2 Peteli 1 - Tesitamenti Umupwa 1965

Umulamu

¹ USimoni Peteli, umunyamata numwapositili wa Yesu Chilisiti, nkuvasimbila mwe muposheleyʼulwitiho lwe luli inza shʼulwitu uvugomu, muvugolosu vwa Mulungu witu nuMuposhi uYesu Chilisiti:

² Uvwila vuvanje namwe nuvwihalo vuṿulaje muvumanyinsanyi vwa kumumanyʼuMulungu nuYesu uMwene witu.

Inyinza na mata gʼavachilisiti vali nago

³ Shʼamaha gakwe aga vulungu gatupiye ṿwonti iṿwa vulanzi niṿwa vunyilaMulungu muvumanyinsanyi vwa kumumanya wuyo wʼatwisite mwe muvumwamu vwakwe wuyo namumbombo zyakwʼinyinza.

⁴ Mwe munumu afinzile naswe imfingwʼindusyi uvupiti nuvugomu, zyʼavakunjiye ukuvatulʼimwe ukuholana nawo ishati sha vulungu, lwe mulushimbiye ulunanjiho ulufuma mumpapilo zya munsi.

⁵ Mwe mumwo lelo muyikungule uvwahayikungule ṿwonti ukuti palwitiho lwinyu pe mupatinkanye nuvusunde, pavusunde pe mupatinkanye nuvumanyinsanyi,

⁶ pavumanyinsanyi pe mupatinkanye uvuteshelaṿintu, pavuteshelaṿintu pe mupatinkanye nuvuṿindilamalema, pavuṿindilamalema pe mupatinkanye nuvunyilaMulungu,

⁷ pavunyilaMulungu pe mupatinkanye nukukundʼavamwinyu, pakukundʼavamwinyu pe mupatinkanye nishikunzi vwelele.

⁸ Shʼinga muli nazyo zinizi, inga zikuṿula, pe zitakuvapelelʼimwe uvuhata, zitakuvapela ukuva mwe vasitansanga muvumanyinsanyi vwa Mwene witu uYesu Chilisiti.

⁹ Shʼuno wengʼate nazyo zinizi, we wantonko, wʼakwenyʼahamṿuve, shʼaluṿilwe mwʼazelufilwʼamalandu gakwe amakali.

¹⁰ Mwe mumwo lelo mwe vamwitu, mulusyajʼukuyikungula ukusimpa mulwitiho lwinyu namuvusavulwa vwinyu, shʼinga mukuhonzya vovulo pe mutalipunula nalumo.

¹¹ She pe muliyananizilwa uvwinjililo shisitavwimi uvwa kwinjila muvumwene uṿusitakusila vwa Mwene witu uMuposhi uYesu Chilisiti.

UPeteli akusogolelʼuvufwe

¹² Mwe mumwo nte nduṿwaje ukuvakumbusya zinizi nashenga muzimanyile, nashenga mugomile muvwanalyoli vwe vulipo.

¹³ Ine nkuti pe ngolosizye inga nkuvadamusyʼimwe nukuvakumbusya lwe suti nchili ndi mwihema linili.

¹⁴ She manyilʼine ukuti pasyaye pansi vwelele pʼihema lyane linili liliyefelwa, inza shʼandanzile uMwene witu uYesu Chilisiti.

¹⁵ Zye zizyo nkuyikungula ukuti shima muvanje naho hamo he halivakumbusya zinizi lwe nsogoyʼine.

Uvwahome vwa Peteli nuvwa vakuvwi

¹⁶ She lwe tukuvavuzyʼimwe izya maha nizya vwinzilo vwa Mwene witu uYesu Chilisiti, pe tutaianditʼiṿwili ṿwe vakwiliha muvusheṿu vwa vantu ndah, she sweneswe tuhenyelezya mwe mupipi uvupiti vwakwe uvumwamu.

¹⁷ Shʼuwene ahaposhela ulushmdiho nulutimo kwa Mulungu uYise lwʼizwi lihafuma muvupiti uvulusyʼuvwinza, lye lihafiha papakwe, lihati: Uno we Mwana wane unkundwa kukwane, we nkuseshela muli wuyo.

¹⁸ Izwi linili tuhalyiṿwa naswe lwe likufuma kumwanya pala pe twali nawo pigambʼifiniile lila.

¹⁹ Havili tuli nalyo nizwi lya vukuvwi lye lilusizyʼukusimpa, lye zihondeye inga mukulyenyelezya fwe ngati nyak yʼikwaha kumo kushisi, ukufiha kuvushelo vwʼisiku, lwʼunamankungulu akutukula mumoyo ginyu.

²⁰ Mutalishe ukumanya ukuti amazwi gonti aga vukuvwi ge gasimvilwe mwa kalata ge numo atangagilula weka.

²¹ She nalimʼizwi lya vukuvwi litafumile mwʼakasime wekʼumuntu ndah, nkandʼavantʼavafinjile va Mulungu vayanzile inza shʼavinjiyʼuMupepʼuMufinjile.