1 Timoti 5 - Tesitamenti Umupwa 1965

¹ Uno wenga wʼusongo kukwaho, wʼutamuhalapilaje ndali, umuyinzanyaje fwe ngati wʼuso. Avansi kukwaho uvayinzanyaje fwe ngati vamwinyu.

² Avantandʼavasongo kukwaho uvayinzanyaje fwe ngati ve vanyohombala. Avantandʼavansi kukwaho vʼuvayinzanyaje fwe ngati vana vinyu; uvayinzanyaje mwe muvuzelu vwonti.

Izya kuvavombelʼavantanda avazishe mushivanza

³ Avantanda avafwile uvashindihaje, inga vafwile nalyoli.

⁴ Inga wokʼumwantandʼumufwile ali navana, ingavangʼavizikulu, pe pakuti vatalishe ukusambilila zye vahondeyʼukuvavombela ava munyumba inza shʼakasimʼuMulungu, vavapanje iṿwa kuvagalushizyʼavapafi vavo. She zye nyinza kuminso ga Mulungu.

⁵ Uwenʼumwantanda wenga mufwile nalyoli, uno wengʼasyaye weka, wʼakusuvila kwe kwa Mulungu, akulindilila shima ukulambilizya nukuputa shamusanya nashavusiku.

⁶ Nkandʼuno wengʼakupapamila, wʼafuye nzila nashengʼalipo akulandila.

⁷ Zyʼuvasundaje zinizi ukuti vope vayipelaje ukuva vazelu izya kuvayanjila.

⁸ Uwenʼuno wengʼatakuvasivilila avantu vakwe ṿwenga vasovelilwe, inkani ava nyumba yakwe, wʼayihanilʼulwitiho nukulusyʼuvuvivi nawe musitalwitiho.

⁹ Apene nyene inga mukwanzʼukusimba izina lya mwantandʼumufwile, pe mutamulemaje wʼashilʼukufiha pamaha amashumi umutanda, pe mumuleme wʼasenzitwe kumulume woka mwene,

¹⁰ wʼavantu vonti vakumuhomeshezya zye mbombʼinyinza, wengʼakuzizyʼavana, wenga navajeni avateteyʼahinza, wenga avozizye navafinjile muṿinama, wengʼavatuye ve vakuyimṿilwa, wengʼalandite imbombʼinyinza zyonti.

¹¹ Avenʼavantandʼavafwile ve te vagosi uvahanaje, shʼayene inga vakupapilʼizinji zye zikulasana nizya Chilisiti, pe vakwanza kusendwa.

¹² Ilelo mwe mumwo vakuyisendela ukulongwa she vazitazile zye vatalisile ukwitiha.

¹³ Havili vakuhatampa nukubuguzya mumasolo shisitakuvomba. Nkandʼuvuhata vate vahata vwelele, nkandi nuvuzuguzila vali navwo, vakupinga nizya vanji, nukuyanga vakuyanga zye Zitahondeye.

¹⁴ Nkwanzʼukuti avene ve te vagosi vasendwaje kuvanaṿuli, vapapajʼavana, venyelezyajʼinyumba zyavo, ukuti vatamupanje umulugu apa vwimililo lwʼakwanzʼukusamula.

¹⁵ She vamo vapagusile nukumulandatʼuSetano.

¹⁶ Ilelo ingʼumwanaṿuli umwitisi nga mwantanda ali navantandʼavafwile, we pakuti avatulaje, ukuti ishivanza shitilishizilwaje, havili ishene ukuti shivatulaje avantanda ve vafwile nalyoli.

Avasongo va shivanza

¹⁷ Avenʼavasongo ve vakunonelezyʼishivanza ahinza ve vahondeye ukuposhelʼumushinzi umulusyi, inkani vuvo ve vakuyikungula kunongwa na kunsambilizyo.

¹⁸ Shʼukalata akuti: Inkambaku yʼikupulʼingana utayipinyaje kwilomu, havili akuti: Umuvomyi ahondeyʼamalipilo gakwe.

¹⁹ Amalandu genga vakumulonjelela wumʼusongo gʼutagaposhelaje, nkandi ingʼavahome vali vavili pamo vatatu.

²⁰ Venga vatazilʼamalandu uvamene apazelu, ukuti navamwavo vanyilaje.

²¹ Zye nkuzisimishizya kuminso ga Mulungu naga Chilisiti Yesu naga vahavizya avasavulwa ukuti uzisunjililaje zinizi shisitakuzilonga lwʼushilʼukwiṿwʼahinza, shisitakulonjela muvwankundwa.

²² Numo utahashushutʼukumuvihʼinyove, utahambulʼamalandu ga vanji. Iwe uvanje we muzelu shima izyaho.

²³ Uleshʼukungʼwelʼaminzi nkandʼungʼwelaje limʼipele lya mampensya, she muhati yaho mutʼahinza, shʼukuyeyevala havili havili.

²⁴ Avantu vamo amalandu gavo ge vakutala gakuṿumbuha nzila, gavalongoleye kwilongolela ukuvala kwilonjelwi, nkandʼavamwavo agavo gakuvalandata mwisinda.

²⁵ Ṿwe zihonzizye Zyope nimbombʼinyinza, zilʼapazelu, nazye zili payo zitangazyihama.