombala uYinike, lwe nkutungamiye nawe ukuti luzenzile namumwaho.

Insoshe kuzya mute nukugomwʼumwoyo

⁶ Mwe mumwo nkukukumbusya ukuti ushipementele shahaje havili ishikunjilwa sha Mulungu she waposheleye pala pe nakuvisilʼinyove.

⁷ Shʼuwenʼumupepo wʼuMulungu atupiye wʼate wa lyoga ndali, nkandi wa maha nishikunzi nuvwahayisunde.

⁸ Mwe mumwo lelo utafwanjʼinsoni ukuhomeshezyʼuMwene witu, havili nakukwane ne mukungwa wakwe, nkandi uyimbile poka naswe panongwa zyʼIvangeli ukulandata mumaha ge gakufuma kwa Mulungu,

⁹ Wʼatuposile nukutwita ulwitʼulufinjile lwe lute lwa kutulipa pambombo zimo zye twavomṿilʼiswe ndali, nkandi lwe lukulandata mulukasamo lwakwe lwʼali nalwo ukufuma he hali namuvwila vwakwe vwʼatupiye nzila mwa Chilisiti Yesu lwe gashili nukuvazilwa amaha ga nsi yinino.

¹⁰ Vwe vuvwo shinishi vuvonesile muvuvoneshelo vwa Muposhi witu uChilisiti Yesu wʼayefizyʼuvufwe, avisilʼapazelu uvulanzi nuvusitakuvola mwe mwIvangeli.

¹¹ Nkutahʼuvu vwe ambisilʼine ukuva ne mukumusyi numwapositili numusambilizi wa vakunzi.

¹² Mwe mumwo nkuziyimbila zyenezyo, nkandi ntali ninsoni, shʼimumanyile wʼimwitisile. Imutungamiye ukuti ahantu hane he mpelilwe munyove alihasunjilila ukufiha pisiku lila.

¹³ Amazwi amalanzi gʼuyiṿuye kukwane lwʼuli mulwitiho namushikunzi she shili mwa Chilisiti Yesu, gavanje shiholanyo sha kwenyelezya mumwʼiwe.

¹⁴ Ahantʼahinzʼaha he havisilwe munyove zyaho, hʼuhasunjilile mumaha ga MupepʼuMufinjile wʼazenzile muhati zyitu.

¹⁵ Ishi umanyaje ukuti ava mw-Asiya vonti vangunjiyʼine, ve muli vuvo alipo uFigeli nuHelemogeni.

¹⁶ UwenʼuMwene wʼayilote nulupepelezyo inyumba ya Onesifoli, shʼansansamusizye havili havili mumwoyo wane, havili atali ninsoni pazya munyololo wane,

¹⁷ nkandi lwe nali mu-Loma, pʼatahahava ukundondola, ahanaga.

¹⁸ UMwene amulote ukuti ahalwajʼulupepelezyo kuminso ga Mwene pisiku lila. Iyenʼimbombo yonti yʼambombeyʼine mw-Efeso yʼuyimanyile nkani.