1 VaKolinti 4 - Tesitamenti Umupwa 1965

Imbombo ya vapositili iya kumuvombelʼuMulungu

¹ Avantu lwe vakutwenyʼiswe, pe vatumanyaje ukuti swe vanyamata va Chilisiti, havili ukuti swe vasunzi va zya vuzigizigi zya Mulungu.

² Havili ahenʼahanji he hakwanzilwa kuvasunzi he hakuti valolehaje ukuva vatungamu.

³ Nkandʼine zye ntakuviha kunsingo ndali nashenga mukundonga zimʼimwe, nashenga vakundonga zimʼavantu, nane neka ntakuyilonga nazimo.

⁴ She ntayiwenyi nazimʼine, nkandi mwe ntagolosheye mumwo ine ndali, nkandi uwa kundongʼine we wʼuMwene.

⁵ Mwe mumwo mutalongaje lwe pashili, muleshe ahinze sutʼuMwene, wʼaliziṿumbula apazelu zye ziṿwamile mushisi nazye nsivo zya mumoyo alizikupulʼuwene. Pala nyene pʼumuntu wonti ali va nulutimo lwe lufumile kwa Mulungu, unʼulwakwe unʼulwakwe.

⁶ Mwe vamwitu, muli zinizi nkuyitaha nene nuApolo ukuti tuvanje swe shiholanyo sha kuvasambilizya ukuti kwe ndali ukupitilizya kuli zye zisimṿilwe. Mwe mumwo mwe muvaliye numʼumuntu atayimwamihaje kuwamwavo.

⁷ Shʼunanu akusavuyʼiwe ukuti uli payo nuwamwinyu? Muli ṿwe uli naṿwo shili kwoshi shʼutaposheleye? Ingʼuposheleye pʼukuyitima shonu fwe ngati muntu wʼataposheleye?

⁸ Ishi mwikusi nzila! Ishi mwadumbukwa! Muyipezilʼukuva mwe vamwene shisitakutwenyelezyʼiswe! Mupele mwayipezile ukuva mwe vamwene nalyoli, pe nkandi naswe tuyipezile ukuva swe vamwene poka namwe.

⁹ She lwe nkwenyʼine, pe swe vapositili uMulungu atuvisile kwisinda kuli vonti, tuli fwe ngati swe vakufwa vwelele, she tuyipezilʼukuva fwe ngati swe halumbe ha kwenyelezya mumwo insi navahavizya navantu.

¹⁰ Iswe swe vawelewele she tuli nuChilisiti, nkandʼimwe mwe vanjele she muli mwa Chilisiti. Iswe swe vayeyevazu, nkandʼimwe mwe vagomu. Imwe mwe vimishilwa, nkandʼiswe swe vasufilwa.

¹¹ Ukufiha napahavalilizyʼiha tuli ninzala nishinyoto ninzwalo, tukukuntwa, havili tute napavuyo.

¹² Tukuyikungula kumbombo zya nyove zyitu; ava ve vakutuliga ve tukuvalota; lwe vakutuṿwima pe tukuzyihʼumulaha;

¹³ inga vakututonʼamatona pe tukwolovelʼukuyanga navo. Tuli fwe ngati nswaswa zya munsʼumu, havili fwe ngati makoko ukufiha nakushinishʼuku.

Insoshe zya muntu uyise kuvana vakwe

¹⁴ Ntakuvasimbilʼimwe zinizi ukuti nkuvapasyʼinsoni ndali, nkandi ukuti imbasundajʼinjele mwe vana vane avankundwa.

¹⁵ Nashenga mungavanga navakuvasunda avasitakuvazilwa uvwinji avakuvasundʼinjele zya Chilisiti imwe, avaso vinyu te vinji. Shʼine mbapafilʼimwe mwa Chilisiti muzyʼIvangeli.

¹⁶ Mwe mumwo nkulambilizya kulʼimwe nkuti: Simulandatʼamiho ganʼine.

¹⁷ Zye zizyo namutumilʼuTimoti kumwinyu, umwana wane unkundwa we mutungamu mwa Mwene, wʼalivakumbusyʼamadala gane ge gali mwa Chilisiti Yesu inza she nkusambilizya mushivanza shonti.

¹⁸ Vamo nyene vakuyivala veka fwe ngati nte ninze kumwinyu.

¹⁹ Nkandi ntalihava ukwinza kumwinyu, lwengʼuMwene ayitisile. Pe ve vakuyimwamiha veka ndivamanya te kwe kumazwi gavo nkandi kumaha gavo.

²⁰ Shʼuvumwene vwa Mulungu vute mumazwi ndali, nkandi mumaha.

²¹ Mukwanza shonu? Amwe ninze kumwinyu nulusanzu, pamo mushikunzi namumupepo wa vutehamu?