1 Timoti 6 - Tesitamenti Umupwa 1965

Avazya

¹ Avazya vonti ve vakunzilwe, ve pakuti vavamanyajʼavapiti vavo ukuti vahondeye ukuvashindiha, ukuti izina lya Mulungu ninongwa zye tukuvasambilizya zitaholelwaje.

² Ve vali navapiti vavo avitisi, ve vatavapupusyaje ndali, she ve vanamuntu, ve pakuti valusyaje ukuvavombela she ve vakuvombelwa ve vitisi havili ve vankundwa. Zyʼuvavuzye zinizi, uvalajizyaje nkani.

Insambilizyo zyʼilenga

³ Ingʼalipo wumo wʼakuyangʼinongwʼizinji, wʼatakulandata amazwi amapelavulanzi ga Mwene witu uYesu Chilisiti, namalango ge gakutulanganizya ukumunyilʼuMulungu,

⁴ wʼali nuvwahayivale, atazimanyile nazimo, nkandi avinile lwʼakusungwa ahafwishi, amadali, zye zikupelʼulugulumwo, nukudalinkana, nukuliganʼindigo, nukumusivililʼuwunji izya vuvivi,

⁵ nukuzezanya shima avantu vʼinjele zyavo zinanjisile, ve vafwulilwe uvwanalyoli, ve vakuti uvunyilaMulungu vwe vulonchelo vwa shuma.

Ishuma sha nalyoli

⁶ UvunyilaMulungu poka nuvusitakusungwʼiṿinji vwe vulonsi uvupiti.

⁷ She twali vwelele lwe tuhinzaga munsʼumu, zilʼapazelu ukuti kwope nukwepa tuliyepa vwelele.

⁸ Nkandʼinga tuli naṿwo iṿwa kulya niṿwa kuzwala pe tukuti ṿijiye.

⁹ Avene nyene ve vakwanzʼuvudumbwe vakuyitaga mulutazyo mumahonde namuṿipapilo iṿwinji iṿisitanjele iṿinanzi, ṿwe ṿikudwiṿwʼumuntu mulunanjiho namululiho.

¹⁰ Shʼuvupapilampiya lye lizi lya mbivi zyonti, vwe vamo vahapapila vahajenda nukupuvʼidala lya lwitiho, zyinzile nukuvadovolanya imbaṿwo inyinji.

Insoshe kwa Timoti

¹¹ Iwe nyene we muntu wa Mulungu uzishimbile zyonti zinizi, nkandʼuyikungule kuvugolosu nakuvunyilaMulungu nakulwitiho namushikunzi nakuvuzyihamulaha nakuvutelefu.

¹² Pasagʼulupasʼulwinza lwa lwitiho, sompolagʼuvulanzi vwa shimashima, havili uhomeshezyʼulwitiho ulwinza lwe vakwiṿwʼavahomʼavinji.

¹³ Nkukulajizya kuminso ga Mulungu wʼakuṿipʼuvulanzi ṿwonti naga Chilisiti Yesu, wʼahahomeshezyʼulwitiho ulwinza pa Ponti Pilati,

¹⁴ nkuti usunjililajʼululajizyo, luve lusitamazota nizya kulongwa nazimo, uhafishe nalwo pavuvoneshelo vwa Mwene witu uYesu Chilisiti,

¹⁵ vwʼalitumbula lwe gafisilʼamaha gakwe wuyo we musangalusu uMuhatamaha wuyo weka, uMuhatansi wa vahatansi, uMwene wa vamwene,

¹⁶ wʼali nuvusitakufwa wuyo weka, wʼatendime muvuzelu uvusitakupalamilʼumuntu, we numʼumuntu atamuwenyi nalumo, we numo atamanyilʼukumwenya. Wʼulushindiho namaha ṿwakwe wuyo shimashima. Amen.

¹⁷ Avadumbwe va shinishi iva vʼuvalajizyaje ukuti vatayibadaje uvupiti, nukusuvila vatasuvilajʼishuma shʼumuntu atashiwenyi mwe shivaliye, nkandi vamusuvile we Mulungu umulanzi, wʼakutupʼiswe iṿintu ṿwonti muvutangale ukuti ṿitusansamusyaje,

¹⁸ vavombaje imbombʼinyinza, vave nuvudumbwe vwa mbombʼinyinza, vavanje vapi, avalilani navamwavo,

¹⁹ lwe vakuhonzya vovulo, pe nishuma shavo vakuyivishilʼulwalo ulwinza kumanda ge gakwinza, ukuti mwe vahasompole uvulanzi vwa nalyoli.

²⁰ We Timoti, uhasunjililʼahinza ahantu hʼupelilwe munyove, ugunjilʼutulumbe utusitanjele twe tuli tweka, namadali ga vumanyinsanyi vwe vute vumanyinsanyi vwa nalyoli,

²¹ vwe vamo lwe vakuti tuvwazile, pe vahapaguha mulwitiho. Uvwila vuvanje namwe.