1 Yohani 2 - Tesitamenti Umupwa 1965

¹ Mwe twana twanʼimwe, zye nkuvasimbila zinizi, ukuti mutatalajʼamalandu. Pope nashenga woka atazilʼamalandu tuli nawo uwa kutunonelezezya kwa Tata, nkumutaha uYesu Chilisiti umugolosu.

² Uwene ye mputile ya lukundanyo pazya malandu gitu, te kwe kumalandu gitu geka ndah, nkandi naga nsi yonti.

Umushinzi wʼakulolesyʼuvulilani

³ Muli zinizi tukuyimanya ukuti tumumanyilʼuwene inga tukuzisajilʼindajizyo zyakwe.

⁴ Wengʼakuti: Ine imumanyile, lwe havili indajizyo zyakwe atakuzisajila, pe mulumilenga, pʼuvwanalyoli vutalipo mumwakwe.

⁵ Nkandʼuno wengʼasajiyʼizwi lyakwe, pe nalyoli ishikunzi sha Mulungu shilunjisile mumwakwe. Muli zinizi naswe tukuyimanya ukuti tuli mumwakwe.

⁶ Uno wengʼakuti nkusyelemetela muli wuyo, we pakuti ulujendo lwakwe luvanje fwe lwa wuyo ṿwʼahajendaga.

⁷ Mwe vankundwa, ntakuvasimbila ululajizyo ulupwa, nkuvasimbila lwe lukali lwe mwali nalwo nalulwo. Ulwenʼululajizyo ulukali lye lizwi lye mwalyiṿuye.

⁸ Havili nkuvasimbilʼululajizyo ulupwa lwe lwa nalyoli mumwakwe wuyo namumwinyʼimwe, shʼishisi shikwepa nuluhozyo lwa nalyoli lwanzitʼukuhozya.

⁹ Uno wengʼakuti: Ine ndi muluhozyo, lwʼamupasitʼuwamwavo, pe suti ashili nashinishi ali mushisi.

¹⁰ Uno wengʼamukunzitʼuwamwavo, pʼali mwe muluhozyo shima, mumwakwe zitalipo nazimo izya kupunuzya.

¹¹ Uwene nyenʼuno wengʼamupasitʼuwamwavo, pʼali mushisi, akujenda mushisi, pʼatakwenya nakwʼakuvala, shʼishisi shitonkoyʼaminso gakwe.

¹² Nkuvasimbila mwe twana mwe, she muswililwe uvutalamalandu mwizina lyakwe.

¹³ Nkuvasimbila mwe vatata, she mumumanyile wuyo wʼalipo kufuma kwe kuvwando. Nkuvasimbila mwe vajaha, she mumuposite umuvivi. Mbasimbiye mwe twana, she mumumanyilʼuTata.

¹⁴ Mbasimbiye mwe vatata, she mumumanyile wuyo wʼalipo kufuma kwe kuvwando. Mbasimbiye mwe vajaha, she mwe vagomu, nizwi lya Mulungu shima likuva mwe mumwinyu, havili mumupositʼumuvivi.

¹⁵ Kwe ndah ukuyikundʼinsi naṿwonti ṿwe ṿili munsʼumu. Uno wengʼakuyikundʼinsi, wʼishikunzi sha Tata shitalipo kukwakwe.

¹⁶ She ṿwonti ṿwe ṿili munsi, impapilo zya muvili, nimpapilo zya minso, nuvwahayivale vwa vulanzi vwa pamwanyʼipa, ṿwe ṿitafumile kwa Tata ndah, nkandi ṿvifumile munsʼumu.

¹⁷ Ilelʼiyenʼinsi yikwepa poka nimpapilo zyakwe. Nkandʼuwenʼuno wʼakuvomba zyʼakasimʼuMulungu wʼakuva shima.

Insoshe kuvapinkaChilisiti

¹⁸ Mwe twana mwe, iha he havalilizyo ha vusilo. Inza she mwiṿuye ukuti umupinkaChilisiti akwinza, ishi vatumpusile avapinkaChilisiti avinji, mwe mumwo tukumanya ukuti iha havalilizyo ha vusilo.

¹⁹ Ukufuma kwe vafumile mwe mumwitu umu pashifumo, nkandi vatak vamwitu. Vapele vah vamwitu, pe nkandi tuli navo nashinishi. Nkandi muli zizyo vavonehaje apazelu ukuti vate vamwitu vonti.

²⁰ Nkandʼimwe avapasilʼuvupashilwa Wuyo we Mufinjile. Ilelo mwenti muli nuvumanyinsanyi.

²¹ Nkavasimbila te lya kuti mutavumanyile uvwanalyoli, nkandi nkavasimbila she muvumanyile, havili ukuti ilenga lyonti te lifuma muvwanalyoli.

²² Unanu umulumilenga, amwe ate wuyo wenga akuhana akuti uYesu te wʼuChilisiti? Wuyo we mupinkaChilisiti wʼakumuhana uYise nuMwana.

²³ Vonti venga vakumuhana uMwana, ve wope nawe Yise vate nawo. Uno wengʼakuyiyanjila kwa Mwana, wʼali nawo nawe Yise.

²⁴ Namwe lelo zye mwiṿuye kuvwando zye muve nazyo muhati shima. Lwe mukuva nazyo shima zye mwiṿuye kuvwando, pe namwe mukuva mwa Mwana namwa Yise.

²⁵ Ulwenʼulumfingwi lwʼafinzile kulʼiswe lwe lunulu: Uvulanzi vwa shimashima.

²⁶ Imbasimbiye zinizi she valipo ve vakuvatezya.

²⁷ Namwe lelo vwope nuvupashilwa vwʼavapasile Wuyo muli navwo. Pe kwe kuva mute mwe va kumwanza wumo uwa kuvasambilizya zimo, nkandi shʼukupaha kwakwe kukuvasambilizya zyonti, te zyʼilenga, zye zya nalyoli, inza she kuvasambilizizyʼimwe vovulo muvanje mwe mumwakwe.

²⁸ Shinishi lelo, mwe twanʼimwe, pe muvanje mwe mumwakwe wuyo ukuti inga lumo lwʼaloleha pe tuhave swe vasansamusu, tutahafwʼinsoni muvwinzilo vwakwe.

²⁹ Uwene inga mumumanyile ukuti mugolosu, pe mumanyaje ukuti vonti ve vakuvombʼizya vugolosu ve vapafilwe muli wuyo.