1 Yohani 5 - Tesitamenti Umupwa 1965

Ulwitiho lwa muchilisiti

¹ Vonti venga vakwitiha ukuti uYesu wʼuChilisiti, ve vapafilwe mwa Mulungu. Ilelo venga vamukunzite umupafi, ve vamukunzite wope nawe mwana wʼapafilwe mumwakwe.

² Muli zinizi tukuyimanya ukuti tuvakunzitʼavana va Mulungu, inga tumukunzitʼuMulungu nukulandatʼindajizyo zyakwe.

³ Shʼuku kwe kumukundʼuMulungu ukuti tuzisajile indajizyo zyakwe. Izyenʼindajizyo zyakwe zye zite ngomu.

⁴ She zyonti zye zipafilwe mwa Mulungu zye ziyipositʼinsi. Uvwene lelo uvupoti vwe vuyipositʼinsi, lwe lwitiho lwitu.

⁵ Uwenʼumupotansi we wʼunanu, te wuyo wengʼayitisile ukuti uYesu we Mwana wa Mulungu?

⁶ We wuyo wʼayinzile muminzi namumavanda, uYesu Chilisiti, te mwe muminzi mweka ndah, nkandi namumavanda. Uwenʼuno wʼakuhomeshezya we Mupepo, shʼuwenʼuMupepo we vwanalyoli.

⁷ She vah vatatu ve vakuhomeshezya:

⁸ UMupepo naminzi namavanda, ilelo ve vatatu vanava vayipezilʼukuva woka mwene.

⁹ Apene lwenga tukuposhela zyʼavantu vakuzihomeshezya, pʼuvwahome vwa Mulungu vulusizyʼuvupiti, shʼuvu vwe vwe vwahome vwa Mulungu ukuti amuhomeshezizye uMwana wakwe.

¹⁰ Uno wengʼamwitisilʼuMwana wa Mulungu wʼali nalwo uluhomeshezyo muhati mumwakwe. Nkandʼuno wengʼatakumwitihʼuMulungu wʼamulumisilʼilenga, shʼasisitʼukuluposhelʼuluhomeshezyo lwʼuMulungu amuhomeshezizyʼuMwana wakwe.

¹¹ Ulu lwe luhomeshezyo ukuti uMulungu atupiye uvulanzi vwa shimashima, uvulanzi vunuvu vuli muMwana wakwe.

¹² Uno wengʼali nawo uMwana, wʼali navwo nuvulanzi. Uno wengʼate nawo uMwana wa Mulungu, we vwope navwe vulanzi ate navwo.

Izya kumpelela

¹³ Zye mbasimbiye zinizi ukuti mumanyaje ukuti muli navwo uvulanzi vwa shimashima, imwe mwe mwitisilʼizina lya Mwana wa Mulungu.

¹⁴ Ulu lwe lusuvilo lwe tukusuvila kuli wuyo ukuti muli zyonti zyenga tukulava ukulandata mulukasamo lwakwe zyʼakututejelezya.

¹⁵ Ilelo inga tumanyilʼukuti akututejelezya muli zyonti zyenga tukumulava, pe tumanyilʼukuti zye tumulaṿile zye tuli nazyo.

¹⁶ Inga wokʼayazile uwamwavo akutalʼamalandu ge te mapelavufwe, wʼamuputilaje, pʼalimupelelʼuvulanzi, nkutaha vuvo ve vatakutalʼamalandu amapelavufwe. Vulipo uvutalamalandu uvupelavufwe. Ntakuvutaha vuvwo ukuti avuputilaje.

¹⁷ Uvusitavugolosu ṿwonti vwe vutalamalandu. Vulipo nuvutalamalandu vwe vutakupelʼuvufwe.

¹⁸ Tumanyilʼiswe ukuti vonti ve vapafilwe mwa Mulungu vatakutalʼamalandu, avene ve vapafilwe mwa Mulungu vakuyisunjilila, ilelo pe wope nuwalombwa akupotwa ukuvapalamansya.

¹⁹ Tuyimanyilʼiswe ukuti tufumile mwe mwa Mulungu, ninsi yonti yili muvuvivi.

²⁰ Tumanyilʼukuti uMwana wa Mulungu ayinzile, atupiye ulusimishizyo lwa kumusimishizya wuyo we wa nalyoli, niswe tuli muli wuyo we wa nalyoli, muMwana wakwe uYesu Chilisiti. Uwene we Mulungu wa nalyoli, we vulanzi vwa shimashima.

²¹ Mwe twana mwe, mufupushe kumalungu.