1 Yohani 3 - Tesitamenti Umupwa 1965

Ishikunzi sha Tata shikulongozya kuvulanzʼuvwinza

¹ Yenyi uvupiti vwa shikunzi sha Tata ṿwʼatukunzite ukuti tutashilwaje ukuva swe vana va Mulungu, ena nalyoli swe vana va Mulungu. Mwe mumwo insi yitatumanyilʼiswe, she yitamumanyile nawuyo.

² Mwe vankundwa, shinishi pe swe vana va Mulungu. Ilelo zishili ukuloleha ṿwe tuliva, nkandi tumanyile ukuti inga lumo lwʼalolehʼuwene, pe tuliva fwe wuyo, she tulimulola ṿwʼali.

³ Avene vonti ve vakusuvila zinizi kukwakwe, ve vakuyizelufwa inza she wope muzelu.

Amalandu gatʼuvulilani nuvwana vwa Mulungu

⁴ Vontʼava venga vakutalʼamalandu ve vilanyankomelezyo, shʼuvutalamalandu vwe vwilanyankomelezyo vuvwo.

⁵ Havili mumumanyilʼuwene ukuti lwʼahaloleha pʼalolesile ukuti ayefwaje amalandu gitu, havili uvutalamalandu vutalipo navumo mumwakwe.

⁶ Vonti venga vakuva mumwakwe wuyo shima ve vatakutalʼamalandu. Vonti venga vakutalʼamalandu ve vatamuwenyi, havili vatamumanyile.

⁷ Mwe twanʼimwe, mwandaje numo atavatezyaje. Shʼuno wengʼakuvomba vwe vugolosu we mugolosu vovulo inza she wope wuyo mugolosu.

⁸ Uwene wengʼakutalʼamalandu wʼafumile mwa Mukwakwa, shʼuwenʼuMukwakwa ayanzite kwe kuvwando shima ukutalʼamalandu. Zye zizyo zyamupeleyʼukulolehʼuMwana wa Mulungu, ukuti azipalasanyʼimbombo zya Mukwakwa.

⁹ Vontʼava venga vapafilwe mwa Mulungu ve vatakutalʼamalandu, shʼimbeyu ya Mulungu yili muhati zyavo shima, vatamanyirukutalʼamalandu, she vapafilwe mwa Mulungu.

¹⁰ Muli zinizi mwe vakuloleshela avana va Mulungu navana va Mukwakwa. She ve vatakuvombʼuvugolosu vatafumile mwa Mulungu, nave vatakuvakundʼavamwavo vovulo.

¹¹ Ino ye ntumi ye mwiṿuye ukufuma kwe kuvwando, yʼikuti tukundanaje.

¹² Tutavanje fwe wʼuKayini wʼafumile muwalombwa havili inza shʼamugozile uwamwavo. Amwe pʼamugojeye zyonu? Shʼimbombo zyakwe zyali mbivi, nkandʼizya wamwavo zye zyali ngolosu.

Ishikunzi sha kuvakunda avamwitu

¹³ Zye mutahaganduhaje mwe vamwitu ingʼinsi yikuvapata.

¹⁴ Iswe tumanyile ukuti twefile muvufwe, twinjiye muvulanzi, she tukuvakundʼavamwitu. Uno wengʼatali nishikunzi wʼali mwe muvufwe.

¹⁵ Vonti venga vavapasitʼavamwavo ve vagozi. Havili mumanyile ukuti avagozi vonti vatali muvulanzi vwa shimashima vwe vukuva shima muhati zyavo.

¹⁶ Ishenʼishikunzi she tushimanyile mumwo mwʼatufwiliye uvulanzi vwakwe. Mwe mumwo lelo naswe pakuti tuhonzyaje vovulo ukuvafwilʼavamwitu uvulanzi vwitu.

¹⁷ Apene lelo lwenga woka ali naṿwʼiṿintu vwa vulanzi vwa munsʼumu, ilelo pʼayagaje uwamwavo apositwe iṿintu ṿiniṿi, pʼuwene ingʼasindilʼumwoyo wakwe, pʼishikunzi sha Mulungu shingava mumwoyo wakwe vuli?

¹⁸ Mwe twana mwe, tutakundanaje nalye lizwi lyeka, nalye lilomu lyeka ndah, nkandi tukundanaje mumbombo namuvwanalyoli.

¹⁹ Muli zinizi tuliyimanya ukuti swe va muvwanalyoli, ilelo pe tuligapumilizya amoyo gitu kuminso gakwe.

²⁰ Lwengʼamoyo gitu gakutulonjelela zimo, pʼuMulungu umupiti nakumoyo gitu, havili azimanyile zyonti.

²¹ Mwe vankundwa, apene lwengʼamoyo gitu gatakutulonjelela nazimo, pe tukusankana kwa Mulungu.

²² Ilelo ṿwonti ṿwenga tukulava tukuposhela kukwakwe, she tukuzisajila indajizyo zyakwe nukuvomba tukuvomba zizyo zye zikuhondela kuminso gakwe.

²³ Ulwenʼululajizyo lwakwe lwe lwe luno, ukuti twitishʼizina lya Mwana wakwe uYesu Chilisiti, nukukundana tukundanaje swe vuvo vatupu, inza shʼatupiye ululajizyo.

²⁴ Havili uno wengʼakusajila indajizyo zyakwe, wʼakuva mwe mumwakwe wuyo shima, havili uwene wope mumwakwe. Muli zinizi tumanyile ukuti tuli nawo muhati zyitu, mwe muMupepo wakwe wʼatupiyʼiswe.